1 "Heni ndo mzabibu wa kukomya na Mhaza wa heni ndo mlimi. 2 Chila nhagala iwele mgati mwa heni yohambe ilele mafuza Mhaza wa heni kanguitemaga na chila nhagala ilingulela kanguidahulilaga leka ilele ng'hatu. 3 Hemwe namuwa goya kwa chiwalo cha usenga wondiwalonjele. 4 Mikale mgati mwa heni, nani mgati mwa hemwe. Kota hila nhagala vyohambe iweze kulela mafuza iliyeka wone haiwele kuli igodi lya mzabibu, hiho du namwe hambe muweze kulela mafuza wone hamuwa mgati mwa heni."

5 "Heni nda mzabibu, namwe ndo nhagala. Yalingikala mgati mwa heni, wone nani ndiwe mgati mwa heye, ayo kolela mafuza menji, kwa vila ne heni hamuweza kudita choneche. 6 Wone munhu yoneche yohambe yekale mgati mwa heni kangutajigwa kunze kota nhagala ilingutajigwa kunze mbaka yangukala. Wanhu wanguilokotaga nhagala ayo na kuitoza kuli chiluli leka ilakale. 7 Wone mikale mgati mwa heni na ulonzi wa heni wikale mgati mwa hemwe, mlande chinhu choneche chomlinguchigana namwe mopegwa. 8 Ukulu wa Mhaza wa heni wangonekaga hala homlela mafuza menji na kuwa walanguswa wa heni. 9 Heni nandiwagana hemwe kota vila Mhaza vyoyanganile heni. Mikale kuli igano lya heni. 10 Wone mjibate mizilo ja heni mochikala kuli igano lya heni, kota vila vyondijibatilile mizilo ja Mhaza wa heni na kikala kuli igano lya heye. 11 Nandiwalonjela mbuli azi leka kusangalala kwa heni kuwe mgati mwa hemwe na kusangalala kwa hemwe kwenele. 12 Awu ndo mzilo wa heni, migane, migane kota vyondiwaganile heni. 13 Haduhu igano likulu ng'hatu kusinda igano lya munhu yalinguulavya ukomu wa heye kwa chiwalo cha goloko wa heye. 14 Hemwe ndo goloko wa heni wone mdite vila vyondilinguwalajiza. 15 Hemwe hambe ndiwacheme kahi vitumagwa, kwa vila chitumagwa hambe yavizele choyalingudita mkulu wa heye. Ila heni nandiwachema hemwe goloko wa heni, kwa vila nandiwazelesa geng'ha gawele nandigahulika kulawa kwa Mhaza wa heni. 16 Hemwe hamnyhagule, heni nandiwahagula na kuwalajiza mlute kulela mafuza, mafuza galingikala mazuwa menji, naye Mhaza yawape choneche chomlingumlanda kwa itagwa lya heni. 17 Lelo, mzilo wa heni kwa hemwe ndo awu, migane."

18 "Wone isi yowazudila hemwe, mkumbuchile kota nainzudila heni kung'hali haiwazudile hemwe. 19 Wone mwahawele wanhu wa isi, isi yahawaganile kota wanhu wa heye. Kwa vila hamuwele wa isi, ila heni nandiwahagula kulawa kuli isi, achi ndo chiwalo isi yanguwazudila. 20 Mkumbuchile vyondiwalonjele, chitumagwa hawele mkulu kusinda mkulu wa heye. Wone nawangaza heni, wowagaza na hemwe kahi, wone nawahulichiza ulonzi wa heni, wouhulichiza na ulonzi wa hemwe. 21 Ila ago geng'ha wowaditila hemwe kwa chiwalo cha itagwa lya heni, kwa vila hawamzelele yandajize. 22 Wone nasalikuya na kulonga na hewo, hanawalikuwa na gehile, ila sambi hawoweza kilewela kota wahela gehile. 23 Yalingunzudila heni, kangumzudila na Mhaza wa heni kahi. 24 Wone nasalidita kwa hewo mbuli ziwele haduhuli munhu yunji nakazidita hanawalikuwa na nongwa, ila sambi nawagona gonditile nawanzudila, nawamzudila na Mhaza wa heni kahi. 25 Ila nawadita ahi leka kweneza ulonzi wowandichigwe kuli chitabu cha malajizo, ‘Nawanzudila hihi hela!’

26 "Hoyokuya ayo Mtanzi yondimlajiza kwa hemwe kulawa kwa Mhaza, ayo Muhe wa kukomya, yalingulawa kwa Mhaza, heye kondonjela. 27 Namwe kahi mondonjela kwa vila namwali na heni kulawila mwaluko."