1 Zuwa limwe kung'hali mnvina ya Pasaka, Yesu nakavizela mhela wa heye wa kuka kuli isi na kuluta kwa Mhaza nawali ufichile. Nayali yawaganile lukami wanhu wa heye wawele kuli isi, ena, nakawagana mbaka kuduma.

2 Lelo, Yesu na walanguswa wa heye nawali wekalise kulya chilyo cha nechilo. Limazoga nalyali liwichile majesa mgati mwa Yuda mwana wa Simoni Isikalioti, ga kumbelenhuka Yesu. 3 Yesu nakavizela kota Mhaza nakamha chila chinhu, kavizela kota nayali yalawile kwa Nguluwi na kanguhiluka kwa Nguluwi. 4 Lelo, nakoka kuli chisaga, nakawika hafungo ivalo lya heye, nakahola chibende na kiwoha mchuno. 5 Hamba nakawika mazi kuli chisaye, nakaluka kuhovuga magulu ga walanguswa wa heye na kugabagusa kwa chila chibende choyewohile. 6 Loyafichile kwa Simoni Petili, naye Petili nakamuuza, "Mkulu, ndaze, hegwe kohovuga magulu ga heni?" 7 Yesu nakamwidichila, "Hauvizelele chondilingudita sambi, ila kovizela hamba." 8 Petili nakamlonjela Yesu, "Hegwe huhovuga magulu ga heni!" Yesu nakamwidichila, "Wone sihovuga magulu ga hegwe, hauwa wa heni." 9 Aho Simoni Petili nakamwidichila, "Mkulu, nhyovuje, hagawele magulu hela, ila na moko ga heni na mutwi kahi." 10 Yesu nakamlonjela "Yula yojile yangumgana yahovuje magulu hela, kwa vila lukuli lwa heye lweng'ha ndo lunoga. Hemwe ndo mnoga hanga hawele chila yumwe wa hemwe." 11 Yesu nakamzela yawele yombelenhuka, ndo chiwalo nakalonga, "Hemwe namnoga ila hamuwele weng'ha."

12 Yesu loyasindile kuwahovuga magulu na kuvala ivalo lya heye, nakahiluka hala hoyekalise hamwande, nakawauza "Ndaze, namvizela ago gondiwaditile?" 13 Hemwe mwangunyhema Mlangusa na Mkulu, mwangulonga goya, kwa vila ndo heni. 14 Lelo, wone heni ndiwele Mkulu na Mlangusa wa hemwe nandiwahovuga magulu, namwe mwanguganigwa chila yumwe yamuhovuje myage magulu. 15 Nandiwalajila nzila ya kudita, leka namwe mdite kota vyondiwaditile. 16 Ndikomya ndanguwalonjela, chitumagwa hawele mkulu kusinda chilongozi wa heye, ne mpogozi hawele mkulu kusinda yula yamlajize. 17 Lelo, wone mwangugazela ago, mobweda hala homgadita.

18 "Gondilingulonga hagali nguwawala hemwe mweng'ha. Ndanguwazela wala wondiwahagule. Ila ganguganigwa genele Maandiko Matakatifu galingulonga, ‘Yula yehanzile chilyo na heni nakambelenhuka heni.’ 19 Nandiwalonjela mbuli azi sambi kung'hali hazinalawila, leka hozilawila, mkunde kota ‘Heni nda Heni.’ 20 Ndikomya ndanguwalonjela, yalingumbochela heye yondilingumlajiza, kangumbochela heni na yalingumbochela heni, kangumbochele yandajize."

21 Vyoyalonjile ago, Yesu nakadeula mnhumbula, nakalonga, "Ndikomya, ndikomya, ndanguwalonjela, yumwe wa hemwe kombelenhuka heni."

22 Walanguswa wa heye nawelola ne kuvizela nayali yolonga kuwala whaani. 23 Yumwe wa walanguswa wa heye yawele Yesu nakamgana ng'hatu, nayali yekale habehi na Yesu. 24 Lelo, Simoni Petili nakamha ulajilo yula mlanguswa, nakalonga, "Muuze kangulonga kuwala whaani." 25 Yula mlanguswa nakahejela habehi ng'hatu na Yesu, nakamuuza, "Mkulu, ndo whaani?" 26 Yesu nakedichila, "Yula yondimha chihande cha ibumunda chondilize mchizombe, ndo heye." Lelo, nakahola chihande cha ibumunda, nakadilizila kuli chizombe nakampa Yudasi, mwana wa Simoni Isikalioti. 27 Yudasi loyabochele chihande acho, Limazoga nalimwinjila. Lelo, Yesu nakamlonjela, "Chougana kudita, dite himahima!" 28 Ila haduhu ne yumwe wa wala wekalise na heye hala mchisaga yawele nakavizela lekachoni nayali yamlonjele ahyo. 29 Kwa vila Yudasi nayali yowika sendi, wamwe wa hewo nawejesa kota Yesu nayali yamlonjele yagule vilinguganigwa kuli mnvina, ama nakamlonjela yalute kuwapa wazunwa choneche. 30 Lelo, Yudasi loyabochele chila chihande cha ibumunda baho du nakalawa mgati. Nayali nechilo.

31 Yudasi loyochile, Yesu nakalonga, "Lelo Mwana wa munhu nakelizwa, naye Nguluwi nakelizwa mgati mwa heye. 32 Wone ukulu wa Nguluwi naugubuligwa mgati mwa Mwana, lelo, naye Nguluwi koulajila ukulu wa Mwana mgati mwa heye yuye na baho du kodita ago.

33 "Wana wa heni, nding'hali na hemwe kwa mhela uchefu hela. Momhala heni, ila sambi ndanguwalonjela gala gondiwalonjele vilongozi wa Wayahudi, ‘Kondiluta, hemwe hamuweza kuluta!’ 34 Ndanguwapa mzilo unyale, migane mwemwe, migane kota vyondilinguwagana. 35 Wone migane, wanhu weng'ha wovizela kota hemwe ndo walanguswa wa heni."

36 Simoni Petili nakamuuza Yesu, "Mkulu, kwanguluta kohi?" Yesu nakedichila, "Kondiluta hambe uweze kumbinza sambi, ila kombinza hamba." 37 Petili nakamuuza, "Mkulu, lekachoni hambe mbeze kukuwinza sambi? Nda goya kubagama kwa chiwalo cha hegwe!" 38 Yesu nakedichila, "Ndaze, kukomya kota kobagama kwa chiwalo cha heni? Ndikomya ndangukulonjela, kung'hali izogolo halineka, kombela mala zidatu!"