1 Lufuku zuwa lya mwaluko lya juma, Maliya Madelena nakaluta kuli chilaga, nakalyona lila iganga lyusigwe hali lwizi lwa chilaga. 2 Lelo, nakaluta kuno yobilima mbaka kwa Simoni Petili na kwa yula mlanguswa yunji yawele Yesu nakamgana, nakawalonjela, "Nawamusa Mkulu kuli chilaga ne hatuvizelele kohi nawamuwika." 3 Petili hamwe na yula mlanguswa yunji nawaluta kuli chilaga. 4 Weng'ha weli nawaluta kuno wobilima, ila yula mlanguswa yunji nakabilima lukami kusinda Petili, nakalongola kufika kuli chilaga. 5 Loyenamize na kusunjilila mgati nakona sanda, ila henjile mgati. 6 Simoni Petili nakoya yomuwinza, nakenjila kuli chilaga, amo nakayona sanda, 7 na chila chibende choyawopigwe Yesu kumutwi. Chibende acho hachiwichigwe hamwe na yila sanda, ila nachali chibinigwe na kuwichigwa chiliyeka. 8 Hamba yula mlanguswa yunji yawahiche kufika kuli chilaga, nakenjila mgati, nakona, nakakunda. 9 Nawali wang'hali kuvizela Maandiko Matakatifu vyogalonjile kota naimgana kuzilipuka kulawa kwa wabagame. 10 Lelo, awo walanguswa nawahiluka kaye.

11 Maliya nayali yemile habehi na chilaga kuno yolila. Mhela loyawele yolila, nakenamiza na kusunjilila kuli chilaga, 12 nakawona wahilisi weli wavalile mivalo mizelu, wekalise hala houlambalikwe lukuli lwa Yesu, yumwe kumutwi na yunji kuli magulu. 13 Awo wahilisi nawamuuza, "Mamo, lekachoni kwangulila?" Naye nakawedichila, "Nawamusa Mkulu wa heni, sivizelele nawamuwika kohi!"

14 Loyasindile kulonga ago, nakagalamka, nakamona Yesu yemile, ila nahavizelele kota ndo Yesu. 15 Yesu nakamuuza, "Mamo, lekachoni kwangulila? Kwangumpala whaani?" Maliya nakejesa kota munhu ayo nayali mlolezi wa kagunda, nakamlonjela, "Mkulu, wone ndo hegwe uwele nakumusa, undonjele kohi koumuwichile, nani ndoluta kumhola." 16 Yesu nakamlonjela, "Maliya!" Naye Maliya nakagalamka, nakamlonjela kwa Chiebulaniya, "Laboni!" Mina ndo "Mlangusa." 17 Yesu nakamlonjela, "Uleche kimbata, kwa vila nding'hali kuluta kilanga kwa Mhaza. Ila ulute kwa wang'holozangu uwalonjele, ndanguluta kilanga kwa Mhaza wa heni yawele ndo Mhaza wa hemwe, Nguluwi wa heni yawele ndo Nguluwi wa hemwe." 18 Ahyo Maliya Madelena nakaluta kuwalonjela walanguswa wa Yesu kota nakamona Mkulu, naye nayali yamlonjele mbuli azo zeng'ha.

19 Loiwele matinazo ya zuwa alyo lya mwaluko, walanguswa nawali weting'hane mgati mwa ng'handa na lwizi najali jihindigwe kwa vila nawawadumba vilongozi wa Wayahudi. Lelo, Yesu nakoya, nakema hali hewo, nakawalonjela, "Mikale goya!" 20 Loyasindile kulonga ago, nakawalajila moko ga heye na lubavu lwake. Lelo, awo walanguswa nawasangalala ng'hatu kumona Mkulu. 21 Yesu nakawalonjela kahi, "Mikale goya! Kota vila Mhaza vyoyandajize, nani ndanguwalajiza hemwe." 22 Loyasindile kulonga ago, nakawaputila na kuwalonjela, "Mbochele Muhe Yelile. 23 Wone muwalechele gehile ga hewo, wolechelwa, wone hamuwalechela gehile ga hewo, hawolechelwa."

24 Tomasi yumwe wa wala kumi na weli, yalinguchemigwa mnyambili hawele hamwe na hewo mhela Yesu loyoyile. 25 Lelo, wala walanguswa wanji nawamlonjela, "Natumona Mkulu!" Tomasi nakawalonjela, "Sikunda mbaka ndizone ng'hovu za misumali kuli moko ga heye na kwinjiza chidole cha heni kuli ng'hovu azo na kwinjiza moko wa heni mlubavu lwa heye."

26 Lelo, logakolile mazuwa nane awo walanguswa nawali hamwe kahi mla mng'handa na Tomasi nayali hamwe na hewo. Lwizi najali jihindigwe, ila Yesu nakoya, nakema hali hewo, nakalonga, "Mikale goya!" 27 Hamba nakamlonjela Tomasi, "Uwiche chidole cha hegwe ahano, ulole moko gangu, uwiche moko wa hegwe kuli lubavu lwa heni. Uleche kuwa lunhwinhwi, ila ukunde!" 28 Tomasi nakamwidichila, "Mkulu wa heni na Nguluwi wa heni!" 29 Yesu nakamlonjela, "Ndaze, kwangukunda kwa vila nakumbona? Nawatambichizwa wala wawele hawawene, ila nawakunda."

30 Yesu nakadita ulajilo winji hali walanguswa wa heye uwele hawandichigwe kuli chitabu chino. 31 Ila awu nawandichigwa leka kuwadita mkunde kota Yesu ndo Kilistu, Mwana wa Nguluwi na kukunda muwe na ukomu kwa ludali lwa itagwa lyake.