1 Lelo, Pilato nakakundiza Yesu yaholigwe, yazapigwe ng'hobwa. 2 Wamizi nawabota itaji lya miwa, nawamvaliza kumutwi na nawamvaliza ikanzu lya zambalau. 3 Nawali woluta hali heye na kulonga, "Ulamche, Mndewa wa Wayahudi!" Kuno womzabula kumeho. 4 Pilato nakalawa kunze kahi, nakawalonjela, "Mlole, ndangumlavya Yesu kwa hemwe leka mvizele kota siiwene nongwa yoneche kwa heye." 5 Lelo, Yesu nakalawa kunze kuno yavalile itaji lya miwa na ikanzu lya lanji ya zambalau. Pilato nakawalonjela, "Mlole, munhu ayo ndo ayu." 6 Watambika wakulu na wamizi lowamuwene nawakwiniza lizi, "Muwambe! Muwambe!" Pilato nakawalonjela, "Mumhole hemwe leka mumuwambe, kwa vila heni siiwene nongwa yoneche kwa heye." 7 Wayahudi nawamwidichia, "Hetwe twanalyo ilajizo, kwa kuwinza ilajizo alyo, yangumgana yabagame kwa vila nakedita kota Mwana wa Nguluwi." 8 Pilato loyahuliche ulonzi awo nakalutilila kudumba. 9 Nakenjila kahi mgati mwa ng'handa ya chiundewa, nakamuuza Yesu, "Nakulawa kohi hegwe?" Ila Yesu hamwidichile ne chinhu. 10 Ahyo Pilato nakamlonjela, "Kwangulema kulonga na heni? Huvizelele kota ndanalo ludali lwa kukulechela na ludali lwa kukuwamba?" 11 Yesu nakamwidichila, "Kwahela ludali lwoneche kwa heni, ila lula loupegwe na Nguluwi kulawa kuchanya. Kwa chiwalo acho, yula yengale kwa hegwe kana gehile ng'hatu." 12 Kulawila aho Pilato nayali yopala ndaze vyoyomlechela Yesu, ila Wayahudi nawatowa iyowe, "Wone umlechele ayu munhu, huwele goloko wa mndewa wa Loma, kwa vila chila munhu yalingidita kota mndewa kangumbezaga mndewa wa Loma." 13 Lelo, Pilato loyahuliche ulonzi awo, nakamigala Yesu kunze, nakekalisa kuli chigoda cha kutagusila, honhu halinguchemigwa, "Sakafu ya Maganga." Kwa Chiebulaniya nahachemigwa Gabata.

14 Nayali kota saa sita nemisi, zuwa lya kiwika goya kwa mnvina ya Pasaka. Pilato nakawalonjela Wayahudi, "Mlole, ayu ndo Mndewa wa hemwe!" 15 Hewo nawakwiniza lizi, "Muse! Muse! Muwambe!" Pilato nakawauza, "Ndaze, ndimuwambe Mndewa wa hemwe?" Watambika wakulu nawamwidichila, "Twahela mndewa ila mndewa wa Loma hela!" 16 Aho Pilato nakamleka Yesu kwa hewo leka wamuwambe.

Lelo, nawamhola Yesu. 17 Yesu yawele yedwichile msalaba wa heye kuluta honhu halinguchemigwa Izeje lya Mutwi, kwa Chiebulaniya Goligota. 18 Aho ndo honhu howamuwambile Yesu hamwe na wanhu wanji weli, yumwe kuli ubanzi wa heye wa kudilo na yunji kuli ubanzi wa kumoso, naye Yesu nayali hagati. 19 Pilato nakalonga wandichigwe ulonzi na kuwichigwa mchanya mwa msalaba. Nawo nawandichigwa ahi, "Yesu Mnasaleti, Mndewa wa Wayahudi." 20 Wayahudi wenji nawausoma ulonzi awo, kwa vila honhu aho hoyawambigwe Yesu nahali habehi na muji. Ulonzi awo nawali wandichigwe kwa Chiebulaniya na Chilatini na Chigilichi. 21 Lelo, watambika wakulu nawamlonjela Pilato, "Uleche kwandika ‘Mndewa wa Wayahudi,’ Ila ‘Heye nakalonga, Heni nda Mndewa wa Wayahudi.’ " 22 Pilato nakedichila, "Chonyandiche ndo chicho!"

23 Wamizi lowasindile kumuwamba Yesu, nawajihola mivalo ja heye, nawajigawa kuli vilundo vine, chila mwamizi chilundo chimwe. Nawalihola kahi ikanzu lyake, ikanzu alyo nalyali libotigwe kwa chihande chimwe hela kulawa kuchanya mbaka hanyi. 24 Lelo, awo wamizi nawalongasa, "Tuleche kulidega ila tulitowele simbi leka tulole lyowa lya whaani." Mbuli ayo naikoleka leka genele Maandiko Matakatifu galingulonga,

"Nawegawila mivalo ja heni,

na ikanzu lya heni nawalitowela simbi."

Ahyo ndo vyowaditile wala wamizi.

25 Habehi na msalaba wa Yesu nawali wemile Maliya yawele ndo mayake Yesu na lumbu wa mayake na Maliya mche wa Kileopa na Maliya Madelena. 26 Yesu loyamuwene mayake honhu hala hamwe na mlanguswa wa heye yamganile, nakamlonjela mayake, "Mamo! Ulole, ayo ndo mwanago." 27 Kahi nakamlonjela yula mlanguswa, "Ulole, ayo ndo mayako." Kulawila mhela awo yula mlanguswa nakamhola mayake Yesu leka yekale hakaye hake.

28 Hamba, Yesu nakavizela kota geng'ha nagali genela, leka Maandiko Matakatifu genele, nakalonga, "Ndina ng'halu." 29 Aho nakwali na chisaye chimemile sichi. Lelo, nawaihola ayo sichi kwa ibofyabofya liwopigwe kuli nhagala ya igodi lya isopolo na kumuwichila Yesu kumlomo. 30 Loyaijezile ayo sichi, Yesu nakalonga, "Nagenela!" Hamba nakenamiza, nakabagama.

31 Nayali zuwa lya Kiwika goya na Pasaka, Wayahudi nahawaganile ng'huli zikale kuli misalaba Zuwa lya Kwesela kwa vila zuwa alyo lyahawele mnvina. Ahyo nawamlanda Pilato yalavye mzilo magulu ga wanhu awo wawele nawawambigwa gabenigwe leka wabagame himahima na ng'huli zawo zusigwe kuli misalaba. 32 Lelo, wamizi nawaluta, nawabena magulu ga munhu wa mwaluko na wa keli wawele nawawambigwa hamwe na Yesu. 33 Ila lowafichile kwa Yesu, nawona kota nayali yabagame, ahyo hawambenile magulu. 34 Ila mwamizi yumwe nakamhoma mlubavu na igoha baho du nailawa danda na mazi. 35 Munhu yagonile ago ndo yalonjile, kulonga kwa heye ndo kukomya, naye nakalonga leka namwe mkunde. 36 Mbuli ayo naikoleka leka Maandiko Matakatifu genele, "Haduhu ne izeje limwe lya heye lyobenigwa." 37 Kahi Maandiko ganji gangulonga, "Womlola yula wamtubule."

38 Logakolile ago, Yusufu, mwenyeng'haye wa Alimataya nakamlanda Pilato yamkundize kuluhola lukuli lwa Yesu. Yusufu nayali yumwe wa walanguswa wa Yesu, hanga kwa uviso kwa vila nakawadumba vilongozi wa Wayahudi. Lelo, Pilato nakamkundiza. Ahyo Yusufu nakaluta, nakuluhola lukuli lwa Yesu. 39 Naye Nikodemo yawele aho hamwande nayali yalutile kwa Yesu nechilo, nakoya kuno yawele na unhunyhililo na ubani chasi cha kilo makumi gadatu. 40 Ahyo nawaluhola lukuli lwa Yesu na kuluwoha kwa sanda ya kitani inojile hamwe na unhunyhililo kwa kiwhana na chihendo cha Wayahudi kuli kutila. 41 Honhu aho howamuwambile Yesu nahali na kagunda, kuli kagunda ako nakwali na chilaga chinyale chiwele ching'hali kutiligwa lukuli mgati mwake. 42 Lelo, kwa chiwalo cha mijito ja Wayahudi ja kuwika goya zuwa lya kwesela na kwa vila chilaga acho nachali habehi, nawalutila lukuli lwa Yesu amo.