1 Yesu nakenjila kuli muji wa Yeliko, nayali yokola kuli nzila za muji awo. 2 Nakwali na munhu yumwe mng'hangala wa wakongoza kodi naye nayali na lufufu, itagwa lyake Sakayo. 3 Nakagana kumona Yesu kota ndo munhu wachi, ila kwa vila nakwali na lung'hongola lwa wanhu nakalemwela kumona kwa vila hawele ng'wemang'wema. 4 Ahyo nakabilima kumwando, nakakwina mchanya mwa ikuyu leka yamone Yesu, kwa vila nayali yokola kuli nzila ayo. 5 Yesu loyafichile honhu hala, nakalola mchanya nakamlonjela, "Sakayo, uduliche himahima kwa vila lehano ndowa mjenzi hakaye hako." 6 Sakayo nakadulika himahima, nakambochela kwa kusangalala. 7 Wanhu weng'ha lowagawene ago, nawaluka kung'hung'huta wolonga, "Nakaluta kikala kwa munhu yawele na gehile."

8 Ila Sakayo nakenuka, nakamlonjela Yesu, "Uhulichize Mkulu! Heni ndowapa wazunwa nusu ya lufufu lwangu, wone nandimsukula munhu yoneche chinhu, ndomhilusila mala zine."

9 Yesu nakamlonjela, "Lehano ulohozi nawinjila kuli ng'handa ayi, kwa vila ayu naye ndo mwana wa Abulahamu. 10 Kwa vila Mwana wa munhu nakoya kupala na kulohola chila chajilile."

11 Lowawele wohulichiza aga, Yesu nakalonga nhelo. Aho nayali habehi kufika Yelusalemu, wanhu awo nawejesa kota kuli mhela wuwo Undewa wa Nguluwi wokuya. 12 Ahyo nakawalonjela, "Nakwali na munhu yumwe wa lukolo lwa chiundewa, nakadita majendo kuluta kuli isi ya kutali kuditigwa yawe mndewa, hamba yahiluche. 13 Ahyo nakawachema kumi hali vitumagwa wa heye, nakawapa sendi chila yumwe zihejile msahala wa myezi jidatu na kuwalonjela, ‘Mgulile na kuguza vinhu kwa sendi azi mbaka londihiluka.’ 14 Ila wenyeng'haye wa isi ya heye nawamzudila, ahyo nawawalajiza wasenga walute kulonga, ‘Natumlema munhu ayu yawe chilongozi wa hetwe.’

15 "Munhu ayo nakahiluka hala du loyaditigwe kuwa mndewa, nakawachema wala vitumagwa loyawapele sendi leka yavizele mzidi chasi chachi chowapatile chila yumwe wa hewo kuli kugula na kuguza vinhu. 16 Chitumagwa wa mwaluko nakoya na kulonga, ‘Mkulu, kwa kiwhana na sendi zoumhele, namhata mzidi mala kumi ng'hatu.’ 17 Heye nakamlonjela, ‘Goya, Hegwe ndo chitumagwa yanojile. Kwa vila nawali wa kukundigwa kuli mbuli ndodo, kolongoza kuli miji kumi.’ 18 Chitumagwa wa keli nakoya, nakalonga, ‘Mkulu, namhata mzidi mala zihano ng'hatu ya sendi zoumhele.’ 19 Naye nakamlonjela, ‘Nagwe kolongoza kuli miji jihano.’

20 "Chitumagwa yunji nakoya, nakalonga, ‘Mkulu, uhole sendi zako, nandizivisa goya kuli chibende, 21 kwa vila nandumba hegwe kwa munhu yang'ang'ale. Kwanguhola hala hawele hauwichile na kwangubeta hala hunyalile.’ 22 Heye nakamlonjela, ‘Ndangukutagusa kwa kiwhana na ulonzi wa hegwe, hegwe kwa chitumagwa yehile! Nakuvizela kota heni nda munhu yang'ang'ale, ndiwele nguhola vyohaviwele vya heni na kubeta honhu hosinyalile.’ 23 Lekachoni huwichile sendi za heni kwa walingwazika leka londihiluka nanyhole hamwe na mzidi?

24 "Aho nakawalonjela wala wawele hala, ‘Mumsukule sendi azo na mumhe yula yapatile mzidi mala kumi.’ 25 Nawo nawamlonjela, ‘Mkulu heye kana mzidi mala kumi!’ 26 Naye nakawedichila, ‘Ndanguwalonjela kota chila yawele na chinhu kokonjezelwa chiyage, ila yula yawele hela chinhu, chila chidodo choyawele nacho, kosukuligwa. 27 Ila wala wang'honyo wa heni wawele hawaganile heni ndiwe mndewa wa hewo, muwegale na kuwakopola hali heni.’ "

28 Loyasindile kulonga ago, Yesu nakalongola kuluta Yelusalemu. 29 Loyawele habehi kufika Betifage na Betaniya, kuli chidunda chilinguchemigwa chidunda cha Mizeituni, nakawalajiza walanguswa wa heye weli, 30 nakawalonjela, "Mlute kuli chijiji chiwele kumwando kwa hemwe. Lomkwinjila kuli chijiji, molifika idogowi lyana liwohigwe liwele halinawahika kukola mijito, mlidohole, mligale hano.Idogowi lyana 31 Wone munhu yowauza, ‘Lekachoni mwangulidohola?’ Mumlonjele, ‘Mkulu kanguligana.’ "

32 Lelo nawaluta, nawafika hihila kota Yesu vyoyawalonjele. 33 Lowawele wolidohola lila lidogowi lyana, wenyeng'haye nawawauza, "Lekachoni mwangulidohola ali idogowi lyana?"

34 Hewo walanguswa nawedichila, "Mkulu kanguligana." 35 Ahyo nawaligala lila idogowi lyana kwa Yesu. Hamba nawatambalika nguwo za hewo mchanya mwa alyo idogowi lyana na kumkwiniza Yesu mchanya mwake. 36 Yesu loyawele yoluta kuno yawele mchanya mwa idogowi, wanhu nawatambalika mivalo ja hewo kuli nzila.

37 Loyawele habehi na honhu halingwaluchila viduliko vya chidunda cha Mizeituni, chilundo cheng'ha cha walanguswa wa heye nawaluka kumtogola Nguluwi kwa kusangalala kwa lizi likulu kwa chiwalo cha madito geng'ha ga vinduzanduza gowagonile, nawalonga, 38 "Nakatambichizwa Mndewa yalinguya kwa itagwa lya Mkulu Nguluwi. Kikala goya ako kilanga na ukulu ako Kuchanya!" 39 Wamwe wa mafalisayo wawele hala hali chilundo cha wanhu, nawamlonjela, "Mlangusa," "Walonjele walanguswa wa hegwe wanyamalile!"

40 Yesu nakawedichila, "Ndangukulonjela, wone wano wonyamalila, ndikomya, ago maganga gokwiniza lizi."

41 Loyawele habehi na Yelusalemu na kuwona muji, Yesu nakaulilila, 42 yolonga, "Wone wahavizelele lehano mbuli zilingigala kikala goya! Ila lelo nazivisigwa kuli meho ga hegwe. 43 Kwa vila mazuwa ganguya gawele wang'honyo wa hegwe wokuzunguluta kuli banzi zeng'ha. 44 Wokuhonda hegwe na wana wa hegwe wawele mgati mwa ng'hanzi za hegwe, hawokulechela ne iganga limwe mchanya mwa iganga liyage, kwa vila hauuzelele mhela Nguluwi loyoyile kukulohola."

45 Hamba Yesu nakenjila kuli ng'handa ya Nguluwi, nakaluka kuwawinga wala wawele ngugula na kuguza vinhu amo, 46 yolonga, "Nayandichigwa, ‘Ng'handa ya heni yowa ng'handa ya kulandila.’ Ila hemwe namuidita kuwa mhalika ya walinguboka."

47 Chila zuwa Yesu nayali yolangusa kuli ng'handa ya Nguluwi. Ila watambika wakulu na walangusa wa malajizo ga Musa na vilongozi wa wanhu nawagana kumkopola, 48 ila nawalemwela kwa vila wanhu weng'ha nawamuwinza na kumhulichiza goya.