1 Mkulu Teofili kuli chitabu cha heni cha mwaluko nanyandika kuwala mbuli zeng'ha Yesu zoyaditile na kulangusa kulawila mwaluko wa mijito ja heye 2 mbaka zuwa lila loyaholigwe kilanga. Kung'hali hanaholigwa kilanga nakawalajiza kwa ludali lwa Muhe Yelile wala watumigwa loyawahagule. 3 Kwa mhela wa mazuwa makumi gane kulawila hoyabagame nakawalawila mala nyinji kulajila kota ka mkomu. Nawamona, naye nakalongasa na hewo kuwala undewa wa Nguluwi. 4 Mhela loyeting'hane na hewo nakawalonjela hino, "Mleche kuka Yelusalemu, ila mbeteze ilagano lyoyawalonjele Mhaza, liwele namnyhulika ndilonga kuwala alyo. 5 Yohani nakabatiza kwa mazi, ila logopuluta mazuwa mado, hemwe mobatizigwa kwa Muhe Yelile."

6 Watumigwa loweting'hane na Yesu, nawamuuza, "Mkulu, ndaze, mhela awu ndo kohilusa undewa kwa Isilaeli?" 7 Ila Yesu nakawalonjela, "Mhela wa mbuli azo vya kuli ludali lwa Mhaza wa heni, hambe iwagane kuvizela kota yowa nili. 8 Ila mhela Muhe Yelile hoyowadulichila, mobochela mong'ho na mowa walolezi wa heni kuli Yelusalemu, kuli mkowa wa Yudeya na Samaliya na mbaka kuli kuduma kwa isi." 9 Loyalonjile ago kuno weng'ha womlola, nakaholigwa kilanga, ng'hungugu naimvisa leka waleche kumona kahi.

10 Lowawele wang'hali wolola kilanga, loyawele yoluta, baho du wanhu weli wawele wavalile nguwo nzelu nawema habehi na hewo, 11 nawalonga, "Hemwe wanhu wa Galilaya! Ndaze namwima kuno mwangulola kilanga? Yesu yawele nakaholigwa kulawa kwa hemwe kuluta kilanga, kokuya kahi kota hihyo vyommuwene yoluta kilanga."

12 Hamba watumigwa nawahiluka Yelusalemu kulawa kuli chila chidunda chilinguchemigwa chidunda cha Mizeituni, chiwele kota kilomita imwe kulawa kuli muji. 13 Lowafichile kuli muji nawenjila kuli chihengo cha kuchanya lowawele wochikala, nawo nawali Petili na Yohani na Yakubu na Andeleya na Filipo na Tomasi na Batolomeo na Matei na Yakubu mwana wa Alufayo na Simoni Zelote na Yudasi mwana wa Yakubu. 14 Awa weng'ha naweting'hana kumlanda Nguluwi, hamwe na wadala wamwenga na Maliya mayake Yesu na wang'holoze.

15 Zuwa limwe hamba, Petili nakema hali wala wanhu wawele naweting'hana, weng'ha nawali miya imwe na makumi meli, 16 nakalonga, "Wang'holozangu, naiganigwa honhu ha Maandiko Matakatifu henele, honhu hawele Muhe Yelile, kwa ulonzi wa Daudi, nakalavya uloli kuwala mbuli za Yudasi yawele nakawalongoza wala wamibate Yesu. 17 Yudasi nayali yumwe wa chilundo cha hetwe, kwa vila nakahaguligwa yawe hamwe kuli mijito ya hetwe." 18 Heye nakagula mgunda kwa zila sendi zoyazipatile kwa madito ga heye gehile, nakagwa na kutulika lida, vyeng'ha viwele kuli lida lya heye navilawa kunze. 19 Chila munhu kuli Yelusalemu nakahulika mbuli ayo, ahyo kwa ulonzi wa hewo, nawauchema wula mgunda "Hakeli Dama," ulonzi awu una mana ya, "Mgunda wa danda." 20 Petili nakalutilila kulonga, "Lelo nayandichigwa kuli chitabu cha Zabuli,

" ‘Honhu ha kikala ha heye hawe mahame,

munhu yoneche yaleche kikala mgati amo.’

Kahi nayandichigwa,

" ‘Munhu yunji yahole honhu ha heye ha ulongozi.’

21 Lelo, munhu yumwe hali wala welongoze na hetwe mhela weng'ha Yesu loyawele mmajendo hamwe na hetwe yahaguligwe kilumba na hetwe. 22 Ayo kanguganigwa yawe yumwe wa wala welongoze na hetwe kulawila Yohani loyawele yobatiza mbaka zuwa lila Yesu loyaholigwe kulawa kwa hetwe kuluta kilanga. Ayo kowa hamwe na hetwe kulavya ulolezi wa kuzilipuka kwa Yesu."

23 Aho nawachema matagwa ga wanhu weli, wa mwaluko nayali Yusufu yachemigwe Balisaba ama Yusto na wakeli Matiya. 24 Hamba nawamlanda Nguluwi, "Mkulu hegwe kwanguzizela nhumbula za wanhu weng'ha. Ahyo, utulajilile hali awa weli youmhagule, 25 leka yahole honhu ha mijito ja uchitumagwa hoyajilechile Yudasi na kuluta honhu hake yuye." 26 Nawatowa simbi, simbi naimgwila Matiya, naye nakonjezwa hali wala watumigwa wanji kumi na yumwe.