1 Kuli chilundo cha wanhu walingumkunda Kilistu ako Antiokiya nakwali na wanhu wamwe wawele waloli na walangusa, hali hewo nayali Balinaba na Simoni yachemigwe Mtitu na Lukio wa Kilene na Sauli na Manaeni yawele nakaloligwa hamwe na mndewa Helode. 2 Lowawele womlanda Mkulu Nguluwi na kwesela kulya, Muhe Yelile nakalonga, "Muwahagule Balinaba na Sauli kwa chiwalo cha mijito jondiwachemele." 3 Lelo, lowasindile kumlanda Nguluwi na kwesela kulya, nawawawichila moko kumutwi na kuwaleka walute.

4 Lelo, Banaba na Saulo lowalajizwe na Muhe Yelile, nawaluta mbaka Seleukia kuwele nawakwina meli mbaka kuli chihilwa cha Kupilo. 5 Lowafichile Salami nawadamla ulonzi wa Nguluwi kuli Masunagogi ya Wayahudi. Yohani nayali yowatanza.

6 Lowakolile kuli chihilwa cheng'ha, nawafika kuli muji wa Pafo, ako nawamfika Myahudi yumwe yawele mhawi yalinguchemigwa Bali-yesu kwa chigilichi ndo Elima, yawele nakedita mloli. 7 Munhu ayo nayali hamwe na Seligio Paoli, munhu yawele na luhala yawele chilongozi wa chila chihilwa. Seligio Paoli nakawachema Balinaba na Sauli leka yahulichize ulonzi wa Nguluwi. 8 Ila yula mhawi Elima kota vyoyawele yochemigwa kwa Chigilichi, nakajeza kitwanza na Balinaba na Sauli leka yamlemeze ayo chilongozi wa chihilwa yaleche kuukunda ulonzi wa Nguluwi. 9 Lelo, Sauli yachemigwe Paoli, yawele yamemile Muhe Yelile, nakamnogolela meho ayo mhawi, 10 nakalonga, "Kwa mdesi ng'hatu na mhadi hegwe! Hegwe kwa mwana wa Limazoga! Hegwe kwa mng'honyo wa choneche chiwele cha kukomya, hambe uleche kwajiliza nzila za Mkulu zigoloche. 11 Lelo, moko wa Mkulu wokuzapa. Kowa hambe ulole na huweza kona lumuli lwa isanya kwa mhela uchefu." Baho du ikunguyosi na jiza navimgubika, naye nakaluta aku na kula yompala munhu wa kumibata moko leka yamlajile nzila. 12 Yula chilongozi wa chihilwa loyagawene ago, nakakunda kwa vila nakabubuwazwa na malanguso kuwala Mkulu.

13 Kulawa Pafo, Paoli na wayage nawakwina meli nawaluta mbaka Peliga ako Pamfuliya, ila Yohani nakawaleka, kahiluka Yelusalemu. 14 Ila hewo nawalutilila na majendo kulawa Peliga mbaka kuli muji wa Antiokiya uwele Pisidia. Zuwa lya Kwesela nawenjila mgati mwa sunagogi, nawekalisa.

15 Lowasindile kusoma chitabu cha malajizo ga Musa na maandiko ga waloli, vilongozi wa sunagogi nawawahilichila usenga awu, "Wang'holozangu, wone mwanayo mbuli ya kuwalonjela wanhu leka kuwakangaza nhumbula mlonje." 16 Lelo, Paoli nakema, nakalavya ulajilo kwa moko, nakaluka kulonga. "Wanhu wa Isilaeli na wanhu wanji weng'ha mlingumdumba Nguluwi, mhulichize! 17 Nguluwi wa wanhu awa wa Isilaeli nakawahagula wasekulu wa hetwe, nakawadita wanhu awa wawe wanhu wa isi ng'hulu lowawele kuli isi ya chijenzi kula Misili. Nguluwi nakawalavya ako kwa ludali lwa heye lukulu. 18 Kwa mhela wa miyaka makumi gane nakemilila madito gawo lowawele kula kugunuche. 19 Nakawadumya wanhu wa isi saba wawele nawali wochikala kuli isi ya Kaanani, nakawapa Waisilaeli isi ayo leka iwe ya hewo. 20 Miyaka miya zine na makumi gahano najipuluta, hamba nakawapa watagusa wawalongoze mbaka mhela wa mloli Samweli. 21 Aho nawagana wawe na mndewa, Nguluwi nakawapa Sauli, mwana wa Kishi wa nhanzi ya Benjamini, yawe mndewa wa hewo kwa mhela wa miyaka makumi gane. 22 Loyamusile Sauli, Nguluwi nakamhagula Daudi yawe mndewa wa hewo. Nguluwi nakalajila igano kwa Daudi yolonga, ‘Nandimona Daudi mwana wa Yese, ndo munhu yalingihanyisa na nhumbula ya heni, munhu yawele kokweneza gala geng'ha gondilingugana kudita.’ 23 Kulawa kuli lukolo lwa Daudi, Nguluwi, nakawagalila Waisilaeli Mlohozi, yawele ndo Yesu kota vyoyalagane. 24 Kung'hali kuya kwa Yesu, Yohani nakadamla kwa wanhu weng'ha wa Isilaeli kota wanguganigwa kulonga gehile ga hewo na kubatizigwa. 25 Yohani loyawele yokweneza mijito jake nakalonga, ‘Mwangijesa kota heni nda whaani? Siwele yula yomlingumbeteza. Ayo yalinguya kunyhalila nani sijeza kudohola ne ng'weso za makwamba ga heye.’

26 "Wang'holozangu, lukolo lwa Abulahamu, na wanhu wanji weng'ha mlingumdumba Nguluwi, usenga awu wa ulohozi naugaligwa kwa hemwe. 27 Kwa vila wenyeng'haye wa Yelusalemu na vilongozi wa hewo hawamzelele Yesu kota mlohozi ne kuuzela ulonzi wa waloli uwele ngulonjigwa kuli chila Zuwa lya Kwesela. Ahyo, nawaudita ulonzi wa waloli wenele kwa kumtagusa Yesu yabagame. 28 Hanga hawamuwene na nongwa ilingumgana yabagame, nawamlanda Pilato yamtaguse yabagame. 29 Lowasindile kweneza geng'ha gawele gandichigwe kuwala heye, nawamdulisa kulawa kuli msalaba, nawamtila kuli chilaga. 30 Ila Nguluwi nakamzilipula kulawa kwa wabagame. 31 Naye kwa mazuwa menji, nakawalawila wawele nawali hamwe na heye kwaluchila Galilaya mbaka Yelusalemu. Kulawila mhela wula wanhu awo ndo walolezi wa heye hali wanhu. 32 Natwe natuya hano kuwagalila Mbuli Inojile, mbuli yila iwele Nguluwi yoyalagane na wasekulu wa hetwe kowegalila, 33 nakeneza lelo kwa chiwalo cha hetwe wazukulu wa hewo kwa kumzilipula Yesu kulawa kwa wabagame. Kota vyoyandichigwe kuli Zabuli ya keli,

" ‘Hegwe kwa mwana wa heni,

heni lehano ndiwa mhaza wa hegwe.’

34 Kwa vila Nguluwi nakamzilipula kulawa kwa wabagame yaleche kola, lelo, Nguluwi nakalonga ahi,

" ‘Ndokupa utambichizo welile na wakukomya wondimlonjele Daudi.’

35 Ena na kuli honhu hanji ha Zabuli hangulonga,

" ‘Humleka Yelile wa hegwe yole.’

36 Lelo, Daudi, nakeneza gala goyalingugana Nguluwi kuli mhela wa heye, hamba nakabagama na kutiligwa habehi na wasekulu wa heye na mtufi wa heye nawola. 37 Ila yula yawele Nguluwi nakamzilipula kulawa kwa wabagame naholile. 38 Ahyo wang'holozangu, ndagugana mvizele kota kwa kukolela ayo Yesu, kulechelwa kwa gehile ga hemwe kwanguwikuligwa 39 na chila munhu yalingumkunda Yesu kangulechelwa gehile geng'ha, mbuli iwele hanayalikoleka kwa nzila ya malajizo. 40 Lelo milolele leka mleche kufichigwa na gala gowalonjile waloli.

41 " ‘Mlole hemwe mlingubeza,

mbubuwale leka mwajilile!

Kwa vila ndodita chinhu lomuwa mng'hali wakomu,

hanga mwahalonjelwe, hamwalikunda!’ "

42 Paoli na Balinaba lowawele wolawa kuli lila sunagogi, wala wanhu nawawalalika woye kahi kuli Zuwa lya Kwesela liwinzile leka walongase goya kuwala mbuli azo. 43 Nhing'hano ayo loimalile, Wayahudi wenji na wanhu wanji wa isi zinji wawele wanguwinza dini ya Chiyahudi nawawawinza Paoli na Balinaba. Awo watumigwa nawalongasa nawo na kuwakangaza nhumbula leka walutilile kikala kwa kitumbila igano lya Nguluwi.

44 Zuwa lya Kwesela liwinzile, wanhu wenji kuli wula muji nawoya kuhulichiza ulonzi wa Mkulu Nguluwi. 45 Ila Wayahudi lowachiwene chila chilundo cha wanhu nawona maya, nawetwanza na Paoli kwa kulema ulonzi woyalonjile na kumliga. 46 Ahyo, Paoli na Balinaba nawalonga kwa ludadali ng'hatu, wolonga, "Naitugana kwaluka kulonga na hemwe ulonzi wa Nguluwi, ila kwa vila namuulema, namitagusa mwemwe kota hambe mganigwe kupegwa ukomu wa mazuwa gose, lelo twanguwagalamchila wanhu wa isi zinji. 47 Kwa vila Mkulu Nguluwi nakatulajiza hino,

" ‘Nandiwawika hemwe muwe lumuli lwa wanhu wa isi zinji,

leka muwegalile wanhu ulohozi kuli isi yeng'ha.’ "

48 Wanhu wa isi zinji lowahuliche mbuli ayo nawasangalala, nawautogola usenga wa Mkulu Nguluwi na wala wawele nawahaguligwa kubochela ukomu wa mazuwa gose, nawakunda.

49 Ulonzi wa Mkulu Nguluwi nawenela chila honhu kuli honhu hala. 50 Ila Wayahudi nawawadita wadala walingumfugamila Nguluwi, wawele vilongozi na walume wanji watanganiche wa mji wula wawagaze. Nawaluka kuwagaza Paoli na Balinaba na kuwawinga. 51 Lelo, watumigwa nawakung'huna nhimbwisi kuli magulu gawo kota upanjilo, hamba nawaluta Ikonio. 52 Ila awo walanguswa nawali wamemile usangalalo na Muhe Yelile.