1 Lotufichile kwa kikala goya kuli isi ng'havu, natuvizela kota chila chihilwa changuchemigwa Malita. 2 Wenyeng'haye wa aho nawali wanojile kwa hetwe. Nhonya nayaluka kutowa kahi nakwali na chipute, ahyo nawabwina chiluli, nawatuchema. 3 Paoli nakalokota mpelo udodo wa ngodi nayali yoziwika kuli chiluli. Ahyo kwachiwalo cha ivuche lya chiluli, izoka nalilawa kuli ngodi na kumnanahila Paoli mmoko. 4 Wenyeng'haye wa hala lowaliwene lila izoka lininila kuli moko wa heye nawelonjela, "Ne majesa munhu ayu mana kakopola munhu, hanga nakalohoka kudumigwa mbahali, hachi haimlechele yalutilile kikala!" 5 Ila Paoli nakalimizila lila izoka kuli chiluli, halumizwe nehado. 6 Wala wanhu wawele wololela kota yahatung'hune ama yahagwile na kubagama baho du. Lowabeteze kwa mhela uhejile ne kona chinhu choneche chimfichile Paoli, nawagalamla majesa gawo kuwala heye, nawalonga kota heye ka mlungu.

7 Habehi na honhu hala nahali na mgunda ukulu wa Pubilio, chilongozi wa chila chihilwa. Pubilio nakatuchema kota goloko wa heye, natwali wajenzi wa heye kwa mazuwa gadatu. 8 Lelo, mhaza wa Pubilio nayali yawasile mchinhanda yotamika lupanzo. Paoli nakaluta kumlola na lowalandile kwa Nguluwi, nakawika moko ga heye kwa mtamwa, nakamusila utamwa. 9 Kwa mbuli ayo, watamwa weng'ha hali chila chihilwa nawoya, nawo nawoselwa matamwa gawo. 10 Wanhu nawatupa ndolendole nyinji na mhela lotwaluche kahi majendo, nawajela mgati mwa meli vinhu vyotulingugana tuwe navyo.

11 Lojipulute myezi jidatu natwaluka kahi majendo kwa meli imwe ya Alekizandiliya ilinguchemigwa "Milungu Minyambili." Meli ayo nayali yimile kuli chihilwa kwa mhela weng'ha wa chipute. 12 Natufika kuli muji wa Silakusa, natikala ako kwa mazuwa gadatu. 13 Hamba natwinula majendo, natufika Legio. Lolipulute zuwa limwe, mbeho nayaluka kuputa kulawila kusini, mazuwa meli hamba natufika kuli muji wa Potioli. 14 Ako natuwafika wanhu walingumkunda Kilistu, natuwalanda tikale na hewo kwa mhela wa juma limwe. Ahyo ndo natulutilila na majendo mbaka Loma. 15 Wanhu walingumkunda Kilistu wa kula Loma, lowalonjelwe mbuli za hetwe, nawoya kutubochela kuli honhu ha kuguzila na kugula vinhu lya Apiyo na honhu halinguchemigwa Ng'handa zidatu za kwesela na kuwasa wajenzi. Paoli loyawawene nakalonga malumbo kwa Nguluwi, nakekangaza nhumbula.

16 Lotufichile Loma Paoli nakakundizwa kikala yaliyeng'ha hamwe na mwamizi yumwe wa kumwamila.

17 Mazuwa gadatu hamba, Paoli nakawachema vilongozi wa Chiyahudi wa honhu aho. Loweting'hane, Paoli kawalonjela, "Wang'holozangu, hanga siditile chinhu choneche chihile ne kubeza chihendo cha wasekulu wa hetwe, nandibatigwa kula Yelusalemu na kuwichigwa kuli moko ga Waloma. 18 Waloma lowambuzile na kona kota ndahela nongwa yoneche, nawagana kundechela, 19 ila Wayahudi wanji nawailema mbuli ayo, ahyo naingana kukana lufaa kwa Kaizali mndewa mkulu wa Loma, hanga siwele na choneche cha kuwatagusa wang'holozangu. 20 Kwa chiwalo acho nandanda kiwona na kudawala na hemwe, nanyowigwa minyololo aji kwa chiwalo cha kitumbila kwa Waisilaeli."

21 Hewo nawamlonjela, "Hetwe hatunabochela baluwa yoneche kulawa Yudeya, ne haduhu mng'holozetu yoneche yafichile hano na kulavya mbuli ama kulonga choneche chihile kuwala hegwe. 22 Ila twangijesa kota yagoya tuhuliche kulawa kwa hegwe mbuli ziwele kumutwi kwa hegwe. Kwa vila twanguvizela kota acho chilundo cha hegwe changulemigwa chila honhu."

23 Hamba walonga na heye zuwa lya kuting'hana, na wenji nawafika ako koyawele ngikala. Kulawila lufuka mbaka matinazo Paoli nakawagubulila kuwala Undewa wa Nguluwi, kuno yojeza kuwadita wakunde mbuli kuwala Yesu kwa kukolela malajizo ga Musa na maandiko ga waloli. 24 Wanhu wamwe nawakunda ulonzi wa heye, ila wamwe hawakundile. 25 Lelo nakwali na kibagula kuli majesa ga hewo. Lowawele woluta, Paoli nakalonga mbuli ayi, "Ndikomya ga goya gala Muhe Yelile goyawalonjele wasekulu wa hemwe kwa kukolela mloli Isaya, 26 yolonga,

" ‘Ulute kwa wanhu awa ukawalonjele,

kuhulika mohulika, ila hamvizela,

kulola molola, ila hamkona.

27 Kwa vila nyhala za wanhu awa nazizilika,

nawadinya makutu gawo,

nawadinya meho gawo.

Hanji, wahalolile kwa meho gawo,

wahahuliche kwa makutu gawo.

Wahavizelele kwa nyhala zawo,

na kungaluchila, kangulonga Mkulu,

nani ndahawalohole.’ "

28 Hamba Paoli nakalonga, "Lelo mvizele, usenga wa Nguluwi kuwala ulohozi nauhilikwa kwa wanhu wa isi zinji. Hewo wohulichiza." 29 Paoli loyalonjile ago, Wayahudi nawoka kuno wochitwanza lukami hewo kwa hewo.

30 Kwa mhela wa miyaka mili Paoli nakekala kuli ng'handa iwele nakailipila sendi yuye, nayali yowabochela weng'ha wawele nawoya kumlamsa. 31 Nayali yodamla Undewa wa Nguluwi na kulangusa kuwala Mkulu Yesu Kilistu ne kudumba na kulemezwa.