1 Yesu loyasindile kulonga ago, nakalola kilanga, nakalonga, "Mhaza, ula mhela naufika! Umhe ukulu Mwanago leka naye Mwana yakupe ukulu. 2 Kwa vila nakumha Mwanago ludali kwa wanhu weng'ha leka yawape ukomu wa mazuwa gose awo woumpele. 3 Ukomu wa mazuwa gose ndo awu, kukuzele hegwe uwele uliyeka Nguluwi wa kukomya na kumzela Yesu Kilistu youmlajize. 4 Heni nandikupa ukulu kuli isi ayi, nanyeneza mijito joundaajize ndijikole. 5 Lelo, Mhaza, unhogole hali hegwe kwa ula ukulu wombele nawo kung'hali kulumbigwa kwa isi.

6 "Nandikudita uzeleche kwa wanhu wala woumhele kulawa kuli isi. Nawali wanhu wa hegwe, nagwe nakumha heni, nawo nawebatilila ulonzi wa hegwe. 7 Sambi wanguvizela kota chila choumha heni changulawa kwa hegwe. 8 Nandiwapa wula usenga woumhele, nawo nawaubochela. Wanguvizela kota ndikomya nandawa kwa hegwe na wangukunda kota hegwe nakundajiza.

9 "Ndangulanda kwa chiwalo cha awo, hambe ndande kwa chiwalo cha isi, ila ndangulanda kwa chiwalo cha awo woumhele, kwa vila ndo wa hegwe. 10 Geng'ha gondilinago ndo ga hegwe na ga hegwe ndo ga heni na ukulu wa heni nawoneka hali awo woumhele. 11 Lelo ndanguya kwa hegwe, siwele kahi kuli isi, ila hewo wa kuli isi. Mhaza Welile! Kwa ludali wa itagwa lya hegwe lyoumhele uwamile leka wawe chinhu chimwe kota hetwe vyotuwele hamwe. 12 Londiwele nawo, nandiwawika goya kwa ludali lwa itagwa lya hegwe lyoumhele. Heni nandiwamila, haduhu ne yumwe wa hewo yajilile, ila yula mwana yahaguligwe kwajilila leka Maandiko Matakatifu genele. 13 Lelo, ndanguya kwa hegwe, nandonga mbuli azi kuli isi leka wawe na usangalalo wa heni mgati mwa hewo. 14 Nandiwapa usenga wa hegwe, nayo isi naiwazudila kwa vila hewo hawawele wa isi, kota hila heni vyosiwele wa isi. 15 Silingulanda uwose kuli isi, ila ndangulanda uwamile na lila Limazoga. 16 Hewo hawawele wa isi, kota hila heni vyosiwele wa isi. 17 Uwawiche chiuyeng'ha, ulonzi wa hegwe ndo kukomya. 18 Kota vila vyoundajize kuli isi, nani nandiwalajiza hewo kuli isi, 19 kwa chiwalo cha hewo heni ndangiwika chiuyeng'ha leka nawo wawichigwe chiuyeng'ha kuli kukomya.

20 "Silingulanda kwa chiwalo cha hewo yeka, ila ndangulanda kwa chiwalo cha weng'ha howokunda kwa kiwhana na usenga wa hewo. 21 Ndangulanda leka weng'ha wawe chinhu chimwe. Mhaza! Ndangulanda wawe mgati mwa hetwe kota hila hegwe vyouwele mgati mwa heni nani mgati mwa hegwe. Ndangulanda wawe chinhu chimwe leka isi ikunde kota hegwe nakundajiza. 22 Nandiwapa ukulu wuwula woumhele leka wawe chinhu chimwe kota hetwe vyotuwele hamwe, 23 heni ndiwe mgati mwa hewo, nagwe uwe mgati mwa heni, leka wenele na wawe chinhu chimwe, leka isi ivizele kota nakundajiza na kwanguwagana kota vyoulingungana.

24 "Mhaza! Ndangugana awo woumhele wawe hamwe na heni hala hondili, leka wawone ukulu wa heni woumhele, kwa vila nakungana kung'hali kulumbigwa kwa isi. 25 Mhaza Unojile! Isi haikuzelele, ila heni ndangukuzela. Awa nawo wanguvizela kota hegwe nakundajiza. 26 Nandikudita uzeleche kwa hewo na ndolutilila kudita ahyo, leka igano lyouwele nalyo kwa heni liwe mgati mwa hewo, nani ndiwe mgati mwa hewo."