1 Yesu loyawele yokola nakamona munhu yumwe, yohambe yalole kulawila kupondigwa. 2 Lelo, walanguswa nawamuuza, "Mlangusa! Whaani yaditile gehile, munhu ayu ama mhaza wa heye ama mayake mbaka yapondigwe yohambe yalole?" 3 Yesu nakedichila, "Mbuli ayi hailawile kwachiwalo cha gehile ga heye ama gehile ga mhaza wa heye ama gehile ga mayake, ila nakapondigwa yohambe yalole leka welile wa Nguluwi woneche kuli kikala kwa heye. 4 Yangutugana tulutilile kukola mijito ja yula yatulajize kung'hali nemisi, kwa vila nechilo yanguya iwele munhu hambe yaweze kukola mijito. 5 Mhela londing'hali kuli isi, heni nda lumuli lwa isi." 6 Loyalonjile ago, Yesu nakatema mite hasi nakadita nhope, kambakaliza yula yohambe yalole kumeho, 7 nakamlonjela, "Ulute kehovuje kumeho kuli izimbo lya Siloamu." Siloamu mana yake ndo yalajizwe. Aho yula munhu nakaluta, nakehovuga kumeho, hamba nakahiluka yolola.

8 Lelo walingikalasa habehi na heye, wala wawele nawavizela kota aho hamwande nayali mzunwa yalingulanda, nawalonga, "Ayu hawele yula mzunwa yawele yokalisa na kulanda?" 9 Wamwe wa hewo nawalonga, "Ndo heye," Wanji nawalonga, "Hebu! Ila kangiwhana na heye." Ila ayo yawele yohambe yalole nakawalonjela, "Ndo nene!" 10 Lelo nawamuuza, "Naiwa ndaze meho gako nagagubuligwa?" 11 Naye nakawedichila, "Yula munhu yalinguchemigwa Yesu nakadita nhope, nakambakaliza heni kumeho na kundonjela, ‘Lute kehovuje kuli izimbo lya Siloamu.’ Aho heni nanduta, nandihovuga nakwaluka kulola." 12 Nawamuuza, "Heye ka kohi?" Naye nakawedichila, "Heni sivizelele!"

13 Hamba wanhu nawamhilika yula munhu yawele yohambe yalole kwa Mafalisayo. 14 Nalyo nalyali zuwa lya kwesela liwele Yesu loyaditiche nhope na kugagubula meho ga ayo munhu. 15 Lelo, Mafalisayo nawamuuza munhu ayo, "Nakuweza ndaze kona?" Naye nakawalonjela, "Nakambakaliza heni nhope kumeho, nani nandihovuga kumeho, lelo ndangulola." 16 Wamwe wa Mafalisayo nawalonga, "Munhu ayu halawile kwa Nguluwi, kwa vila hambe yebate malajizo ga Zuwa lya Kwesela." Ila wanji nawalonga, "Munhu yawele na gehile koweza ndaze kudita ulajilo kota awa?" Nakwali na kilewa hali hewo. 17 Nawamuuza kahi yula munhu yawele yohambe yalole, "Kwa vila heye nakagubula meho ga hegwe, kwangulonga ndaze kuwala heye?" Naye nakawalonjela, "Heye ka mloli!"

18 Vilongozi wa Wayahudi hawakundile kota aho mwaluko munhu ayo nayali yohambe yalole na sambi kangulola, mbaka vyowawachemile mhaza wa heye na mayake. 19 Lelo, nawamuuza mhaza wa heye mayake, "Ndaze, ayu ndo mwana wa hemwe muwele hemwe mwangulonga nakapondigwa yohambe yalole? Lelo naiwa ndaze kangulola?" 20 Mhaza wa heye na mayake nawedichila, "Twanguvizela kota ayu ndo mwana wa hetwe na nakapondigwa yohambe yalole. 21 Ila nakaweza ndaze kulola, hatuvizelele, kahi hatumzelele yamgubule meho. Mumuuze heye yuye, heye sambi kakula, kanguweza kilewela." 22 Mhaza wa heye na mayake nawalonga ahyo kwa kuwadumba vilongozi wa Wayahudi kwa vila vilongozi awo nawali wehanyise kota munhu yoneche hoyokunda kota Yesu ndo Kilistu kowinjigwa kuli sunagogi. 23 Ahyo mhaza wa heye na mayake nawalonga, "Heye kakula sambi, mumuuze."

24 Lelo, nawamchema kahi yula munhu yawele nayali yohambe yalole, nawamlonjela, "Ulonje kukomya hali Nguluwi wa hegwe! Hetwe twanguvizela kota munhu ayu ndo yawele na gehile." 25 Heye nakawedichila, "Wone yawele na gehile heni sivizelele. Ila mbuli yondiizelele kota nandali yohambe yalole na sambi ndangulola." 26 Lelo, nawamuuza, "Nakakuditila choni? Nakagagubula ndaze meho ga hegwe?" 27 Ayo munhu nakawedichila, "Nandiwalonjela, namwe hamunyhulichize, lekachoni mwangugana kuhulika kahi? Ndaze, hemwe namwe mwangugana muwe walanguswa wa heye?" 28 Ila hewo nawamliga wolonga, "Hegwe kwa mlanguswa wa heye, hetwe twa walanguswa wa Musa. 29 Hetwe twanguvizela kota Nguluwi nakalonga na Musa, ila munhu ayu hatuvizelele nakalawa kohi!" 30 Naye nakawedichila, "Ayi ndo mbuli ya kububuwaza! Hemwe hamvizelele nakalawa kohi, ila nakagubula meho ga heni! 31 Twanguvizela kota Nguluwi hambe yawahulichize wanhu wawele na gehile, ila kamhulichizaga yoneche yalingumdumba na kweneza igano lya heye. 32 Kulawila mwaluko wa isi hatuhuliche kota munhu nakagagubula meho ga munhu yawele nakapondigwa yohambe yalole. 33 Wone ayu munhu halawile kwa Nguluwi, hayaliweza kudita choneche!" 34 Hewo nawamwidichila, "Hegwe nakupondigwa na kulolelwa kuli gehile, kwanguweza ndaze kutulangusa hetwe?" Lelo, nawamuwinga kuli sunagogi.

35 Yesu nakahulika kota yula yawele yohambe yalole nakawinjigwa kuli sunagogi. Lelo, loyamfichile nakamuuza, "Ndaze, kwangumkunda Mwana wa munhu?" 36 Yula munhu nakedichila, "Mkulu, ndonjele heye ka whaani, leka ndimkunde." 37 Yesu nakamlonjela, "Nakumona, naye ndo yalingulongasa na hegwe sambi." 38 Lelo, yula munhu nakalonga, "Mkulu, ndangukunda!" Nakafugama.

39 Yesu nakalonga, "Heni nambuya kuli isi kutagusa, leka wohambe walole, walole, nawo walingulola wawe wohambe walole." 40 Mafalisayo wamwe wawele hamwe na heye nawahulika ulonzi awo, nawamuuza, "Ndaze, hetwe natwe hambe tulole?" 41 Yesu nakedichila, "Wone mwahawele mohambe mlole, hamwali kuwa na nongwa ya gehile, ila lelo mwangulonga, ‘Twangulola,’ ahyo yangulajila kota mna nongwa."