1 Zuwa lya kadatu nakwali na mnvina ya kuhesa kuli muji wa Kana, kuli mkowa wa Galilaya. Mayake Yesu nayali baho, 2 naye Yesu nayali yalalikwe kuli mnvina ayo hamwe na walanguswa wa heye. 3 Divai loimalile, mayake Yesu nakamlonjela mwanage, "Wahela divai." 4 Yesu nakamwidichila mayake, "Mamo uleche kundonjela cha kudita kwa vila mhela wa heni ung'hali."

5 Aho mayake Yesu nakawalonjela walingukola mijito, "Choneche choyowalonjela, mkole."

6 Aho nakwali na mibiga sita ja maganga, jiwele chila ibiga limwe nalyali lyanguweza kuwika madebe meli ama gadatu. Najali jiwichigwe aho kwa kiwhana na chihendo cha Wayahudi cha kihovuga. 7 Yesu nakawalonjela wala wakola mijito, "Mjele mazi kuli mibiga ajo mbaka jimeme." Nawo nawajimemeza mbaka najimema. 8 Hamba nakawalonjela, "Lelo mdehe mumgalile chilongozi wa mvina." 9 Mkulu wa mnvina loyajezile ago mazi, hambe nagali gagaluche na kuwa divai. Heye havizelele koilawile, ila wala wakola mijito wawele nawadeha gala mazi nawavizela. Chilongozi wa mvina nakamchema mkasano, 10 nakamlonjela, "Chila munhu kanguwikaga divai inojile ilongole, hamba ndo kangulavya yila yihile. Ila hegwe nakuwika divai inojile mbaka sambi!"

11 Yesu nakadita ulajilo awu wa mwaluko ako Kana kuli mkowa wa Galilaya. Nakalajila welile wa heye nawo walanguswa wa heye nawamkunda.

12 Logakolile ago, Yesu nakadulika hamwe na mayake na wang'holoze na walanguswa wa heye mbaka Kapanaumu, kula nawekala kwa mazuwa mado.

13 Mnvina ya Pasaka ya Wayahudi loiwele habehi, ahyo Yesu nakaluta Yelusalemu. 14 Lelo nakawafika wanhu kuli Ng'handa ya Nguluwi woguza misenga na ming'holo na ng'hunda na wanhu wanji nawali wovunza sendi wekale kuli visaga vya hewo. Munhu yawele yovunza sendi Munhu yawele yovunza sendi 15 Nakabota ng'hobwa ya ngozi, nakawawinga wanhu weng'ha kuli nonhu ha ng'handa ya Nguluwi hamwe na misenga na ming'holo jawo, nakavigwisa visaga vya wala walinguvunza sendi na kuboholanga sendi zawo. 16 Nakawalonjela walinguguza ng'hunda, "Muse vinhu avi hano. Mleche kuidita soko ng'handa ya Mhaza wa heni!" 17 Walanguswa wa heye nawakumbuchila kota Maandiko Matakatifu gangulonga, "Maya ga heni kwa ng'handa ya hegwe wong'hopola."

18 Wayahudi wamwe nawamuuza Yesu, "Kodita chinduzanduza chachi leka kulajila kota kwanayo hachi ya kudita aga?" 19 Yesu nakawedichila, "Muibene ayi ng'handa ya Nguluwi, nani ndoizenga kwa mazuwa gadatu." 20 Aho Wayahudi nawalonga, "Ayi Ng'handa ya Nguluwi naizenjigwa kwa mhela wa miyaka makumi gane na sita. Ndaze, hegwe koizenga kwa mazuwa gadatu hela?"

21 Ila Yesu nayali yolonga kuwala ng'anda ya Nguluwi iwele ndo lukuli lwake. 22 Lelo, loyazilpuche kulawa kwa wabagame, walanguswa wa heye nawakumbuchila kota nayali yalonjile ago, Nawagakunda Maandiko Matakatifu na wula ulonzi uwele Yesu nakalonga.

23 Yesu loyawele Yelusalemu kwa chiwalo cha mnvina ya Pasaka, wanhu wenji nawamkunda lowawene ulajilo loyauditile. 24 Ila Yesu hawele na makundo na hewo kwa vila nakawazela weng'ha. 25 Nahaganile kulonjelwa choneche kuwala munhu, kwa vila nakagazela geng'ha gawele mgati mwa nhumbula za hewo.