1 Mkulu Teofili, wanhu wenji nawadita kota vila vyowadahile kwandika vinhu vila vilawile hagati ha hetwe. 2 Nawandika vinhu vyotulonjelwe na wala waviwene avyo kwa meho ga hewo kulawa kwaluche na kudamla Mbuli Inojile. 3 Ahyo mkulu Teofili, ingana nani nandola goya vinhu avyo vyeng'ha kulawa mwaluko, nambona ndikwandichile goya vila vilawile. 4 Ndangudita hino leka hegwe nagwe uvizele kukomya kweng'ha kuli vinhu vyoulanguswe.

5 Mhela Helodi loyawele mndewa wa Yudeya, nakwali na mtambika yumwe itagwa lyake Sekaliya, heye nayali mchilundo cha watambika cha Abiya. Mdala wa heye nakachemigwa Elisabeti, nayali wa lukolo lwa mtambika Aluni. 6 Weng'ha weli nawali watanganiche hali meho ga Nguluwi, nawali wochikala kwa kuwinza vyoyolonga na kulajiza Mkulu Nguluwi. 7 Nawalihela mwana, kwa vila Elisabeti nayali mhende, weng'ha weli nawali walalile lukami.

8 Zuwa limwe Sekaliya nayali yokola mijito ja kutambika kuli Ng'handa ya Nguluwi, nayali nzamu ya heye ya kulavya nhambiko. 9 Kota vyoili chihendo cha watambika, simbi naimgwila Sekaliya kwinjila Ng'handa ya Mkulu kufunyiza ubani. 10 Wanhu wenji nawali wamemile kunze womlanda Nguluwi mhela awo wa kufunyiza ubani.

11 Hamba mhilisi wa Mkulu Nguluwi nakamlawila Sekaliya, nakema kudilo ha honhu ha kulavila nhambiko ha kufunyizila ubani. 12 Sekaliya loyamuwene, nakatinhuka, nakawa na lunhwinhwi. 13 Ila mhilisi wa kilanga nakamlonjela, "Sekaliya, uleche kudumba! Nguluwi nakahulika kulanda kwa hegwe. Mdala wa hegwe Elisabeti kolela mwana mlume, nagwe kompa itagwa Yohani. 14 Kosangalala na kusechelela ng'hatu, wanhu wenji wotowa luchenze kwa chiwalo cha kupondigwa kwake. 15 Kwa vila kowa mng'hangala hali Mkulu Nguluwi. Honwa divai ne chinhu chilingwambuza kugala. Komema Muhe Yelile kulawa mmunda mwa mamo wa heye. 16 Kowahilusa wanhu wenji wa Isilaeli kwa Mkulu, Nguluwi. 17 Komlongola Mkulu Nguluwi, kowa na mong'ho na ludali lwa mloli wa Nguluwi, Eliya, kowadita wahaza na wana wegane. Kowagalamla wanhu wohambe wamkunde Nguluwi wawe na majesa gatanganiche na kuwadita wanhu wewiche goya kumbochela Mkulu."

18 Sekaliya nakamuuza ayo mhilisi wa kilanga, "Ndovizela ndaze kota mbuli ayi yakukomya? Heni nda sekulu na mdala wa heni kalala." 19 Yula mhilisi wa kilanga nakamlonjela, "Heni Gabulieli, ndilingwima hali Nguluwi. Heye ndo yandajize kuya kulonga na hegwe na kukulonjela mbuli ayi inojile. 20 Ila kwa vila hambe ukunde mbuli ayi yoilawila kwa mihela jake, kolemwela kulonga mbaka ago gondikulonjele, galawile."

21 Mhela awo, wala wanhu wali wombeta Sekaliya, nawabubuwala vyoyali yokawila kulawa mli Ng'handa ya Mkulu Nguluwi. 22 Vyoyalawile hanze ya Ng'handa ya Nguluwi, nakalemwela kulonga nawo, ahyo nawavizela nakona kulota kuli ng'handa ya Nguluwi kwa vila nayali yolemwela kulonga, ila nayaliyolajila na moko.

23 Mhela wa heye wa kukola mijito kuli Ng'handa ya Mkulu Nguluwi lo umalile, nakahiluka kaye. 24 Hamba kuli mazuwa mado, mche wake Elisabeti nakawa na himila, nakekala haluga kwa myezi jihano. Nakalonga, 25 "Mkulu kanditila aga. Sambi nakandajila isungu lya heye. Nakambusila soni iwele kwa heni hali wanhu."

26 Kuli mwezi wa sita wa himila ya Elisabeti, Nguluwi nakamlajiza mhilisi wa kilanga yalinguchemigwa Gabulieli, yalute kuli muji ulinguchemigwa Nasaleti, kuli isi ya Galilaya. 27 Nakoya kwa mhinza yumwe yalinguchemigwa Maliya, yabanichilwe na munhu yumwe itagwa lyake Yusufu wa lukolo lwa mndewa Daudi. 28 Mhilisi wa kilanga nakaluta kwa heye, nakamlamsa, "Kulamka! Mkulu Nguluwi kahamwe na hegwe, naye kakutambichiza ng'hatu!"

29 Maliya loyahuliche luzi awo, nakesinza lukami, nakaluka kijesa mnhumbula ya heye, kulamsa aku kwa ndaze? 30 Ila yula mhilisi wa kilanga nakamlonjela, "Maliya, uleche kudumba! Nguluwi nakakugalila kunoga kwa heye. 31 Lole, kowa na himila, hamba koponda mwana mlume na komchema itagwa lyake Yesu. 32 Heye kowa mng'hangala na kochemigwa Mwana wa Nguluwi yawele kuchanya ng'hatu. Mkulu Nguluwi komdita yawe mndewa kota vyoyali sekulu wa heye Daudi. 33 Kowa mndewa wa lukolo lwa Yakubu mazuwa gose na undewa wa heye wowa hela kuduma!"

34 Maliya nakamlonjela mhilisi wa kilanga, "Heni, sinating'hana na mlume. Lelo ago gowa ndaze?" 35 Yula mhilisi wa kilanga nakamlonjela, "Muhe Yelile kokudulichila, na mong'ho wa Nguluwi wokugubika. Kwa mbuli ayo, mwana yelile yoleligwa kochemigwa, Yelile mwana wa Nguluwi. 36 Ulole, Elisabeti mng'holoze! Wanhu nawamchema mhende, lelo sambi kana himila ya myezi sita, nakulala koyalalile. 37 Kwa Nguluwi kuduhuli mbuli iwele ngulemwelwa."

38 Maliya nakalonga "Heni nda chitumagwa wa Mkulu, iwe kota vyoulonjile." Hamba yula mhilisi wa kilanga nakoka.

39 Logakolile mazuwa mado, Maliya nakaluka majendo kuluta hima mbaka kuli muji umwe uwele kuli chidunda cha Yuda. 40 Ako nakenjila kuli ng'handa ya Sekaliya, nakamlamsa Elisabeti. 41 Elisabeti loyahuliche kulamsa kwa Maliya, chali nachitigasika mmunda mwa heye. Elisabeti nakamemezwa Muhe Yelile, 42 naye nakalonga kwa lizi likulu, "Nakutambichizwa kusinda wadala weng'ha na mwana youmponda nakatambichizwa. 43 Heni nda whaani, leka mamo wa Mkulu wa heni yanjendele? 44 Lonyhuliche ulamso wa hegwe, chali chiwele kuli munda wa heni nachitigasika kwa kusangalala. 45 Nakutambichizwa ng'hatu hegwe kwa kukunda mbuli ya Mkulu, kwa vila yowa ikomya kwa gala Mkulu goyakulonjele!"

46 Maliya nakalonga,

"Nhumbula ya heni yangumutogola Mkulu,

47 na muhe wa heni wangusangalala kwa Mbuli ya Nguluwi mlohozi wa heni,

48 Lekachoni nakang'humbuchila, chitumagwa wa heye yaliholile!

Kulawila sambi na kulutilila, wanhu weng'ha wonyhema yatambichizwe,

49 kwa vinhu vikulu Nguluwi vyoyaditile.

Itagwa lya Nguluwi ndo lyelile.

50 Isungu lya heye lyanguwalutilaga wala walingumdumba,

lyangikalaga lulelo mbaka lulelo.

51 Nakadita mbuli ng'hulu kwa moko wa heye.

Nakawasambalula walingidaya kuli nhumbula za hewo.

52 Nakawadulisa wandewa kulawa kuli vigoda vya hewo vya undewa,

nakawakwiniza wala waliholile.

53 Wawele na nzala nakawagutiza vinhu vinojile,

wawele na lufufu nakawaleka walute moko yeng'ha.

54 Nakamtanza Isilaeli chitumagwa wa heye,

kwa kukumbuchila isungu lyake.

55 Kota vyowalongane na wakulu wa hetwe,

Abulahamu na ulelo wa heye mazuwa gose."

56 Maliya nakekala na Elisabeti myezi jidatu, hamba nakahiluka kaye kwa heye.

57 Mhela wa Elisabeti kuponda naufika, nakaponda mwana mlume. 58 Walingikalasa habehi nawahulika vila Mkulu Nguluwi kamonela isungu ng'hatu, nawasangalala hamwe na heye.

59 Hamba mazuwa nane nagafika ga kumwinjiza yula mwana ikumbi, nawali wogana kumchema itagwa lya mhaza wa heye, Sekaliya. 60 Ila mayake nakalonga, "Hebu! Kochemigwa Yohani." 61 Nawamlonjela, "Lekachoni haduhu munhu kuli lukolo lwa hemwe, yalinguchemigwa itagwa ali?" 62 Lelo nawamditila ulajilo mhaza wa mwana leka yamhe itagwa lyachi mwana wa heye. 63 Heye kalanda chibao cha kwandika kandika hino, Yohani ndo itagwa lyake, weng'ha nawekala wabubuwale. 64 Bahala umyango na mlomo wa Sekaliya naugubuka nakaluka kulonga kahi yomtogola Nguluwi. 65 Walingikalasa habehi nawafichigwa na lunhwinhwi, mbuli azo nazenela chila honhu kuli chidunda cha Yudeya. 66 Weng'ha wahuliche mbuli ayo, nawejesa mnhumbula zawo wolonga, "Mwana ayu kowa ndaze?" Kwa vila naloneka ludali lwa Mkulu Nguluwi nalwali hamwe na heye.

67 Sekaliya, mhaza wa Yohani, nakamemezwa Muhe Yelile, naye nakalavya uloli yolonga.

68 Yatogolwe Mkulu Nguluwi wa Isilaeli,

kwa vila nakoya kwa wanhu wa heye na kuwagombola.

69 Nakatugalila mlohozi mkulu yawele na ludali,

lukolo lwa Daudi chitumagwa wa heye.

70 Nakatulonjela aho katali kukolela kwa waloli wa heye welile,

71 kota kotulohola mmoko mwa walingutuzudila,

na kulawa mmoko mwa wanhu weng'ha wehile.

72 Nakalonga kowonela isungu wakulu wa hetwe,

na kukumbuchila ilagano lyelile.

73 Nakamlahila Abulahamu sekulu wa hetwe.

74 Kutulohola mmoko mwa wa wang'honyo wa hetwe,

leka tumfugamile heye ne kudumba,

75 Tuwe welile na watanganiche hali heye,

mazuwa geng'ha ga ukomu wa hetwe.

76 Nagwe mwana wa heni, kochemigwa mloli wa Mkulu Nguluwi yawele kuchanya ng'hatu,

komlongola Mkulu Nguluwi, komgongomanyila nzila,

77 kowawikulila wanhu kota woloholigwa,

na kusilwa gehile gowaditile.

78 Nguluwi wa hetwe kana isungu.

Kotugalila lumuli kulawa kuchanya.

79 Na kutulangazila weng'ha tulingikala kutitu kuli kwaga,

na yalongoze magulu ga hetwe kuli nzila za kikala goya.

80 Mwana nakakula, nakapata ludali kuli Muhe. Nekekala kugunuche mbaka loyelajile kwa wanhu wa Isilaeli.