1 Festo loyafichile kuli mkowa wa Kaisaliya nakekala kwa mazuwa gadatu hamba nakaluta Yelusalemu. 2 Watambika wakulu hamwe na vilongozi wa Wayahudi nawamlonjela Festo kuwala ulonjelezi ulingumuwala Paoli. Nawamdedeza Festo 3 yawaditile igano kwa kumigala Paoli Yelusalemu, nawali wewichile goya kwa uviso kota wamkopole hoyowa mnzila. 4 Ila Festo nakalonga, "Paoli kosigala mchinweng'ho kula Kaisaliya nani ndoluta ako kuli mazuwa gaga. 5 Wamwe wa vilongozi wa hemwe walute ako hamwe na heni wakalavye ulonjelezi kuwala heye wone nakadita choneche chihile."

6 Festo nekekala na hewo kwa mhela wa mazuwa nane ama kumi hino, hamba nakahiluka Kaisaliya. Mitondo yake nakaluta kuli chitala, nakalajiza Paoli yegaligwe mng'handa. 7 Mhela Paoli loyafichile, Wayahudi wawele nawalawa Yelusalemu nawamzunguluta na kwaluka kulavya ulonjelezi winji uwele hawawezile kutawiza. 8 Kwa kilewela, Paoli nakalonga, "Siditile nongwa yoneche ilinguwala malajizo ga Wayahudi ne kuwala ng'handa ya Nguluwi, ne kumuwala Kaizali mndewa mkulu wa Loma."

9 Festo nakagana kulajila igano kwa Wayahudi ahyo nakamuuza Paoli, "Ndaze kwangugana kuluta Yelusalemu na utagusigwe ako hali heni kwa chiwalo cha ulonjelezi awu?" 10 Paoli nakedichila, "Ndangwima hali chitala cha Kaizali mndewa mkulu wa Loma, hano ndo ndanguganigwa kutagusigwa. Kota vyoulinguvizela goya, siwaditile Wayahudi wihe woneche. 11 Lelo, wone nafichigwa na nongwa ilingungana ngazigwe mbaka kubagama, hambe ndande kulechelwa kugazigwa ako. Ila wone ulonjelezi wa hewo hauwele wa kukomya, haduhu yalinguweza kumbika kuli moko ga hewo. Ndangulanda ulonjelezi awu uhilikwe kwa Kaizali mndewa mkulu wa Loma!"

12 Lelo, Festo loyalongase na wakulu wa chitala, nakamlonjela Paoli, "Kulanda ulonjelezi wa hegwe uhilikwe kwa Kaizali, lelo koluta kwa Kaizali mndewa mkulu wa Loma."

13 Mazuwa mado hamba, mndewa Agilipa na Belinike nawafika Kaisaliya leka kumlamsa Festo. 14 Nawali ako mazuwa kwa menji naye Festo nakamlonjela mndewa ulonjelezi wa Paoli, "Hana munhu yumwe hano yawele Felisi nakamleka mchinweng'ho. 15 Londutile Yelusalemu watambika wakulu na wasekulu wa Wayahudi nawamlonjeleza kwa heni na kundanda ndimtaguse. 16 Ila heni nandiwalonjela kota hachiwele chihendo cha Waloma kumlavya munhu yagazigwe kung'hali yawele yalonjelezwe hanating'hana na walingumlonjeleza na kulonjelwa yelewele kuwala awo ulonjelezi. 17 Lelo, lowafichile hano sikawile, ila nandita nhing'hano kuli chitala mitondo yake, nandajiza munhu ayo yegaligwe. 18 Walonjelezi wa heye nawema ila hawalavile ulonjelezi wihile kota vyondili ndijesa. 19 Ila nawali wochitwanza na heye kuwala nzila ya makundo ga hewo na kuwala munhu yumwe yalinguchemigwa Yesu yawele nakabagama, ila Paoli kangulonga kota ka mkomu. 20 Sivizelele kota ndite ndaze kuwala kulavya utaguso wa mbuli ayo. Lelo, nandimuuza Paoli wone kogana kuluta kuli chitala kula Yelusalemu kwa chiwalo cha ulonjelezi awo. 21 Ila Paoli nakalema, nakalanda yasigale mchinweng'ho mbaka londiweza kumhilika kwa Kaizali mndewa mkulu wa Loma." 22 Hamba mndewa Agilipa nakamlonjela Festo, "Nangana kumuhulika munhu ayo nene baha." Festo nakamlonjela, "Komuhulika mitondo."

23 Mitondo, mndewa Agilipa na Belinike nawafika kwa usangalalo kuli chitala wawele welongoze na wakulu wa wamizi na vilongozi wa muji. Festo nakalajiza Paoli yegaligwe, 24 hamba Festo nakalonga, "Mndewa Agilipa na weng'ha muwele hano hamwe na hetwe! Hano kumwando kwa hemwe hana munhu yawele Wayahudi weng'ha wa hano na wa kula Yelusalemu nawang'ung'uta kwa kutowa iyowe kota hambe yaganigwe kikala. 25 Ila heni siwene kota nayali yaditile choneche chihile mbaka yaganigwe kutagusigwa yagazigwe mbaka kubagama. Ila kwa vila Paoli yuye nakalanda ulonjelezi wa heye uhilichigwe kwa Kaizali mndewa mkulu wa Loma, nanyamula kumigala. 26 Kwa heni ndahela mbuli yenele iwele yondita mbeze kumwandichila Kaizali mndewa mkulu wa Loma kuwala heye. Ahyo nandimigala kwa hemwe na hali hegwe mndewa Agilipa, leka hotumhulichiza goya, ndoweza kuwa na lya kukwandichila. 27 Kwa vila kwahela chiwalo cha kumigala mnweng'hwa ne kuwa ulonjelezi ulingumuwala."