1 Yesu loyasindile kulonga aga geng'ha kuno wanhu wangumuhulichiza, nakaluta Kapanaumu. 2 Ako nakwali na chilongozi wa wamizi, nayali na chitumagwa yamganile ng'hatu. Ayo chitumagwa nayali yotamika behi kubagama.Mkulu wa wamizi wa Waloma 3 Chilongozi ayo loyahuliche mbuli za Yesu nakawalajiza wasekulu wa Yuda walute kumlanda yoye yamusile utamwa chitumagwa wa heye. 4 Lowafichile kwa Yesu, nawamdedeza ng'hatu, nawalonga, "Munhu ayu kanguganigwa yaditilwe mbuli ayo, 5 kwa vila kanguwagana wanhu wa isi ya hetwe na ndo yatuzenjele lila sunagogi." 6 Yesu nakaluta hamwe na hewo. Loyawele behi kufika kuli ng'handa ya yula chilongozi, ayo chilongozi nakawalajiza goloko wa heye wamlonjele Yesu, "Mkulu, leche kitunya, kwa vila hambe iganigwe hegwe kwinjila kuli ng'handa ya heni. 7 Kwa chiwalo acho siwezile kuya kwa hegwe. Ila ulonje ulonzi hela naye chitumagwa wa heni kowa mkomu. 8 Kwa vila heni nda munhu ndiwele hali ludali, mbele na wamizi wawele hali ludali lwa heni. Hondimlonjela ayu, ‘Ulute.’ Heye kangulutaga na yunji hondimlonjela, ‘Uye.’ Kanguyaga. Hondimlonjela chitumagwa wa heni, ‘Udite ahi.’ Kanguditaga."

9 Yesu loyahuliche ulonzi awo, nakabubuwala. Nakalugalamchila lula lung'hongola, nakalulonjela, "Sinamona munhu yawele na makundo kota aga kuli isi yeng'ha ya Isilaeli." 10 Wala wanhu lowafichile kaye nawamfika yula chitumagwa yawele mkomu.

11 Hamba Yesu nakaluta kuli muji umwenga ulinguchemigwa Naini nawo walanguswa wa heye na chilundo chikulu cha wanhu nawaluta hamwe na heye. 12 Hoyawele habehi na lwizi lwa muji, naketing'hana na wanhu wawele wapichile mtufi wa mlume yawele ndo mwana wa udewele wa yafililwe na mlume. Wanhu wenji kuli muji awo nawali na ayo mamo. 13 Mkulu loyamuwene ayo mamo nakamonela isungu, nakamlonjela, "Uleche kulila." 14 Hamba nakaluta nakachidoliza chinhanda cha kupapila mtufi, wala wapichile nawema. Hamba nakalonga, "Msongolo! Ndangukulonjela, winuche!" 15 Yula yabagame nakenuka, nakekalisa, nakaluka kulonga. Hamba Yesu nakampa mayake. 16 Wanhu weng'ha nawamdumba Nguluwi, nawamtogola Nguluwi wolonga, "Mloli mkulu nakalawa kwa hetwe. Nguluwi nakoya kuwalohola wanhu wa heye." 17 Mbuli azo nazenela kweng'ha hali Yudeya na kuli isi za habehi.

18 Walanguswa wa Yohani Mbatiza nawamlonjela Yohani mbuli zeng'ha. Ahyo Yohani nakawachema walanguswa wa heye weli mwa wala walanguswa wa heye kawalonjela, 19 nakawalajiza kwa Mkulu leka wamuuze, "Hegwe ndo yula yalinguya, ama tumbeteze yunji?" 20 Wala walanguswa lowafichile kwa Yesu nawamlonjela, "Yohani Mbatiza nakatulajiza kwa hegwe tukuuze, ‘Hegwe ndo yula yalinguya, ama tumbeteze yunji?’ "

21 Mhela awo, Yesu nakawosela matamwa wanhu wenji walingugazigwa na matamwa na wawele na vijeni na wanhu wenji wohambe walole wangulola. 22 Lelo, Yesu nakawedichila, "Mlute mkamlonjele Yohani gala gomgahuliche na kugona na wohambe walole wangulola na vyete wangujenda wawele na uswema wangwelizwa na wohambe wahuliche wanguhulika na wabagame wanguzilipuka na wazunwa wangudamlilwa Mbuli Inojile. 23 Nakatambichizwa munhu yula yohambe yazudizwe na heni!"

24 Aho wasenga wa Yohani lowochile, Yesu nakaluka kuwalonjela wanhu wenji wamemile, kuwala Yohani, nakawauza "Namluta kula kuchiwala, namluta kulola choni? Ndaze, ndo misolo jilinguwembeluswa na mbeho? 25 Ama hebu, nakuluta kulola choni? Namluta kumlola munhu yavalile mivalo jinojile? Hebu! Wanhu wawele nguvala mivalo jinojile na kikala kwa ung'hondwa wa kuli ng'handa za undewa! 26 Lelo mndonjele, namluta kulola choni? Namluta kumlola mloli? Ena! Heye ndo mzidi wa mloli. 27 Ayu ndo yalingulonjigwa kuli Maandiko Matakatifu,

" ‘Mlole, ndangumlajiza msenga wa heni yakulongole,

yawele kokuwichila goya nzila ya hegwe.’ "

28 Yesu nakasinda kwa kulonga, "Ndangukulonjelani, hali wanhu weng'ha haduhu yawele mkulu ng'hatu kusinda Yohani Mbatiza. Ne ahyo, yula yawele mdodo ng'hatu kuli Undewa wa Nguluwi ndo mkulu kusinda heye."

29 Wanhu weng'ha mbaka wakongoza kodi lowahuliche ago, nawakutogola kunoga kwa Nguluwi, awo ndo wala nawakunda kubatizigwa na Yohani. 30 Ila Mafalisayo na wala wavizelele goya Malajizo ga Musa nawalema kumhulichiza Nguluwi, kwa vila nawalema kubatizigwa na Yohani.

31 Yesu nakalonga, "Ndiwawhanize na choni wanhu wa lulelo alu? Wangiwhana na choni? 32 Hewo ndo kota wana wekale kuli soko wochichema na kilonjela,

" ‘Natuwatowela mluli ila hamvinile!

Ne hamlilile hala hotwimbile zimbo za kulombocheza.’

33 "Kwa vila Yohani Mbatiza nakoya, nayali yokwesela kulya na hanwele divai, namwe namlonga, ‘Kana chijeni!’ 34 Naye mwana wa munhu nakoya, nakalya na kunwa hemwe na hemwe, mwangulonga, ‘Mlole ayu yalingulya ng'hatu na yalingugala, goloko wa wakongoza kodi na wawele na gehile.’ 35 Ila luhala lwa Nguluwi loneka lunoga kwa wala weng'ha walinguikunda!"

36 Mfalisayo yumwe nakamlalika Yesu kulya chilyo kwa heye. Ahyo Yesu nakenjila kuli ng'handa ya Mfalisayo, nakekalisa kulya chilyo. 37 Kuli ula mji nakwali na mamo yawele na gehile. Loyahuliche kota Yesu ka haluga ha Mfalisayo, nakahola chupa ya alabasta iwele na unhunyililo. 38 Nakoya, nakema habehi hali magulu ga Yesu kuno yolila na mahozi gake nagamlagalila Yesu kuli magulu. Ayo mdala nakagabagusa magulu ga Yesu kwa mnvili zake. Hamba nakaganonela na kugabakaliza wula unhunyililo. 39 Yula Mfalisayo yamlaliche Yesu loyonile ago, nakejesa mnhumbula, "Wone munhu ayu yahawele mloli yahavizele kota mdala ayu kandaze, kana gehile!" 40 Yesu nakamlonjela ayo Mfalisayo, "Simoni ndina chinhu cha kukulonjela." Heye Simoni nakamlonjela, "Ena mlangusa ndonjele." 41 Yesu nakaluka kulonga, "Nakwali na munhu yaziche sendi kwa wanhu weli, yumwe nayali yamwaziche sendi migwala miya zihano na yunji sendi migwala makumi gahano. 42 Lowalemwele kuhilusa sendi azo, ayo munhu nakawalechela weng'ha weli. Yalikohi hali hewo weli komgana ng'hatu ayo mkulu?" 43 Simoni nakedichila, "Ndangijesa kota ndo yula yalechelwe sendi nyinji ng'hatu." Yesu nakamlonjela, "Goya."

44 Hamba kagalamka kwa yula mdala kalonga, "Simoni kwangumona ayu mdala? Heni honyinjile aha haluga hako humhele mazi ga kuhovujila magulu gangu, ila mdala ayu kanyhovuga magulu gangu na mahozi gake na kumbagusa na mnvili za heye. 45 Hegwe hundamse kwa kunonela, ila kwaluchila hala honyinjile, mdala ayu halechile kuganonela magulu ga heni. 46 Hegwe humbakalize heni mafuta kumutwi, ila heye nakagabakaliza magulu ga heni unhunyililo. 47 Ahyo ndangukulonjela, nakalechelwa gehile ga heye gawele menji, kwa vila nakalajila igano ng'hatu. Ila yula yalechelwe hado, kanguganaga hado hela." 48 Hamba nakamlonjela yula mdala, "Nakulechelwa gehile ga hegwe." 49 Ila wala wawele hamwe mchisaga naweuza, "Ayu ndo whaani yalinguweza kulechela gehile ga munhu?" 50 Yesu nakamlonjela yula mdala, "Makundo ga hegwe gakulohola, ulute kwa kikala goya."