1 Heni Paoli nda mchinweng'ho kwa chiwalo cha kumkolela mijito Kilistu Yesu na Timoteyi mng'holozetu kuli Kilistu, ndangukwandichila hegwe Filimeni tukuganile, mkolamijito myetu, 2 na lumbulyetu Afiya na mtowa ngondo muyetu Alikipo na wanhu walingumkunda Kilistu, walingiting'hana hakaye hako.

3 Ndanguwaganilani isungu na kikala goya kulawila kwa Nguluwi Mhaza wa hetwe na kwa Mkulu Yesu Kilistu.

4 Mhela weng'ha heni hondilanda, ndangukukumbuka hegwe Filimeni na kuta malumbo Nguluwi, 5 kwa vila ndanguhulika mbuli ya makundo ga hegwe kwa Mkulu Yesu na igano lya hegwe kwa wanhu weng'ha wa Nguluwi. 6 Ndangulanda makundo ago gouwele nguwalonjela wanhu wanji, gawadahize muwe na uwanzi wenele ng'hatu na utambichizo unojile wotulingupegwa kuli kilumba kwa hetwe na Kilistu. 7 Mng'holozangu, igano lya hegwe lingalila kusangalala kukulu na kung'hangaza nhumbula ng'hatu! Nagwe kukangaza nhumbula za wanhu wa Nguluwi.

8 Kwa chiwalo acho, ndahawezile, ne kudumba ng'hatu, londiwa mng'holozo kuli kilumba na Kilistu, kukulajiza udite choulingulapigwa kudita, 9 ila kwa chiwalo cha igano, ndangona yagoya ng'hatu ndikulande. Ndangudita hino hanga heni nda Paoli, msenga wa Kilistu Yesu na sambi kahi nda mchinweng'ho kwa chiwalo cha kumkolela mijito Yesu Kilistu. 10 Lelo, ndangulanda umtanze mwana wa heni Onesimo, yawele mwana wa heni kuli kilumba na Kilistu, kwa vila nandiwa kota mhaza wa heye londali mchinweng'ho. 11 Ndo Onesimo yuyula nayali hambe yawe na utanzi, ila sambi kana utanzi kwa hetwe weng'ha, heni na hegwe kahi.

12 Sambi ndangumhilusa kwa hegwe, naye ndo ndimganile ng'hatu. 13 Nangana yekale na heni yanhanze honhu ha hegwe mhela awu mbele mchinweng'ho kwa chiwalo cha kudamla Mbuli Inojile. 14 Ila siganile kudita chinhu choneche ne kukulonjela hegwe. Kahi nasiganile ne kukukola lupichi unhanze, ila nangana udite kota nhumbula ya hegwe vyoilingugana.

15 Hanji, Onesimo nakoka kwa hegwe kwa mhela udo hela, leka uwe naye kahi mazuwa gose. 16 Sambi heye hawele mpogozi wa hihi hela, ila lelo, ayu kapuluta ng'hatu kuupogozi, heye ka mng'holozetu tumganile. Ndo wa kitumbila ng'hatu kwa heni na kwa hegwe, kota chitumagwa na kota mng'holozetu kuli kilumba na Mkulu.

17 Lelo, wone ulingunzela heni kota nda mng'holozo kuli kilumba na Mkulu, mbochele heye kota vila wali umbochela nene baha. 18 Wone nayali yakuditile wihe, ama nayali yodaigwa na hegwe, lelo, heni ndokuhilusila. 19 Ndangwandika mbuli ayi kwa moko gangu nene, heni Paoli ndohilusa! Kahi silingugana kukulonjela kota na hegwe nagwe ndangukudai mbaka ukomu wa hegwe. 20 Ena, mng'holozangu, unditile mbuli ayo kwa chiwalo cha itagwa lya Mkulu, usangalaze nhumbula ya heni kuli kilumba na Yesu Kilistu.

21 Ndangwandika ndichitumbila kota kodita achi chondilingukulajiza, kahi ndivizela kota kodita mzidi wa aga gondilikukulanda. 22 Hamwe na ago mngongomanyile honhu ha kuwasa, mina ndangitumbila kota kwa kulanda kwa hegwe, Nguluwi konhanza ndikujendeleni.

23 Epafula, mnweng'hwa muyangu yawele mchinweng'ho hamwe na heni kwa chiwalo cha kumkolela mijito Yesu Kilistu, kangukulamsa. 24 Nawo achina Malichi na Alistako na Dema na Lukasi, wakola mijito wayangu, wangukulamsa. 25 Ndanguwalandila hemwe isungu lya Mkulu wa hetwe Yesu Kilistu liwe na hemwe mweng'ha.