1 Yesu nakawalonjela, "Ndikomya ndanguwalonjela, yoneche yohambe yenjile kuli ibani lya ming'holo kwa kukolela kuli lwizi, ila kangwinjila kwa kukolela nzila yinji, ayo ndo mhiza na yalinguboka. 2 Ila yalingwinjila kwa kolela hali lwizi, ayo ndo mdimi wa ming'holo. 3 Mlolela ibani kangumchumulilaga na ming'holo janguhulikaga lizi lya heye, naye kangujichemaga ming'holo jake chila limwe kwa itagwa lyake na kujilavya mgati mwa ibani. 4 Hoyojilavya, kangujilongolaga, najo ming'holo jangumuwinzaga, kwa vila jangulizela lizi lyake. 5 Ming'holo ajo hambe jimuwinze munhu mjenzi, ila jombilima, kwa vila hambe jilizele lizi lya heye." 6 Yesu nakawalonjela nhelo ayo, ila hewo nahawavizelele choni choyaganile kuwalonjela.

7 Yesu nakalonga kahi, "Ndikomya ndanguwalonjela, heni ndo lwizi lwa ming'holo. 8 Wala wanji weng'ha walongole kuya kung'hali heni ndo wahizi na walinguboka, najo ming'holo hajiwahulichize. 9 Heni ndo lwizi. Yalingwinjila kwa kukola kwa heni koloholigwa, kokwinjila na kulawa na kopata honhu ha kudima. 10 Muhizi kanguyaga kwa kunuwila kuhiza, kukopola na kuwifya. Heni nambuya leka wanhu wawe na ukomu, ukomu wenele.

11 "Heni nda mdimi yanojile. Mdimi yanojile kanguulavyaga ukomu wa heye kwa chiwalo cha ming'holo jake. 12 Munhu wa kupegwa mijito kwa chiwalo cha sendi yawele hawele mdimi ne ming'holo hajiwele ja heye, hoyolyona libwa lya kisolo likuya, kangujilekaga ming'holo na kubilima, hamba libwa lya kisolo lyangujibataga na kujisambalula. 13 Heye hambe yejese kuwala ming'holo kwa vila heye ndo munhu wa kupegwa sendi hela. 14 Heni nda mdimi yanojile. Ndanguwazela wawele wa heni, nawo wawele wa heni wangunzela, 15 kota hila Mhaza vyoyalingunzela, nani vyondilingumzela Mhaza. Heni ndanguulavya ukomu wa heni kwa chiwalo cha ming'holo. 16 Kahi ndanajo ming'holo jinji jiwele jahaduhu kuli ibani. Ndanguganigwa kujigala kuli ibani, najo johulika lizi lya heni na kowa na chilundo chimwe na mdimi yumwe.

17 "Mhaza kangungana kwa vila ndanguulavya ukomu wa heni leka mhate kuubochela kahi. 18 Haduhu munhu yalingusukula ukomu wa heni, ndanguulavya kwa kugana nene. Ndanalo ludali wakuulavya na ludali lwa kuuhola kahi. Ahi ndo Mhaza vyoyandajize ndite."

19 Nakwali na kilewa kahi hali Wayahudi kwa chiwalo cha ulonzi awo. 20 Wenji wa hewo nawalonga, "Kana chijeni, kahi kana lukwale! Lekachoni tumuhulichize?" 21 Wanji nawalonga, "Awu hauwele ulonzi wa yawele na chijeni. Ndaze, chijeni changuweza kugagubula meho ga wohambe walole?"

22 Ako Yelusalemu nakwali na mnvina ya kuiwika chiuyeng'ha Ng'handa ya Nguluwi ako Yelusalemu, nawo nawali mhela wa chipute. 23 Naye Yesu nayali yojenda mgati mwa Ng'handa ya Nguluwi kuli chituka cha Solomoni. 24 Lelo, Wayahudi nawamzunguluta, nawamuuza, "Kotuleka na lunhwinhwi mbaka nili? Wone hegwe ndo Kilistu, lelo utulonjele hazelu." 25 Yesu nakawedichila, "Nandiwalonjelani, ila hambe mng'hunde. Mijito jondilingukola kwa itagwa lya Mhaza wa heni jangulonga kuwala heni. 26 Ila hemwe hambe mkunde kwa vila hamuwele ming'holo ja heni. 27 Ming'holo ja heni janguhulikaga lizi lya heni, heni ndangujizela najo jangumbinza. 28 Heni ndangujipa ukomu wa mazuwa gose, najo hajikwajilila mazuwa gose, haduhu munhu yojilavya kuli moko wa heni. 29 Mhaza wa heni yawele ndo yamhele heni ajo ming'holo ndo mkulu kusinda weng'ha, haduhu yoweza kujilavya kuli moko ga Mhaza. 30 Heni na Mhaza ndo chinhu chimwe."

31 Lelo, Wayahudi nawalokota maganga, leka wamtowe. 32 Yesu nakawalonjela, "Nandiwalajila mijito minji kulawa kwa Mhaza. Jakohi hali ajo jilinguwadita mnhowe na maganga?" 33 Wayahudi nawamwidichila, "Hambe tukutowe na maganga kwa chiwalo cha mijito jinojile, ila kwa chiwalo cha kumliga Nguluwi! Kwa vila kwangidita kota Nguluwi hanga kwa munhu hela." 34 Yesu nakedichila, "Ndaze, hayandichigwe kuli chitabu cha Malajizo ga Musa kota, ‘Heni nandonga, hemwe ndo milungu?’ 35 Nguluwi nakawachema milungu wala wawele nawapegwa usenga wa heye, natwe twanguvizela kota Maandiko Matakatifu gangulonga kukomya mazuwa gose. 36 Ndaze, heye yawele Mhaza nakamuwika chiuyeng'ha na kumlajiza kuli isi, mwangumlonjela, ‘Kwanguliga,’ kwa vila nandonga, ‘Heni ndo Mwana wa Nguluwi?’ 37 Wone silingukola mijito ja Mhaza wa heni, mleche kung'hunda. 38 Ila wone ndangujikola mijito ja Nguluwi, hanga hambe mng'hunde, lelo mjikunde ajo mijito, leka mpate kuvizela kota Mhaza ka mgati mwa heni, nani mgati mwa heye." 39 Nawajeza kahi kumibata ila nakasulupuka kuli moko ga hewo.

40 Yesu nakaluta kahi kumwambu mwa lwanda lwa Yolodani, honhu hawele Yohani nayali yobatiza, nakekala ako. 41 Wanhu wenji nawaluta kwa heye nawalonga, "Yohani nahaditile ulajilo woneche. Ila gala geng'ha goyalonjile kuwala munhu ayu ndo gakukomya ng'hatu." 42 Wanhu wenji wa honhu aho nawamkunda.