1 Munhu yumwe yalinguchemigwa Ananiya na mche wa heye Safila nawaguza mgunda wa hewo. 2 Ila mche wa Ananiya nakavizela kota Ananiya nakavisa chasi cha sendi choyapatile na chasi chiyage nakawapa watumigwa. 3 Lelo, Petili nakamuuza, "Ananiya, lekachoni Limazoga nalinjila kuli nhumbula ya hegwe na kukudita umuhade Muhe Yelile kwa kuvisa honhu ha sendi zoupatile kwa kuguza mgunda? 4 Kung'hali kuuguza nawali wa hegwe na louguzile awo mgunda azo sendi nazali za hegwe ukolele chougana. Lekachoni nakwamula kudita mbuli ayi? Haumuhadile munhu, nakumuhada Nguluwi!" 5 Ananiya loyahuliche ago, nakagwa hasi, nakabagama. Wanhu weng'ha lowahuliche mbuli ayo nawadumba lukami. 6 Wasongolo nawoya, nawaugubika mtufi wa heye, nawaulavya hanze, nawautila.

7 Logamalile masaa gadatu hino, mchewake ne kuvizela mbuli ilawile, nakenjila mla mng'handa. 8 Petili nakamlonjela, "Ndonjele! Ndaze, chasi achi cha sendi ndo chompatile kwa kuguza ula mgunda?" Heye nakamwidichila, "Ena ndo zizo."

9 Aho Petili nakamlonjela, "Lekachoni namikundiza kumhada Muhe wa Mkulu Nguluwi? Uhulichize! Wala wanhu walutile kumtila mlume wa hegwe, sambi wa kuli lwizi na hegwe nagwe wokuhola kahi."

10 Baho du Safila nakagwa hali magulu ga Petili, nakabagama. Wala wasongolo lowenjile, nawamfika yabagame, ahyo nawamlavya mgati, nawamtila habehi na mlume wa heye. 11 Kudumba kukulu nakuchifika chilundo cha wanhu walingumkunda Nguluwi na wanhu weng'ha wahuliche mbuli ayo.

12 Watumigwa nawadita vinduzanduza vinji hali wanhu. Walingumkunda Nguluwi nawali wochiting'hana kuli lugagala lwa Solomoni. 13 Munhu yoneche yawele hamkundile Nguluwi helumbile na hewo hanga wanhu wanji wawele hela makundo ago nawawatogola. 14 Wanhu wamkundile Mkulu Nguluwi wawele ndo walume na wadala nawonjezeka. 15 Mbaka wanhu nawali wowagala watamwa mnzila na kuwawasiliza mchanya mwa vinhanda na nhemvu leka Petili hoyokola, isisila lya heye likole hali hewo. 16 Wanhu wenji nawoya kulawa kuli miji ja hafungo ha Yelusalemu, nawawagala watamwa wa hewo na wawele na vijeni, nawo weng'ha nawoselwa matamwa.

17 Hamba, mtambika mkulu na wayage wawele wa chilundo cha Masadukayo wa honhu aho, nawawonela maya watumigwa. 18 Lelo, nawawabata watumigwa na kuwahindila mchinweng'ho. 19 Ila nechilo mhilisi wa Mkulu Nguluwi nakachumula lwizi ja chinweng'ho, nakawalavya kunze, nakawalonjela, 20 "Mlute na kwima kuli ng'handa ya Nguluwi mkawalonjele wanhu ulonzi weng'ha wa ukomu awu." 21 Watumigwa nawakunda, nawenjila kuli ng'hada ya Nguluwi kung'hali lufuku, nawaluka kulangusa. Mtambika mkulu na wayage lowafichile, nawachema Nhing'hano ng'hulu na wakulu weng'ha wa utaguso na vilongozi wa Wayahudi, hamba nawawalajiza wanhu kuli chinweng'ho leka wakawegale wala watumigwa. 22 Ila awo vitumagwa lowafichile ako hawawafichile mla mchinweng'ho. Ahyo nawahiluka, nawahiluka na kuwalonjela mbuli ayo kuli nhing'hano, 23 wolonga, "Natujifika lwizi ja chinweng'ho jihindigwe chila ubanzi na wamizi wololela lwizi ajo. Ila lotuchumule nahatumfichile munhu yoneche mla mng'handa." 24 Chilongozi wa wamizi wa ng'handa ya Nguluwi na watambika wakulu lowahuliche mbuli ayo nawafichigwa na lunhwinhwi, hawavizelele gawafichile. 25 Nakoya munhu yumwe, nakawalonjela, "Wala wanhu womuhindile mchinhweng'ho, sambi wa kuli ng'handa ya Nguluwi, wanguwalangusa wanhu." 26 Aho chilongozi wa wamizi wa ng'handa ya Nguluwi hamwe na wanhu wa heye nawaluta kuli ng'handa ya Nguluwi, nakawegala. Ila hawawabate kwa lupichi, kwa vila nawadumba wanhu wowatowa na maganga.

27 Lelo, nawawegala, nawawemiza hali Chitala. Mtambika mkulu nakawalonjela, 28 "Natuwalemeza ng'hatu kulangusa kwa itagwa lya munhu ayu, lelo namdita malanguso ga hemwe genele kuli Yelusalemu yeng'ha na mwangunuwila kutuwichila nongwa ya kubagama kwa munhu ayu."

29 Aho Petili, yawele hamwe na wala watumigwa wanji, nakedichila, "Yanguganigwa tumhulichize Nguluwi, haiwele wanhu. 30 Nguluwi wa wasekulu hetwe nakamzilipula Yesu kulawa kwa wabagame, yawele hemwe namumkopola kwa kumuwamba. 31 Ayu ndo yula yatogoligwe na Nguluwi, nakamuwika kuli ubanzi wa heye wa kudilo, nakawa chilongozi na Mlohozi, leka yawadite wanhu wa Isilaeli waleche gehile ga hewo, leka walechelwe gehile ga hewo. 32 Hetwe twa walolezi wa mbuli ayo, naye Muhe Yelile yawele Nguluwi nakawapa wala walingumuhulichiza, kangulavya ulolezi wa mbuli ayo."

33 Vilongozi weng'ha wa chitala lowahuliche ago nawazudila, mbaka nawagana kuwakopola watumigwa. 34 Ila Mfalisayo yumwe yalinguchemigwa Gamalieli yawele nayali mlangusa wa malajizo ga Musa na yalinguhulichizwa ng'hatu hali wanhu weng'ha, nakema hali Chitala, nakagana wala watumigwa walavigwe kunze kwa mhela uchefu. 35 Hamba nakawalonjela wala vilongozi wa Chitala, "Hemwe wanhu wa Isilaeli, mijese ng'hatu chomlingugana kuwadita wanhu awa! 36 Katali hado, nakwali na munhu yumwe itagwa lya Teuda, nakedaya kota heye ndo munhu yatanganiche na wanhu miya zine nawelumba na heye. Ila nakakopoligwa, hamba wala wamuwinzile nawasambaluka na chilundo cha heye nachaga. 37 Kahi, hamba, mhela wula wa kuwazigwa wanhu, nakwali na Yudasi wa Galilaya. Naye nakawakwega wanhu nawo nawamuwinza, ila naye kahi nakakopoligwa na wala wamuwinzile nawasambaluka. 38 Sambi ndanguwalonjela, mleche kuwaditila wanhu awa chinhu choneche, muwaleche! Kwa vila, wone mbuli ayi ama mijito ja hewo najaluchizwa na munhu, jokwaga jiliyeka. 39 Ila wone nayaluchizwa na Nguluwi, haiwele kota molemwa kuwasumya hela, ila mochifika mwangumlema Nguluwi!"

Lelo, nawekundiza na heye. 40 Ahyo nawawachema wala watumigwa, nawamula watowigwe ng'hobwa na kuwalemeza waleche kulangusa kwa itagwa lya Yesu, hamba nawawaleka walute. 41 Lelo, watumigwa nawalawa hanze ha Chitala kuno wasangalale, kwa vila nawaganigwa kubasigwa soni kwa itagwa lya Yesu. 42 Nawalutilila chila zuwa kulangusa na kudamla Mbuli Inojile ya Kilistu kuli ng'handa ya Nguluwi na kuli ng'handa za wanhu.