1 Ago logapulute, Yesu nakakola kuli miji na vijiji yodamla Mbuli Inojile ya Undewa wa Nguluwi. Wala walangusa kumi na weli nawelongoza naye 2 na wadala wamwe wawele Yesu nakawosela vijeni na matamwa, nawelongoza hamwe na heye. Hali hewo nayali Maliya yachemigwe Madelena, yula nayosigwe vijeni saba 3 na Yohana mdala wa Kusa, mkola mijito mng'hangala wa Helodi na Susana na wadala wanji wenji wawele womkolela mijito Yesu kwa lufufu lwao.

4 Mhela umwe lung'hongola nalwali lukuya kwa Yesu kulawa kuli chila muji, nakalulonjela nhelo ayi. 5 "Yalingunyala nakaluta kunyala nyhadikwa, loyawele yonyala, zinji nazigwa habehi na nzila, nazibijigwa, videje vya kilanga navilya. 6 Zinji nazigwa hali mitalawe, lozotile nazikala kwa kuwahela mazi. 7 Zinji nazigwa hali miwa, jila miwa najikula hamwe na ajo mizuchila ja nyhadikwa na kujipilinjila mizuchila ja nyhadikwa azo. 8 Zinji nazigwa hali misanga jiligoya nazota na kulela ng'hatu!" Loyasindile kulonga ago, nakalonga kwa lizi likulu, "Yawele na makutu ga kuhulichiza, yahuliche!"

9 Walanguswa nawamuuza Yesu, "Nhelo ayi ina mana yachi?" 10 Heye nakawedichila, "Hemwe nampegwa kuvizela uviso wa Undewa wa Nguluwi, ila kwa wanji ndangulonga kwa nhelo hanga wangulola waleche kona na howohulika waleche kuvizela."

11 "Lelo mana ya nhelo ayi ndo, nyhadikwa ndo ulonzi wa Nguluwi. 12 Zila zigwile mnzila zangulajila wala wanhu wawelenguhulika ulonzi wa Nguluwi hamba Limazoga lyanguya lyangusa ulonzi awo mnhumbula za hewo leka waleche kukunda na kuloholigwa. 13 Zila zigwile hali italawe ndo wala walinguubochela ulonzi kwa kusangalala hala howohulika, ila wahela mizabi. Wangukunda kwa mhela uchefu hela, houfika mhela wa kujezigwa wangulekaga kukunda. 14 Zila zigwile hali miwa ndo wala walinguhulika ila howolutilila wangutunyigwa na kikala kwa hewo, lufufu na ung'hondwa, nawo wangulela mafuza ila hambe gakangale. 15 Zila zigwile mli misanga jinojile, ndo wala wanhu wawelenguhulika ulonzi, wangibatilila mnhumbula, awo wangwimilila mbaka wangulela mafuza.

16 "Wanhu hawawesaga chenje na kuchigubika na chidoto ama kuwika mlukweme lwa chinhanda. Ila wanguwikaga kuli honhu ha kuwichila chenje leka wala walingwinjila mng'handa wone lumuli. 17 Kwa vila chila chinhu chivisigwe chowichigwa hazelu na uviso woneche wozeleka. 18 Lelo milolele ndaze vyomlinguhulika, kwa vila yawele na chinhu kokonjezelwa, ila yula yalihela chinhu, mbaka chila choyalingijesa kanacho choholigwa."

19 Aho mamo na wang'holoze Yesu nawamuyila, ila nawalemwela kumhejelela habehi kwa vila wanhu nawamema lukami. 20 Munhu yumwe nakamlonjela Yesu, "Mayako na wang'holozo wakunze wangugana wakone." 21 "Ila Yesu nakamwidichila, mayangu na wang'holozangu ndo wala walinguhulika ulonzi wa Nguluwi na kibatilila."

22 Zuwa limwe Yesu nakakwina mli itumbwi hamwe na walanguswa wa heye, kawalonjela, "Tuloche tulute mbaka kumwambu mwa ilamba." Nawo nawaluka kuluta. 23 Lowawele woluta mli itumbwi, Yesu nakawasa. Nhigu ng'hulu nailawila kuli ilamba mbaka itumbwi nalyali limema mazi, nawo nawali habehi kudumigwa. 24 Walanguswa nawamlutila Yesu na wamwinula wolonga, "Mkulu, Mkulu! Twangudumigwa!" Yesu nakenuka kaideuza yila nhigu, baho naileka, nakuwa tulu! 25 Yesu nakawauza, "Gakohi makundo ga hemwe?" Ila hewo nawabubuwala na kudumba kuno wochilonjela, "Ayu ndo whaani mbaka nhigu ng'hulu yangumhulichiza?"

26 Yesu nawalanguswa wa heye nawalutilila na majendo. Nawafika mwhani ya isi ya Wagelasi iwele kumwambu kwa ilamba lya Galilaya. 27 Loyawele yodulika mwhani, munhu yumwe wa muji wula yawele na vijeni, kwa mhela winji nayali hambe yavale nguwo ne kikala haluga, ila nakekala kuli vilaga. 28 Loyamuwene Yesu nakatowa iyowe, naketoza hanyi hali Yesu na kulonga kwa lizi likulu, "Kuna choni na heni, Yesu Mwana wa Nguluwi Yawele Kuchanya Ng'hatu? Ndangukulanda uleche kungaza!" 29 Nakalonga ahyo mhela Yesu loyavilonjele avyo vijeni vilawe kwa munhu ayo. Vijeni avyo navyali vimuyila ayo munhu mala nyinji hanga wanhu nawamuwika mng'handa na kumuwoha minyololo na pingu, ila nakavidumula vihindo avyo na kuhilikwa kuchiwala na vijeni avyo. 30 Lelo Yesu nakamuuza, "itagwa lyako kwa whaani?" Heye nakedichila, "itagwa lyangu chilundo cha wamizi." Kwa vila nayali yenjilwe na vijeni vinji. 31 Avyo vijeni navimdedeza uleche kutugala kuli ikulubila.

32 Honhu hala nahali na chilundo cha migubi chilingudimigwa mchidunda. Lelo, avyo vijeni navimdedeza Yesu yavikundize vinjile kuli migubi. Naye Yesu nakavikundiza. 33 Avyo vijeni navimlawa yula munhu, navinjila kuli migubi, chila chilundo cha migubi najifiduka kuli chiduliko ching'ang'ale na kwinjila kuli ilamba lya mazi, najibagama.

34 Wala wadimi wawele wodima chila chilundo cha migubi vyowawene galawile, nawabilima, nawaluta kuwalonjela wanhu wawele kuli muji na kuli migunda. 35 Wanhu nawaluta kulola galawile, lowafichile hoyali Yesu, nawamfika yula munhu yalavigwe vijeni yekalise habehi na Yesu yawele yavalile nguwo na yawele na luhala, nawadumba. 36 Wala wanhu wowagawene ago nawawalonjela wanhu wanji ndaze yula munhu yawele na vijeni vyoyaloholigwe. 37 Aho wanhu weng'ha wa isi ya Wagelasi nawamlanda Yesu yoche kwa hewo kwa vila nawali na lunhwinhwi. Lelo Yesu nakenjila kuli itumbwi, nakoka. 38 Yula munhu yalavigwe vijeni nakamdedeza Yesu walutase, ila Yesu hakundile, ila nakamlonjela, 39 "Hiluche kaye kawalonjele geng'ha Nguluwi goyakuditile." Yula munhu nakaluta, nakadamla kuli muji weng'ha kuwala mbuli zoyaditilwe na Yesu.

40 Yesu loyahiluche, ikugusi lya wanhu nalimbochela kwa kusangalala kwa vila nalyali limbeteza. 41 Hamba munhu yumwe yalinguchemigwa Jailo chilongozi wa sunagogi, nakoya na kugwa hali magulu ga Yesu, nakamlanda yalute kaye kwa heye, 42 kwa vila mhinza wa heye wa udewele yawele na miyaka kumi na mili, nayali habehi kubagama.

Yesu loyawele yoluta, ikugusi lya wanhu nalimzunguluta chila nzingo. 43 Lelo nakwali na mdala hali lila ikugusi, yawele nayali na utamwa wa kulawa danda kwa miyaka kumi na mili, hanga nayali nakalavya sendi nyinji kwa walaguzi, ila haduhu yamlohole. 44 Ayo mdala nakamuwinza Yesu kumbele, nakadoliza lupembo lwa nguwo ya heye. Baho du nakaloholigwa utamwa wa heye wa kulawa danda. 45 Yesu nakauza, "Ndo whaani yandolize?" Wanhu weng'ha lowalemile, Petili nakalonga, "Mkulu ikugusi ali nalikuzunguluta chila nzingo." 46 Ila Yesu nakalonga, "Ka baha munhu yandolize, kwa vila nandivizela kota mong'ho wa heni naundawa." 47 Yula mdala loyavizele kota hambe yaweze kivisa, nakoya yokakama, naketoza hali magulu ga Yesu. Nakalonga hali wanhu weng'ha lekachoni nakamdoliza na ndaze vyoyaloholigwe baho du. 48 Lelo Yesu nakamlonjela, "Mhinza, makundo ga hegwe gakulohola. Ulute kwa kikala goya."

49 Yesu loyawele yang'hali yodawala, nakoya chitumagwa kulawa kuli ng'handa ya Jailo, yula chilongozi wa sunagogi, nakamlonjela, "Mhinza wa hegwe nakabagama. Uleche kumtunya Mlangusa." 50 Yesu loyahuliche ago nakamlonjela Jailo, "Uleche kudumba, ukunde naye kowa mkomu."

51 Loyafichile kaye kwa Jailo hamkundize munhu yoneche kwinjila mg'handa hamwe na heye, ila Petili na Yakobo na Yohani na mhaza na mamo wa ayo mhinza. 52 Mhela wuwula wanhu weng'ha nawali wolila na kulombocheza kwa chiwalo cha ayo mhinza. Yesu nakawalonjela, "Mleche kulila kwa vila ayu mwana habagame ila kawasa hela!" 53 Hewo nawaseka kwa kumbeza heye kwa vila nawavizela kota yula mwana nakabagama. 54 Yesu nakamibata moko yula mhinza na kulonga, "Mhinza, winuche!" 55 Muhe wa heye naumuyila kahi, baho du nakenuka. Yesu nakawalonjela wamhe heye chilyo. 56 Mhaza na mamo wa heye nawabubuwala ng'hatu, ila Yesu kawalonjela waleche kumlonjela munhu yoneche gala galawile.