1 "Nandiwalonjela ago leka mleche kugaleka makundo ga hemwe. 2 Wanhu wowawinga hemwe kuli masunagogi ga hewo. Kahi, mhela wanguya uwele chila hoyowakopola hemwe kochijesa kota kangumkolela mijito Nguluwi. 3 Wowaditila mbuli azo kwa vila hawamzelele Mhaza ne kunzela heni. 4 Lelo, nandiwalonjela mbuli azi leka mhela wa heye houfika mkumbuchile kota nandiwalonjela. Siwalonjele mbuli azo kulawila mwaluko kwa vila nandali hamwe na hemwe.

5 "Ila sambi ndanguluta kwa heye yandajize, haduhu ne yumwe wa hemwe yalingumbuza, ‘Kwanguluta kohi?’ 6 Kwa vila ndiwalonjela mbuli azi nammema masinzo kuli nhumbula za hemwe. 7 Ila, ndanguwalonjela ndikomya, fola heni mbuche, kwa vila wone silutile Mtanzi hokuya kwa hemwe. Ila wone ndute, ndomlajiza yoye kwa hemwe. 8 Naye hoyokuya kowalajila wanhu wa kuli isi kota nawadita vibi kuwala gehile na hachi na utaguso wa Nguluwi. 9 Nawadita vibi kuwala gehile kwa vila hambe wang'hunde, 10 kuwala hachi, kwa vila ndanguluta kwa Mhaza, namwe hambona kahi, 11 kuwala utaguso, kwa vila chilongozi wa isi ayi mana nakatagusigwa.

12 "Ndanazo mbuli nyinji za kuwalonjela, ila sambi hamuweza kwimilila. 13 Ila hoyokuya ayo Muhe wa kukomya kowalongoza kuli kukomya, kwa vila holonga kwa ludali lwa heye yuye, ila kolonga gala goyohulika na kuwazelesa mbuli zilinguya. 14 Heye konhogola kwa vila kogahola gawele ga heni na kuwazelesa hemwe. 15 Vyeng'ha vyoyawelenavyo Mhaza ndo vya heni, kwa chiwalo achi nandonga kota ayo Muhe kogahola gawele ga heni na kuwazelesa hemwe.

16 "Ung'hali mhela uchefu namwe hammbona na loukola mhela uchefu mombona kahi." 17 Wamwe walanguswa wa heye naweuza, "Kana mana yachi hoyotulonjela, ‘Ung'hali mhela uchefu hammbona na houkola mhela uchefu mombona kahi?’ Kahi kangulonga, ‘Kwa vila ndanguluta kwa Mhaza!’ " 18 Lelo, nawali wochiuza, "Kana mana yachi hoyolonga, ‘Ung'hali mhela uchefu?’ Hatuvizelele choyolonga." 19 Yesu nakavizela kota wangugana kumuuza, lelo nakawalonjela, "Mwangiuza kuwala gala gondonjile, ‘Ung'hali mhela uchefu hammbona na houkola mhela uchefu mombona kahi?’ 20 Ndanguwalonjela kukomya, hemwe molila na kulombocheza, ila isi yosangalala, mowa na masinzo ila masinzo ga hemwe gogaluka kusangalala. 21 Mhela wa kuponda kwa mamo kanguwaga na masinzo kwa vila mhela wa usungu naufika, ila hoyoponda hambe yaukumbuchile kahi usungu awo kwa chiwalo cha kusangalala kwa kupondigwa kwa munhu kuli isi. 22 Sambi namwe muna masinzo, ila ndokuya kwa hemwe kahi, namwe mowa na usangalalo mnhumbula za hemwe na usangalalo awo haduhu munhu yowusa kwa hemwe. 23 Zuwa alyo hamlanda choneche kwa heni. Ndikomya ndanguwalonjela, choneche chomlanda kwa Mhaza kwa itagwa lya heni, kowapa. 24 Mbaka sambi hamlandile choneche kwa itagwa lya heni. Mlande namwe mopegwa leka usangalalo wa hemwe wenele.

25 "Nandiwalonjela mbuli azo kwa nhelo. Ila mhela wanguya uwele silonga na hemwe kahi kwa nhelo, ila ndowalonjela hazelu kuwala Mhaza. 26 Zuwa alyo molanda kwa itagwa lya heni, hambe ndiwalonjele kota ndomlanda Mhaza kwa chiwalo cha hemwe, 27 kwa vila heye yuye kanguwagana hemwe, kwa vila hemwe namngana heni na kukunda kota nandawa kwa Nguluwi. 28 Heni nandawa kwa Mhaza, nambuya kuli isi na sambi ndanguileka isi na kuhiluka kwa Mhaza."

29 Walanguswa wa heye nawamlonjela, "Lelo kwangulonga hazelu ne kulonga kwa nhelo. 30 Lelo twanguvizela kota hegwe kwanguvizela chila chinhu na hambe uganigwe kuuzigwa na munhu yoneche, ahyo twangukunda kota nakulawa kwa Nguluwi."

31 Yesu nakawedichila, "Ndaze, mwangukunda sambi? 32 Mhela wanguya, kahi naufika, uwele hemwe weng'ha mosambalulwa chila yumwe kwa heye, nani ndolechigwa ndiliyeka. Ila heni siwele ndiliyeka, kwa vila Mhaza ka hamwe na heni. 33 Ndanguwalonjela mbuli azi leka muwe na kikala goya kuli kilumba na heni. Kuli isi motunyigwa, ila mikangaze nhumbula! Heni nandiisumya isi!"