1 Melikisedeki nayali mndewa wa Salemu na mtambika wa Nguluwi. Abulahamu loyahiluche kulawa kuli ngondo koyawakopole wandewa, Melikisedeki nakaluta kiting'hana naye, naye Melikisedeki nakamtambichiza Abulahamu, 2 naye Abulahamu nakamha heye honhu hamwe ha kumi ha vinhu vyeng'ha vyoyabochile. Mana ya itagwa Melikisedeki ndo "Mndewa Yatanganiche." Kahi kwa vila heye nayali "mndewa wa Salemu," itagwa lyake lyanguzeleka ndo, "Mndewa wa kikala goya." 3 Mhaza wa heye na mayake hawalinguzeleka ne lukolo lwake halulinguzeleka, hailinguzeleka nakavumbuka hanili ama nakabagama hanili. Kangiwhana na Mwana wa Nguluwi na kangulutilila kuwa mtambika mazuwa gose.

4 Lelo mwangona munhu ayu vyoyali mkulu. Mbaka Sekulu wa hetwe Abulahamu nakamha chilundo chimwe cha kumi ya vinhu vyeng'ha vyoyaholile kulawa kuli ngondo. 5 Tuvizela kahi kota mgati mwa malajizo yandichigwa, lulelo lwa Lawi wawele ndo watambika, wanguganigwa kuhola chilundo cha kumi kulawa kwa wanhu, wala wawele wang'holozawo, hanga na hewo ndo lulelo lwa Abulahamu. 6 Ila ayo Melikisedeki hawele wa lukolo lwa Lawi, ila heye nakabochela chilundo cha kumi kulawila kwa Abulahamu, kahi nakamtambichiza heye nayalagane na Nguluwi. 7 Kuduhu mbuli ne hado kota yalingumtambichiza ndo mkulu kusinda yula yalingutambichizwa. 8 Kahi, awo watambika walingubochela chilundo chimwe cha kumi, ndo wanhu wawele kubagama, ila ahano yalingubochela chilundo chimwe cha kumi, yani Melikisedeki, heye hambe yabagame. 9 Lawi ndo sekulu wa wala weng'ha wawele ngubochela chilundo chimwe cha kumi, Lawi naye nakalavya chilundo chimwe cha kumi kukolela Abulahamu, 10 kwa vila Lawi nayali hanapondigwa, mhela Melikisedeki loyating'hane na heye.

11 Kulawa kuli watambika wa Walawi, wanhu wa Isilaeli nawabochela malajizo. Lelo, wone wanhu nawahawele watanganiche kwa mijito ya Walawi, nakwahawele kahi na chiwalo cha kulawila utambika unji, kwa kuwinza utambika wa Melekisedeki na hauwele ula wa Aluni. 12 Mina utambika ula hougaluka, ndo na malajizo nago ganguganigwa gagaluche. 13 Naye Mkulu wa hetwe yawele mbuli azo zeng'ha zangulonjigwa kwa heye, nayali wa nhanzi yinji, kuduhu ne yumwe wa nhanzi ayo ya heye yawahiche kudita mijito kuli honhu ha kulavila nhambiko mhela loyawele mtambika. 14 Mina naizeleka kota heye Mkulu, nakalawila kuli nhanzi ya Yudasi, naiwele Musa nahalonjile ulonzi woneche wula kwa chiwalo cha watambika.

15 Kahi mbuli ayi yotulonjile yahazelu ng'hatu, kwa vila kalawila mtambika yunji yalingiwhana na Melikisedeki. 16 Heye hawele mtambika kwa malajizo ga chiwunhu kwa kulola kangulawila lukolo lwachi, ila kwa mong'ho wa ukomu wa mazuwa gose. 17 Mina Maandiko gangulonga, "Hegwe ndo mtambika mazuwa gose, kwa kuwinza utambika wa Melikisedeki." 18 Lelo, ula mzilo wa katali kwa chiwalo cha utambika nawali usigwe kwa vila nawali ng'hochele na hauwele wa kuhega. 19 Mina malajizo ga Musa hagaditile chinhu choneche chila chiwe goya. Ila sambi, honhu ha heye hawichigwa hawe ha kitumbila ng'hatu kwa chiwalo acho toweza kumhejelela Nguluwi.

20 Mzidi wa ago geng'ha, ahano Nguluwi nakelaha. Wanji nawali watambika ne kilaha. 21 Ila Yesu nakaditikwa mtambika kwa kilaha mhela Nguluwi loyamlonjele,

"Mkulu Nguluwi nakelaha,

hogalula kunuwila kwa heye,

‘Hegwe ndo mtambika mazuwa gose.’ "

22 Lelo kwa chiwalo cha kilaha aku, Yesu kawa yumwe yaditile ilagano linojile ng'hatu.

23 Lelo nakwali na watambika wenji wali ahyo, kwa vila chila mhela wa heye kubagama loufichile nakabagama, ahyo nawalemwela kulutilila na mijito ja utambika. 24 Ila kwa vila Yesu ndo mkomu mazuwa gose, utambika wa heye hauduma hebu. 25 Ahyo, heye koweza ng'hatu kuwalohola weng'ha walingumlutila Nguluwi kukolela heye, mina heye ndo mkomu mazuwa gose kuwalandila kwa Nguluwi.

26 Kwa vila natuganigwa tuwe na Mtambika Mkulu yatanganiche kwa chiwalo cha hetwe na yawele yelile na nayawele hela nongwa na yalihela gehile mgati mwa heye na yeyusile kutali na wanhu wawele na gehile na yenuligwe kuchanya kilanga. 27 Heye nayali vinji na watambika wakulu wanji, heye nahaganile kulavya nhambiko chila zuwa, mwaluko kwa chiwalo cha gehile ga heye yuye, hamba kwa chiwalo cha gehile ga wanhu. Heye nakadita ahyo kamwe hela kwa chiwalo cha wanhu weng'ha, loyelavile nhambiko heye yuye. 28 Malajizo ganguwawika wanhu wawele ng'hochele kuli utambika ukulu, ila ilagano lya Nguluwi yaditile kwa kilaha liwele lyuyile honhu ha malajizo imhagula Mwana, yawele yatanganiche mazuwa gose.