1 Wang'holozangu, mchemigwe na Nguluwi kilanga muwe wa heye, mijese ng'hatu kwa chiwalo cha Yesu Chitumagwa na Mtambika Mkulu wa makundo ga kulonga kwa mlomo wa hegwe. 2 Heye nayali wa kukundigwa kwa Nguluwi, nakamhagula kukola mijito ya heye kota vila Musa naloyali wa kukundigwa kukola mijito kuli ng'handa ya Nguluwi. 3 Ila Yesu kanguganigwa kutogoligwa ng'hatu kusinda Musa kota vila mzenga ng'handa kopegwa ukulu kusinda ayo ng'handa. 4 Chila ng'handa huzengagwa na munhu yumwe, ila Nguluwi ndo yalinguzenga vinhu vyeng'ha. 5 Musa nayali chitumagwa wa kukundigwa kuli mijito ajo jeng'ha ja ng'handa ya Nguluwi, nayali mlolezi wa geng'ha Nguluwi goyolonga aho hamba. 6 Ila Kilistu ndo wa kukundigwa kota Mwana yawele na ludali kuli ng'handa ya Nguluwi. Hetwe ndo ng'handa ya heye wone tulutilile kwima nzinzili kuli kikangaza nhumbula na tulutilile kidayila kuli kitumbila kotuwele nako.

7 Lelo, kota vyoyalingulonga Muhe Yelile,

"Lehano, wone muhuliche lizi lya Nguluwi,

8 mleche kuzidita nhumbula za hemwe ziwe zigagadale,

kota vyomditile kuli kubelenhuka,

kuli lila zuwa lya kujezigwa kula kuchiwala.

9 Ako wasekulu wa hemwe lowanjezile na kupima majesa ga heni,

hanga nawajona mijito ja heni, jong'holile kwa miyaka makumi gane!

10 Kwa mbuli ahyo nanzudizwa na hewo na kulonga,

‘Mazuwa geng'ha wanhu wano nawajilila mnhumbula za hewo,

hawazizelele nzila za heni.’

11 Lelo nanzudila nandilaha,

‘Hawokwinjila hali honhu hangu ha kwesela!’ "

12 Wang'holozangu, milolele, yaleche kuwabaho yoneche hali hemwe munhu yawele na nhumbula yihile, ilingibagula na Nguluwi yawele mkomu. 13 Ila vyomlutilila kuhulika ulonzi awo "Lehano" wangusomigwa kuli Maandiko Matakatifu, mwanguganigwa kikangaza nhumbula chila zuwa, leka munhu yoneche hali hemwe yaleche kuwa mjuvi kwa chiwalo cha kuhadigwa na kudita gehile. 14 Kwa vila hetwe tweng'ha hamwe twa wanhu wa Kilistu, wone tochibatilila goya mbaka kuduma, kwima nzinzili kotwalinako aho mwaluko.

15 Maandiko Matakatifu gangulonga hino,

"Wone muhuliche lizi lya Nguluwi lehano,

mleche kuzidita nhumbula za hemwe ziwe zigagadale,

kota mhela ula lowambelenhuche Nguluwi."

16 Ndo whaani wahuliche lizi ya Nguluwi na kumbelenhuka? Ndo wala weng'ha walongozigwe na Musa kulawila isi ya Misili. 17 Nguluwi nakawazudilila whaani kwa miyaka makumi gane? Nakawazudila wala waditile gehile, nawabagama kula kugunuche. 18 Kahi ndo whaani awo wawele Nguluwi nakelaha howokwinjila ng'oo honhu hangu ha kwesela? Yali yolonga kwa wala wamhinduche. 19 Lelo, twangona kota hawenjile ako kwa vila nahawakundile.