1 Yesu nakawalonjela, "Mleche kudeula mnhumbula za hemwe. Mumkunde Nguluwi na mng'hunde heni. 2 Kaye kwa Mhaza wa heni hana honhu hakulu ha kikala, wone haiwele ahyo, ndahawalonjele. Lelo ndanguluta kuwawichila goya honhu ha kikala. 3 Wone ndute kuwawichila goya honhu ha kikala, ndohiluka na kuwahola, leka namwe muwe hala hondili. 4 Mwanguizela nzila ya kuluta ako kondiluta."

5 Tomasi nakamuuza, "Mkulu, hatukuzelele kouluta, lelo, toizela ndaze nzila ayo?" 6 Yesu nakamwidichila, "Heni ndo nzila na kukomya na ukomu. Haduhu yalinguweza kuluta kwa Mhaza ila kwa kukolela kwa heni. 7 Wone mwangunzela, mwangumzela na Mhaza wa heni. Kulawila sambi mwangumzela, kahi nammona."

8 Filipo nakamlonjela, "Mkulu, utulajile ayo Mhaza, acho ndo tulinguchigana." 9 Yesu nakamlonjela, "Nandikala na hemwe mhela weng'ha awu, nagwe Filipo haunzelele? Yambwene heni nakamona Mhaza. Kwanguweza ndaze kulonga, ‘Tulajile Mhaza?’ 10 Ndaze, hambe ukunde kota heni nda mgati mwa Mhaza, naye Mhaza ka mgati mwa heni? Ulonzi wondilinguwalonjela hambe ndonje kwa ludali lwa heni, Mhaza yawele mgati mwa heni kangukola mijito jake. 11 Mwanguganigwa mng'hunde hondilonga kota heni nda mgati mwa Mhaza naye Mhaza ka mgati mwa heni. Wone haiwele ahyo, mkunde kwa chiwalo cha mbuli zondilingudita. 12 Ndikomya ndanguwalonjela, yalingung'hunda kodita mbuli zondilingudita heni, ena, kodita mbaka mbuli ng'hulu ng'hatu, kwa vila ndanguluta kwa Mhaza. 13 Choneche chomlanda kwa itagwa lya heni ndodita, leka Mhaza yapegwe ukulu mgati mwa Mwana. 14 Wone mlande chinhu choneche kwa itagwa lya heni, ndowaditila.

15 "Wone mwangungana, mojiwinza mizilo ja heni. 16 Nani ndomlanda Mhaza naye kowapa hemwe Mtanzi yunji, yawele yochikala na hemwe mazuwa gose. 17 Heye ndo Muhe wa kukomya. Isi haiweza kumbochela kwa vila haiweza kumona ne kumzela. Ila hemwe mwangumzela kwa vila ka hamwe na hemwe na ka mgati mwa hemwe.

18 "Siwaleka muwe walekwa, ndokuya kahi kwa hemwe. 19 Naupona mhela uchefu nayo isi haimbona kahi, ila hemwe mombona, kwa vila heni nda mkomu, namwe mowa wakomu. 20 Zuwa lila holifika movizela kota heni nda mgati mwa Mhaza, namwe mwa mgati mwa heni, nani nda mgati mwa hemwe. 21 Yalingujibochela mizilo ja heni na kujiwinza, heye ndo yalingungana. Naye yalingungana koganigwa na Mhaza wa heni, nani ndomgana na kilajila kwa heye."

22 Yudasi hawele yula Yudasi Isikalioti nakalonga, "Mkulu, yowa ndaze hegwe kilajila kwa heye na haiwele kwa isi?" 23 Yesu nakamwidichila, "Wone munhu yangane kohulichiza ulonzi wa heni, Mhaza wa heni komgana, natwe tokuya kwa heye na kikala. 24 Yohambe yangane halinguhulichiza ulonzi wa heni. Ulonzi womuhuliche hauwele wa heni, ila wa Mhaza yandajize.

25 "Nandiwalonjela mbuli azi mhela honding'hali hamwe na hemwe, 26 ila mtanzi, Muhe Yelile, yawele Mhaza komlajiza kwa itagwa lya heni, kowalangusa chila chinhu na kuwadita mkumbuchile chila chinhu chondiwalonjele.

27 "Ndanguwalechela kikala goya, ndanguwapa kikala goya kwa heni. Hambe ndiwape hemwe kota hila isi vyoilingudita. Mleche kuwa na lunhwinhwi ne kudeula. 28 Namuhulika ndiwalonjele, ‘Ndanguluta, hamba ndokuya kahi kwa hemwe.’ Wone mwahanganile, mwahasangalale kwa vila ndanguluta kwa Mhaza, kwa vila heye ndo mkulu kusinda heni. 29 Nandiwalonjela aga sambi kung'hali haganalawila, leka hogolawila mkunde. 30 Silonga na hemwe kahi mbuli nyinji, kwa vila chilongozi wa isi ayi kanguya. Kwa heni howeza chinhu, 31 ila isi yanguganigwa ivizele kota ndangumgana Mhaza, nani ndangudita gala Mhaza goyandajize. Mwime, tulawe hano!