1 Yesu nakaluta kuli chidunda cha Mizeituni. 2 Mitondo lufuku, Yesu nakaluta kahi kuli ng'handa ya Nguluwi. Wanhu weng'ha nawamlutila, naye nakekalisa na kwaluka kuwalangusa. 3 Walangusa wa malajizo ga Musa na Mafalisayo nawamigala mdala yawele nawamibata yodita ung'hondwa. Namuwika hagati ha wanhu weng'ha. 4 Hamba nawamlonjela Yesu, "Mlangusa! Mdala ayu nakafichigwa yodita ung'hondwa. 5 Kuli malajizo, Musa nakalajiza mdala kota ayu kanguganigwa yatowigwe na maganga mbaka yabagame. Lelo, hegwe kwangulonga ndaze?" 6 Nawalonga ayo kumjeza Yesu, leka wapate mbuli ya kumlonjeleza. Ila Yesu nakenamiza, nakandika hasi kwa chidole. 7 Lowalutile kumuuza Yesu nakenuka, nakawalonjela, "Yalihela gehile hali hemwe yawe wa mwaluko kumtowa na iganga." 8 Hamba nakenamiza kahi, nakwandika hasi. 9 Lowahuliche ago, nawaluka kuka yumweyumwe, nawaluka wasekulu. Yesu nakapona yaliyeka na ayula mdala yemile bahala. 10 Yesu loyenuche nakamuuza yula mdala, "Wakohi wala wanhu? Ndaze, haduhu ne yumwe yakutaguse?" 11 Ayo mdala nakedichila, "Mkulu haduhu ne yumwe!" Yesu nakamlonjela, "Nani sikutagusa. Ulute, kulawila sambi uleche kudita kahi gehile."

12 Hamba Yesu nakalonga nawo kahi, "Heni nda lumuli lwa isi. Munhu yoneche yombinza hojenda kuli jiza mazuwa gose, ila kowa na lumuli lwa ukomu."

13 Lelo, Mafalisayo nawamlonjela, "ulolezi wa hegwe hambe ukundigwe kwa vila kwangulavya ulolezi ulingukuwala gwegwe." 14 Yesu nakawedichila, "Hanga ndangulavya ulolezi ulinguwala heni, ulolezi wa heni ndo wa kukomya kwa vila ndanguvizela kondilawile na kondilinguluta. Ila hemwe hamvizelele kondawile na kondiluta. 15 Hemwe mwangutagusa kwa kuwinza mbuli za lukuli, ila heni hambe ndimtaguse munhu. 16 Hanga ndokutagusa, utaguso wa heni ndo wa kukomya kwa vila heni siwele ndiliyeka, Mhaza yandajize ka hamwe na heni. 17 Nayandichigwa kuli malajizo ga hemwe kota ulolezi wa wanhu weli ndo wa kukomya. 18 Ndangulavya ulolezi kuwala heni, naye Mhaza yandajize, kangulavya ulolezi kuwala heni." 19 Aho nawamuuza, "Mhaza wa hegwe kakohi?" Yesu nakawedichila, "Hemwe hamnzelele heni ne Mhaza. Wone namnzelele heni, mwahamzelele na Mhaza wa heni."

20 Yesu nakalonga ulonzi awo loyawele yolangusa kuli chihengo cha ng'hano kuli Ng'handa ya Nguluwi. Ila haduhu munhu yamibate kwa vila mhela wake nawali haunafika.

21 Yesu nakawalonjela kahi, "Ndanguluta namwe momhala, ila mobagama kuli gehile ga hemwe. Kondiluta, hemwe hamuweza kufika." 22 Lelo, vilongozi wa Wayahudi nawalonga, "Ndaze, kochikopola! Lekachoni kangulonga, ‘Kondiluta hemwe hamuweza kufika?’ " 23 Yesu nakawalonjela, "Hemwe namlawa baha hasi, heni nandawa kuchanya, hemwe ndo wa isi, heni siwele wa isi. 24 Ahyo nandiwalonjela kota mobagama kuli gehile ga hemwe. Wone hamkunda kota ‘Heni ndo Yula,’ mobagama kuli gehile ga hemwe." 25 Nawo nawamuuza, "Hegwe kwa whaani?" Yesu nakawedichila, "Nandiwalonjela kulawa mwaluko! 26 Ndina mbuli nyinji za kulonga kuwala hemwe. Ila heye yandajize ndo wa kukomya, nani ndanguilonjela isi mbuli zila zonyhuliche kulawa kwa heye."

27 Hawavizelele kota Yesu nayali yolonga na hewo kuwala Mhaza. 28 Lelo, Yesu nakawalonjela, "Hommwinula Mwana wa munhu, aho ndo movizela kota, ‘Heni ndo yula ndonjile kota hambe ndite mbuli yoneche ndiliyeka ila ndangulonga gala gawele Mhaza wa heni nakandangusa. 29 Yula yandajize ka hamwe na heni, heye handechile ndiliyeka kwa vila mazuwa gose ndangudita gala galingumnojeza.’ " 30 Loyalonjile ago wanhu wenji nawamkunda.

31 Yesu nakawalonjela wala Wayahudi wamkundile, "Wone mogakunda malajizo ga heni mowa walanguswa wa heni wa kukomya. 32 Ahyo movizela kukomya, nako kukomya kowapa hemwe kilejeha." 33 Nawo nawamwidichila, "Hetwe ndo walelwa wa Abulahamu na hatuwele vitumagwa wa munhu yoneche. Lekachoni kwangulonga, ‘Mowa milejehe?’ " 34 Yesu nakawedichila, "Ndikomya ndanguwalonjela, chila munhu yalingudita gehile ka chitumagwa wa gehile. 35 Chitumagwa hambe yawazigwe kuli ivyazi mazuwa gose, ila mwana kanguwazigwa kota yumwe wa lukolo mazuwa gose. 36 Wone Mwana kowapa kilejeha mowa na kilejeha ng'hatu. 37 Ndanguvizela kota hemwe mwa ivyazi lya Abulahamu. Ila mwangugana kung'hopola kwa vila hambe mgakunde malanguso ga heni. 38 Ndangulonga gala goyandajile Mhaza, ila hemwe mwangudita gala goyawalonjele mhaza wa hemwe."

39 Hewo nawamwidichila, "Hetwe twa wana wa Abulahamu." Yesu nakawalonjela, "Wone hemwe namuwe wana wa Abulahamu, mwahaditile kota vyoyaditile Abulahamu. 40 Nandiwalonjela kukomya kondikuhuliche kwa Nguluwi, lelo, hemwe mwangugana kung'hopola. Abulahamu haditile ahyo! 41 Hemwe mwangudita mbuli zizila zoyaditile mhaza wa hemwe." Hewo nawamlonjela, "Hetwe hatuwele nahatupondigwe kwa ung'hondwa! Twanaye mhaza yumwe hela, yawele ndo Nguluwi." 42 Yesu nakawalonjela, "Wone Nguluwi nayawele Mhaza wa hemwe, mwahanganile, kwa vila nandawa kwa Nguluwi na sambi nda hano. Suyile kwa ludali lwa heni ila heye yandajize. 43 Lekachoni hambe mvizele gondilonga? Kwa vila hambe mhulichize usenga wa heni. 44 Hemwe mwa wana wa mhaza wa hemwe, Limazoga, namwe mwangugana kweneza choyogana mhaza wa hemwe. Heye nayali yalingukopola kulawa mwaluko, hehanzile na kukomya kwa vila kuduhu kukomya mgati mwa heye. Hoyolonga udesi kangulongaga gawele ga heye yuye kwa vila heye ka mdesi na ndo mhaza wa udesi. 45 Heni ndangulonga kukomya, acho ndo chiwalo hemwe hambe mng'hunde. 46 Whaani hali hemwe yoweza kutawiza kota ndina gehile? Wone ndangulonga kukomya, lekachoni hambe mng'hunde? 47 Yawele wa Nguluwi kanguhulichizaga ulonzi wa Nguluwi. Ila hemwe hambe mhulichize kwa vila hamuwele wanhu wa Nguluwi."

48 Wayahudi nawamlonjela Yesu, "Ndaze, hatulonjile kukomya kota hegwe kwa Msamalia na kuna limazoga?" 49 Yesu nakawedichila, "Ndahela limazoga, ndangumhulichiza Mhaza wa heni, ila hemwe mwangumbeza heni. 50 Heni hambe mhale welile wa heni, ka baho yumwe yalingupala welile awo, naye ndo mtagusa. 51 Ndikomya ndanguwalonjela, yalinguhulichiza ulonzi wa heni hobagama mazuwa gose." 52 Lelo, Wayahudi nawalonga, "Lelo natuvizela kota kuna limazoga! Abulahamu nakabagama na waloli nawo nawabagama, hegwe kwangulonga, ‘Yalinguhulichiza ulonzi wa heni hobagama mazuwa gose!’ 53 Ndaze, hegwe kwa mng'hangala kusinda Mhaza wa hetwe Abulahamu yawele nakabagama? Mbaka waloli nawo nawabagama. Hegwe kwangidita kwa whaani?" 54 Yesu nakawedichila, "Wone ndochitogola nene, welile wa heni wowa wa hihi hela. Mhaza wa heni yawele hemwe mwangulonga ndo Mhaza wa hemwe, ndo yalingunhogola. 55 Hemwe hamzelele, ila heni ndangumzela. Wone ndonje hambe ndimzele, ndowa mdesi kota hemwe. Heni ndangumzela na ndanguhulichiza ulonzi wa heye. 56 Mhaza wa hemwe Abulahamu nakatowa luchenze kuno yochitumbila kulyona zuwa lya kuya kwa heni na mhela loyaliwene nakasangalala." 57 Lelo, Wayahudi nawamlonjela, "Hegwe naung'hali fika miyaka makumi gahano, kwangulonga nakumona Abulahamu?" 58 Yesu nakawalonjela, "Ndikomya ndanguwalonjela, kung'hali Abulahamu kupondigwa, heni nandali baho" 59 Aho nawalokota maganga leka wamtowe, ila Yesu nakevisa, nakalawa kuli Ng'handa ya Nguluwi.