1 Nakwali na munhu yumwe yawele Myahudi, wa chilundo cha Mafalisayo, itagwa lyake lyali Nikodemo. 2 Zuwa limwe nakaluta kwa Yesu nechilo na kumlonjela, "Mlangusa, twanguvizela kota hegwe ndo mlangusa yalajizwe na Nguluwi, kwa vila kuduhu munhu yalinguweza kudita vinduzanduza vyoyalingudita Nguluwi wone hawele na heye."

3 Yesu nakamlonjela, "Ndikomya ndangukulonjela, haduhu munhu yoweza kuwona Undewa wa Nguluwi wone hopondigwa lwa keli." 4 Nikodemo nakamuuza, "Munhu mkulu koweza ndaze kupondigwa kahi? Hambe yaweze kwinjila mmunda mwa mayake na kupondigwa kahi!" 5 Yesu nakamwdichila, "Ndikomya ndangukulonjela, wone munhu hapondigwe kwa mazi na muhe, howeza kwinjila kuli Undewa wa Nguluwi. 6 Munhu kangupondigwa lukuli kwa mhaza wa heye na mayake, ila kangupondigwa muhe kwa Muhe. 7 Uleche kijesa vyondikulonjele kota kwanguganigwa kupondigwa lwa keli. 8 Mbeho yanguputaga kulutila koilingugana, kohulika lizi lyake, ila hauvizelele koulawile ne kouluta. Ahi ndo vyoili kwa munhu yapondigwe kwa Muhe."

9 Nikodemo nakamuuza, "Mbuli azi zowa ndaze?" 10 Yesu nakamwidichila, "Ndaze, hegwe kwa mlangusa kuli Isilaeli, ila hauzizelele mbuli azi? 11 Ndikomya ndangukulonjela, twangulonga gala tugazelele na twangulonga ulolezi wa gala tugawene, ila hemwe wanhu hambe mkunde usenga wa hetwe. 12 Wone hamkundile hondiwalonjele mbuli za kuli isi, moweza kukunda hondiwalonjela mbuli za kilanga? 13 Haduhu munhu yalutile kilanga ila Mwana wa munhu, yawele nakadulika kulawa kilanga."

14 Kota vila Musa vyoyalinule izoka lya shaba kula kugunuche, hiho du Mwana wa munhu kokwinuligwa kuchanya, 15 leka chila yalingukunda yawe na ukomu wa mazuwa gose. 16 Kwa vila Nguluwi nakaigana isi mbaka nakamlavya Mwanage wa udewele, leka chila yomkunda yaleche kwajilila, ila yawe na ukomu wa mazuwa gose. 17 Kwa vila Nguluwi hamlajize Mwanage kuli isi leka yaitaguse isi, ila nakamigala leka yaigombole.

18 "Yalingumkunda Mwana hambe yatagusigwe, yohambe yamkunde katagusigwa, kwa vila haumkundile Mwana wa udewele wa Nguluwi. 19 Utaguso awo ndo awu. Lumuli naluya kuli isi yeng'ha ila wanhu nawaligana jiza kusinda lumuli, kwa vila madito gawo ndo gehile. 20 Chila munhu yalingudita gehile kangululema lumuli, kwa vila hambe yagane madito ga heye gehile gawe hazelu. 21 Ila yalingudita ga kukomya kanguyaga kuli lumuli, leka madito ga heye goneche kota nagaditigwa kwa kumhulichiza Nguluwi."

22 Hamba, Yesu nakafika kuli mkowa wa Yudeya hamwe na walanguswa wa heye. Nakekala ako hamwe na hewo kwa mhela, yowabatiza wanhu. 23 Yohani naye nayali yobatiza wanhu ako Ainoni, habehi na Salemu, kwa vila ako nakwali na mazi menji. Wanhu nawaluta kwa heye, naye nakawabatiza. 24 Mhela awo Yohani nayali hanawichigwa mchinweng'ho.

25 Kitwanza nakulawila hali walanguswa wa Yohani na Myahudi yumwe kuwala chihendo cha kihovuga kwa chiwalo cha kumfugamila Nguluwi. 26 Lelo, walanguswa awo nawaluta kwa Yohani na kumlonjela, "Mlangusa, yula munhu yawele hamwe na hegwe kumwambu mwa lwanda lwa Yolodani, yawele nakumlonjela mbuli za heye, sambi kangubatiza na wanhu weng'ha wanguluta kwa heye!" 27 Yohani nakamlonjela, "Munhu howeza kuwa na chinhu wone hapegwe na Nguluwi. 28 Namwe moweza kulavya ulolezi kota nandonga, ‘Heni siwele Kilistu, ila nandajizwa leka ndimlongole!’ 29 Yalinguhesigwa ndo wa mkasano, ila goloko wa mkasano, yalingwima habehi na kuhulichiza, kangusangalalaga ng'hatu hala hoyomhulika mkasano yolonga. Kwa chiwalo achi, usangalalo wa heni nawenela. 30 Yangumgana heye yalutilile kuwa mkulu, nani ndiwe mdodo."

31 Yalinguya kulawa kilanga ndo ka mkulu kusinda weng'ha, yalingulawa kuli isi ndo wa isi na kangulongaga mbuli za isi. Ila yalinguya kulawa kilanga ndo mkulu kusinda weng'ha. 32 Heye kalongaga gala goyagawene na kugahulika, ila haduhu munhu yalinguukunda usenga wa heye. 33 Ila munhu yoneche yalingukunda usenga wa heye kangutawizaga kota Nguluwi ndo wakukomya. 34 Yula yalajizwe na Nguluwi kangulongaga ulonzi wa Nguluwi, kwa vila Nguluwi kangummemezaga munhu ayo Muhe wa heye. 35 Mhaza kangumgana Mwana wa heye na nakampa vinhu vyeng'ha kuli moko ga heye. 36 Yalingumkunda Mwana kanawo ukomu wa mazuwa gose, yohambe yamkunde Mwana howa na ukomu wa mazuwa gose, ila kuzudila kwa Nguluwi kowa mchanya mwa heye.