1 Zuwa lila mndewa wa Loma Agusto nakalajiza kota wanhu weng'ha wa isi ila wawazigwe. 2 Kuwazigwa ako nakwali kwa mwaluko, mhela Kulenio loyawele chilongozi wa mkowa wa Siliya. 3 Weng'ha nawaluta kuwazigwa, chila munhu kaye koyapondigwe.

4 Yusufu nakalawa muji wa Nasaleti kuli isi ya Galilaya nakaluta muji wa Betelehemu ya mkowa wa Yudeya koyaleligwe mndewa Daudi. Yusufu nakaluta ako kwa vila nayali wa lukolo lwa Daudi. 5 Nakaluta kuza wazigwa hamwe na mchewake Maliya heye Maliya nayali na himila. 6 Lowawele ako zuwa lya Maliya kuponda nalifika, 7 nakaponda mwana wa mwaluko mlume, nakamvika vibende vya chiwana na kumuwasiliza kuli honhu ha kudila misenga. Kwa vila nawahusa honhu ha kuwasa kuli ng'handa za wajenzi.

8 Honhu aho nakwali na wadimi wawele wochikala kuli migunda wokwamila vilundo vya migongolo.Mdimi kangulolela migongolo jake 9 Mhilisi wa Mkulu Nguluwi nakawalawila na ukulu wa Mkulu Nguluwi nauwalangazila kuli banzi zeng'ha, nawadumba ng'hatu. 10 Mhilisi wa kilanga nakawalonjela, "Mleche kudumba ikugalilani Mbuli Inojile iwoyele wanhu weng'ha. 11 Kwa vila, lehano kuli honhu ha Daudi, kaleligwa mlohozi kwa mbuli ya hemwe yuye Kilistu mkulu mlohozi yahaguligwe na Nguluwi. 12 Achi chokulajilani hemwe mochifika chali chivalizigwe nguwo za chiwana yawasilizwe hali honhu ha kudila misenga. 13 Baho chilundo chikulu cha wahilisi wa kilanga nachilongozwa na ayo mhilisi, wazangumtogola Nguluwi wolonga."

14 "Tumtogole Nguluwi wa kilanga,

kikala goya muisi kuli wanhu yawaganile!"

15 Bahala mhilisi wa kilanga nakoka na kuhiluka kilanga, walingudima wazangilonjela. "Tucheni mbaka Betelehemu tukalilole ali lilawile lyotulonjelwe na Mkulu." 16 Waluta wobilima, wamfika Maliya na Yusufu na yula mwana yawasilizwe honhu ha kulisila misenga, 17 Awo wadimi lowamuwene ayo mwana wawalonjela wayao mbuli yowahuliche ya ayo mwana. 18 Weng'ha wahuliche ago wekala mlomo mwazi mbuli zowalonjelwe na awo wadimi. 19 Ila Maliya nakagawika na kijesa aga geng'ha mnhumbula ya heye. 20 Wala wadimi wahiluka kaye kowekalaga kuno womtogola Nguluwi kwa geng'ha gowahuliche na kugona, geng'ha gawa hihila kota vowalonjelwe.

21 Mazuwa nane logafichile ga kumwinjiza ikumbi ayo mwana, nakapegwa itagwa lilila lya Yesu lyonayapeligwe na mhilisi wa kilanga yang'hali hola nyinda.

22 Logafichile mhela wa kuwelizwa kwa Maliya na Yusufu kota voiganigwe na malajizo ga Musa, lelo, Yusufu na Maliya nawamuhola yula mwana nawaluta Yelusalemu leka wamuwiche chiuyeng'ha kwa Mkulu Nguluwi. 23 Mli mzilo wa mkulu yandichigwa. "Chila mwana mlume yalongole kuleligwa, yalavigwe kwa Mkulu." 24 Kahi nawaluta wakalavye nhambiko, ng'hunda mbili kota mzilo wa Mkulu Nguluwi vyoulingulonga.

25 Mihela ajo ako Yelusalemu kwali na munhu yumwe, nayali yanojile na yalingumdumba Nguluwi itagwa lyake Simoni, heye yaliyobeteza ulohozi wa Isilaeli. Muhe Yelile nayali hamwe na heye. 26 Muhe Yelile nakamtawiza kota hobagama mbaka yamone Kilistu wa Mkulu Nguluwi. 27 Yolongozwa na Muhe Yelile, Simoni nakenjila kuli luga lwa Ng'handa ya Nguluwi, wahaza wa Yesu wamgala mwana wa hewo wamditile kota vyoilinguganigwa na malajizo ga Musa, 28 Simoni nakambochela ayo mwana mmoko mwa heye kuno yomtogola Nguluwi yolonga,

29 "Lelo Nguluwi Mkulu kudita choulonjile,

mkundize chitumagwa wa hegwe yalute kwa kikala goya.

30 Mina kwa meho gangu ndiwona ulohozi wa hegwe,

31 uwichile woneche na wanhu weng'ha,

32 alu ndo lumuli louwamwesele wanhu wa isi,

na ukulu kwa wanhu wa hegwe Isilaeli."

33 Mhaza wa Yesu na mayake newekala mlomo mwazi kwa ulonzi woyaliyolonga Simeoni kuli yula mwana. 34 Simoni nakamtambichiza, nakamlonjela Maliya mayake, Mwana ayu nakahaguligwa na Nguluwi kuwifya na kigala ulohozi, kowalohola wanhu wenji wa Isilaeli. Heye kowa ulajilo wa chinhu chilemigwa na wanhu. 35 Majesa ga wanhu wenji gozangoneka hazelu usungu uwele ukali kota ipanga woihoma nhumbula ya hegwe.

36 Hali na munhu yumwe yatumigwe mdala itagwa lyake Ana mhinza wa Fanueli wa nhanzi ya Asheli. Nekekala na mlume mihela saba kulawa loyaholigwe. 37 Nakekala nayali hela mlume mbaka mihela ajo yawele mng'hangala wa miyaka makumi nane na gane mihela ajo jeng'ha nekekala hali Ng'handa ya Nguluwi yokwesela kulya na kulanda nemisi na nechilo, 38 Mihela jijo kalawa kumwando kamtogola Nguluwi na kudamla mbuli za ayo mwana kwa wanhu weng'ha awala wali wobeteza ugombozi wa Yelusalemu.

39 Maliya na Yusufu lowaditile geng'ha gowalonjeligwe na mzilo wa Mkulu Nguluwi, wahiluka kaye kwawo Nasaleti wilaya ya Galilaya. 40 Mwana kakula kawa na ludali na luhala lukami, kunoga kwa Nguluwi kwali na heye.

41 Chila mhela wahaza wa Yesu nawazowela kuluta Yelusalemu wone iwe mnvina ya Pasaka. 42 Yesu navyoyali na miyaka kumi na mili weng'ha waluta kuli mnvina vowazowele, 43 Mnvina loimalile nawaluka kuhiluka kaye kwawo, ila msongolo Yesu nakapona Yelusalemu ne wahaza wa heye kuvizela. 44 Nawavizela nayali hamwe na chilundo cha wanhu wawele ngilongoza, nawajenda nemisi yeng'ha, hamba nawaluka kumpala hali wanhu yoyawazowele. 45 Lowawene hambe wamone nawahiluka Yelusalemu wompala.

46 Zuwa lya kadatu nawamfika kuli luga lwa Ng'handa ya Nguluwi hamwe na walangusa wa malajizo yowahulichiza na kuwauza mbuli. 47 Weng'ha wahuliche ulonzi wa heye wekala mlomo mwazi luhala loyali nalo kwa kwidichila gowali womuuza. 48 Wahaza wake lowamuwene wekala mlomo mwazi. Mayake kamuuza, "Gwa gomwana lekachoni kutuditila ahi? Mhaza wa hegwe na heni twali tukupala kwa isungu." 49 Heye kawalonjela, "Lekachoni mnzengumala? Hamvizelele nanganigwa ndikale mng'handa ya Mhaza wa heni?" 50 Wahaza wa heye hawavizelele chila choyali yowalonjela.

51 Yesu kahiluka hamwe mbaka aho Nasaleti, kawahulika. Mayake kawika geng'ha gala mnhumbula. 52 Yesu kakula kwa lukuli na kwa luhala na kwakumnojeza Nguluwi na kuwanojeza wanhu kahi.