1 Aho katali, Nguluwi nakalonga na wasekulu wa hetwe mala nyinji kwa nzila zinjizinji na kwa kukolela waloli, 2 ila mazuwa gano ga kuduma, nakalonga na hetwe kwa kukolela Mwanage. Heye ndo yawele kwa kukolela Nguluwi nakalumba ulanga na isi na vinhu vyeng'ha vilimumo, nakamhagula na kuvidita vinhu vyeng'ha viwe vya heye. 3 Heye ndo lung'halo lwa ukulu wa Nguluwi, na kiwhana ng'hatu na vyoyali heye Nguluwi, yoiyegamiza isi kwa ulonzi wake luwele na ludali. Hanga loyasindile kuwahovuga wanhu wihe wa hewo, nakekala ako kuchanya kilanga, ubanzi wa kudilo wa Nguluwi Mkulu.

4 Mwana ndo mkulu kusinda mhilisi wa kilanga, kota vila itagwa loyapegwe na Nguluwi ndo likulu kusinda itagwa lyawo. 5 Nguluwi hamlonjele ne yumwe wa wala wahilisi wa kilanga,

"Hegwe ndo mwanangu,

heni lehano nandiwa Mhaza wa hegwe."

Ne halonjile kuwala mhilisi yoneche,

"Heni ndowa Mhaza wa heye,

naye kowa Mwana wa heni."

6 Ila Nguluwi loyali yomlajiza Mwanage mlelwa wa mwaluko, kuli isi nakalonga,

"Wahilisi wa kilanga weng'ha wamfugamile."

7 Ila kwa mbuli ya wahilisi wa kilanga, nakalonga,

"Nakawadita wahilisi wa heye wawe mbeho,

na vitumagwa wa heye wawe milapi ja chiluli."

8 Ila kwa Mwanage, Nguluwi nakalonga,

"Gwa Nguluwi, chigoda cha hegwe cha undewa ndo cha mazuwa gose! Hegwe kwanguwalongoza wanhu wa hegwe kwa hachi.

9 Hegwe kwangugana gatanganiche na kwanguzudila wihe,

kwa chiwalo acho, Nguluwi, Nguluwi wa hegwe,

nakakuhagula kwa kukubakaliza mafuta ga usangalalo,

kusinda wayago."

10 Nakalonga kahi,

"Hegwe Mkulu Nguluwi, nakuwika iganga lya msisi lya isi aho mwaluko,

ulanga ndo mijito ja moko ga hegwe.

11 Avyo vyokwaga, ila hegwe kopona,

vyolala kota ivalo.

12 Kozibinabina kota ikanzu,

navyo kota mivalo kovigalula,

Ila hegwe ndo yuyula mazuwa gose,

na ukomu wa hegwe wahela kuduma."

13 Nguluwi hamlonjele ne yumwe mhilisi wa kilanga,

"Wikalise ubanzi wa kudilo kwa heni,

mbaka ndiwawiche hasi wang'honyo wa hegwe wawe chigoda cha kuwichila magulu kwa chiwalo cha hegwe?"

14 Lelo wahilisi wa kilanga ndo choni? Ila ndo muhe hela wawele vitumagwa wa Nguluwi na wala wawele ngulajizwa kuwatanza wala woubochela ulohozi.