1 Logapulute mazuwa gahano, mtambika mkulu Ananiya nakoya Kaisaliya hamwe na wasekulu wamwe na wakili yumwe yalinguchemigwa Telitulo. Nawaluta kwa chilongozi wa mkowa nawamlonjela ulonjelezi wa hewo kuwala Paoli. 2 Paoli nakachemigwa na Telitulo nakaluka kulavya ulonjelezi yolonga, "Mkulu Felisi, ulongozi wa hegwe unojile nawigala kikala goya na mbuli nyinji zinojile nazikoleka kwa wanhu wa isi ayi kwa chiwalo cha luhala lwa hegwe. 3 Natuibochela mbuli ayi kwa usangalalo mazuwa gose na kulonga malumbo kwa hegwe chila honhu. 4 Ila ne kwajiliza mhela twangukulanda kwa isungu lya hegwe, uhulichize ulonzi wa hetwe uchefu. 5 Natuvizela kota munhu ayu ndo mjuvi, yalingwambuza ivuche hali Wayahudi kuli isi yeng'ha, kahi ka chilongozi wa chilundo cha Wanasaleti. 6 Kahi nakajeza kuiliga ng'handa ya Nguluwi natwe natumibata. Natugana kumtagusa kwa malajizo ga hetwe. 7 Ila Lusia, chilongozi mkulu wa chilundo cha wamizi, nakamhola kwa mong'ho kulawa kuli moko ga hetwe. 8 Hamba nakalonga walingumlonjeleza munhu ayu woye kwa hegwe. Wone komuuza hegwe koweza kuvizela mbuli azi zeng'ha zotulingumlonjeleza." 9 Nawo Wayahudi nawatawiza ago kwa kulonga kota ago geng'ha nagali gakukomya.

10 Hamba Felisi chilongozi wa mkowa nakamha Paoli ulajilo yalonje. Naye Paoli nakalonga, "Ndangusangalala kilewela hali hegwe kuno ndivizela kota hegwe kwa mtagusa wa isi ayi kwa mhela wa miyaka minji. 11 Kwanguweza kuvizela kota hagapulute mazuwa kumi na meli kulawa hala londutile kumfugamila Nguluwi Yelusalemu. 12 Wayahudi hawafichile ndilongasa na munhu yoneche. Hawafichile ndikwambuza ivuche kwa wanhu kuli ng'handa ya Nguluwi ne kuli masunagogi ga hewo ne honhu heni honeche kuli muji awo. 13 Hambe waweze kutawiza kwa hegwe ulonjelezi awu walingulonjeleza kuwala heni. 14 Chondilingukunda hali hegwe ndo achi, heni ndangumfugamila Nguluwi wa wasekulu wa hetwe, ndanguwinza nzila yila iwele hewo wanguichema haiwele nzila ya kukomya. Ndangukunda mbuli zeng'ha zandichigwe kuli vitabu vya malajizo ga waloli. 15 Heni ndangitumbila kwa Nguluwi nawo wanakitumbila ako kota wanhu wanojile na wehile, wozilipuka. 16 Ahyo mazuwa gose ndangikangaza ndiwe na kunuwila kunojile hali Nguluwi na wanhu.

17 "Londikale kutali kwa miyaka minji, nanyiluka Yelusalemu leka ndiwatanze wanhu wa isi ya heni wawele wazunwa na kulavya nhambiko. 18 Mhela londiwele ndidita ago ndo nawafika heni kuli ng'handa ya Nguluwi ndiwele mana nyelizwa. Nakwali haduhu chilundo cha wanhu ne ivuche. 19 Ila nakwali na Wayahudi wamwe kulawa kuli mkowa wa Asiya, awo ndo nawaganigwa wawe hano hali hegwe na kulavya ulonjelezi wa hewo wone wana choneche cha kulonga kuwala heni. 20 Ama, wanhu awa wawele hano walonje ndo wihe wachi wauwene kwa heni mhela lowanyimize hali chitala cha hewo chikulu, 21 ila wowa ulonzi awu wondonjile lonyimile hali hewo, ‘Mwangunhagusa lehano kwa chiwalo cha kibatilila kota wabagame wozilipuka!’ "

22 Aho, Felisi, yawele nayali yoizela goya nzila yila, nakalonga, "Ndolavya utaguso wa nongwa ayi mhela Lusia, chilongozi mkulu wa chilundo cha wamizi, hoyokuya aha." 23 Hamba nakamlonjela chilongozi wa wamizi yamuwiche Paoli hali wamizi, ila yawe na kilejeha hado na goloko wa heye waleche kulemezwa kumha choyalinguganigwa kupegwa kwa chiwalo cha heye.

24 Logamalile mazuwa mado, Felisi nakoya hamwe na mche wa heye yalinguchemigwa Dilusila yawele nayali Myahudi. Nakalajiza Paoli yegaligwe, nakamhulichiza yolonga kuwala kumkunda Yesu Kilistu. 25 Ila mhela Paoli loyaluche kulonga kuwala kutanganika na kuwala kuwa na chasi cha kudita chinhu na kuwala zuwa lya utaguso lilinguya, Felisi nakadumba, nakalonga, "Sambi kwanguweza kuluta, ndokuchema kahi hondilejeha." 26 Mhela awo Felisi nayali yochitumbila kota kopegwa chinhu kwa chinyele na Paoli. Kwa chiwalo acho nayali yomchema Paoli chila mhela na kulongasa na heye.

27 Lojimalile miyaka mili, Polikio Festo nakahola honhu ha Felisi, nakawa chilongozi wa mkowa. Kwa vila nakagana kuganigwa na Wayahudi, Felisi nakamleka Paoli kukula mchinweng'ho.