1 Lelo, tugaleche kulangusa kahi gala malanguso ga mwaluko kwa chiwalo cha Kilistu, tuhejele kumwando kwa gala malanguso gakangale, haiwele kulutilila kuwika msisi kuli ulanguso wa kileka na madito hagalingutanza chinhu kuwala kumkunda Nguluwi, 2 malanguso kwa nzila nyinji za ubatizo na kuwichilwa moko na kuzilipuka kwa wabagame na utaguso wa mazuwa gose. 3 Alyo tolidita, wone Nguluwi yakundize.

4 Mina kuwahilusa wanhu waleche gehile kahi, wanhu wawele wavizelele kukomya kwa Nguluwi na wajezile ndolendole za kilanga na welumbile hamwe kubochela Muhe Yelile 5 na kujeza ulonzi wa Nguluwi na mong'ho wa isi ilinguya, 6 hamba wamgalamchile Nguluwi kahi. Yowa nongwa kwa vila hewo kota wangumuwamba kahi mumsalaba Mwana wa Nguluwi lwa keli na kumbasa soni hazelu.

7 Misanga jiwele kutowelwa nhonya baho na koteza mizuchila jilingigala mbena kwa mlimi jitambichizwa na Nguluwi. 8 Ila wone misanga ajo jote migodi ja miwa na misolo, jahela utanzi, behi jopanjilwa na Nguluwi na ako mwiso ndo kusomigwa na chiluli.

9 Wang'holozangu hanga tulonjile ahyo, twima nzinzili kota mwa mnzila inojile iwele ndo nzila ilinguwalongoza kuli ulohozi. 10 Nguluwi halingudita mbuli zohaziganigwe, heye hoisemwa hebu mijito yomkolile na igano lyomlajile kwa itagwa lya heye kuli utanzi womuwapele wanhu wa heye walingumkunda Kilistu na womlingulutilila kumha. 11 Natwe twangugana ng'hatu chila yumwe wa hemwe yalajile kikangaza kukula mbaka kuduma, leka gala mlingitumbila genele. 12 Ahyo mleche kuwa wagata, ila muwe kota wala walingukunda na wali ngwimilila, wabochele gala gawele Nguluwi yalagane na hewo kowapa.

13 Nguluwi loyamlonjele Abulahamu komha chila yalagane kumha, nakelaha kwa itagwa lyake heye, mina kuduhu yawele mkulu kusinda Nguluwi yawele kwa heye yahawezile kilaha. 14 Nguluwi nakalonga, "Ndangukomya ng'hatu, ndokutambichiza na ndokupa lulelo lwinji." 15 Abulahamu nakabeteza kwa kwimilila ng'hatu ahyo nakabochela chila choyalagane Nguluwi komha. 16 Wanhu howochilaha, welahaga kwa yumwe yawele mkulu kusinda hewo, kilaha kwangulajila kukomya kwa chila chilonjigwe na kusa ibamba lyeng'ha. 17 Naye Nguluwi nakawika nzinzili chila choyalonjile kwa kilaha, ahyo nakawalajila hazelu kota wala wobochela chila choyalagane kwa kilaha. 18 Lelo, kuna vinhu vino vili, chila choyalonjile Nguluwi na kilaha, vyohaviwele galuka na kwa mbuli ya avyo Nguluwi howeza kulonga udesi. Ahyo hetwe twangubilimila kikala goya kwa heye, twangupegwa nhumbula ya kibatilila kitumbila kuwichigwe kumwando kwa hetwe. 19 Twanako kitumbila kuwele kota ngwamo ibatilile ukomu wa hetwe. Kitumbila ako kwangwinjila mbaka honhu helile ng'hatu. 20 Yesu yuye nakalongola kwinjila amo kwa mbuli ya hetwe na kawa mtambika mkulu mazuwa gose, kwa kuwinza utambika wa Melekisedeki.