1 Hetwe twanacho chilundo chikulu cha walolezi kumwando kwa hete. Lelo tuse chila chinhu chiwele ngutulemeza na gehile gala gatunanahile. Tubilime kwa kwimilila kuli kubilima kuwichigwe kumwando kwa hetwe. 2 Tumuwinze Yesu yawele ndo yaluchize makundo ga hetwe na ndo heye yogomanjiza. Kwa chiwalo cha kusangalala kuwele kuwichigwe kumwando kwa heye, heye nakemilila kubagama kuli msalaba, ne kudumba soni ya heye, lelo kangikala kuli ubanzi wa kudilo kwa chigoda cha undewa wa Nguluwi.

3 Mijese kuwala mbuli zimfichile Yesu, vyoyemilile kulemigwa kukulu na wanhu wawele na gehile. Lelo, mleche kugozola ne kutweguka nhumbula. 4 Kwavila ngondo yomlingitowa kwa chiwalo cha kusumya gehile, hamitowile mbaka mbohole danda. 5 Ndaze, msemwa wula ulonzi wa kuwakangaza, Nguluwi yawachemile hemwe kota wana wa heye?

"Mwanangu, uleche kubeza makanyo ga Mkulu,

ne uleche kugozola hoyokung'hanuchila.

6 Mina Mkulu kawakanyaga wala yalinguwagana,

heye komzapa chila mwana yalingukunda."

7 Mwimilile kugazigwa kwa vila ndo ulanguso, Nguluwi huwaditilaga hemwe kota wanage. Mina ndo mwana wachi hambe yang'anuchilwe na kuzapigwa na mhaza wa heye? 8 Ila wone homzapigwa kota wana wanji, lelo, hemwe hamuwele wana wa heye, ila ndo wana chilokote. 9 Mzidi wa ago, hetwe twanguwahulichiza wahaza wa hetwe watupondile hala howotuzapa. Lelo, twanguganigwa kumhulichiza ng'hatu Mhaza wa hetwe wa chimuhe leka tulutilile kuwa wakomu. 10 Wahaza wa hetwe hano muisi nawatuzapa kwa mhela uchefu hela, kota hewo vyowawene inoga, ila Nguluwi kangutukanya kwa chiwalo cha kututanza twetwe baha, leka tuwe welile hali heye. 11 Kuzapigwa haiwele mbuli inojile ila ya kigala masinzo. Ila wala walanguswe kuwahulichiza, hamba wobeta chonolo cha kikala goya kuli ukomu ulingumnojeza Nguluwi.

12 Lelo, mkangaze moko ga hemwe galing'hochele na kukangaza mafugamilo ga hemwe gawele ng'hochele. 13 Mlutilile kudita ganojile, leka gala magulu gawele gaziliche galeche kulumizwa, ila yawe mkomu.

14 Mikangaze kikala goya na wanhu weng'ha. Mikale mwelile, kwa vila kuduhu munhu yomona Mkulu ne kuwa na ukomu kota awo. 15 Mikangaze ng'hatu munhu yoneche yaleche kwajiliza isungu lya Nguluwi. Milolele leka mizabi jiliusungu jileche kuzuka hali hemwe na kuwakopola wanhu wenji kwa dunga ya heye. 16 Milolele leka homuli haleche kuwa na munhu mng'hondwa ama munhu yohamzelele Nguluwi kota Esau, yawele yaguzile uhalizi wa heye wa mlelwa wa mwaluko kwa chilyo chido hela. 17 Hemwe mvizela kota nahala hoyaganile kuhola kahi ula utambichizo uwele wa heye, nakalemelwa, hanga nakapala kwa kulila.

18 Hemwe hamfichile kuli chidunda cha Sinai, uwele kibatika kota vyowaditile wanhu wa Isilaeli, hamfichile kuli chiluli chilingwaka, hawele na jiza na chimbunga, 19 kuwele na lizi ya mhalamhanda na lizi ya ulonzi. Wala wanhu wa Isilaeli nawahulika lizi alyo nawalanda waleche kuhulika kahi lizi linji, 20 ahyo hawawezile kwimilila ilajizo lilavigwe, "Yoneche yodoliza chidunda achi na yawe munhu ama igongolo, kotowigwa maganga." 21 Ago geng'ha gangoneka nagali gakudumbiza ng'hatu, mbaka Musa nakalonga, "Ndangudumba na kukakama."

22 Ila hemwe mfika kuli chidunda cha Siyoni, kuli muji wa Nguluwi yawele mkomu. Mfika Yelusalemu, muji wa kilanga, kuwele wating'hane wahilisi wa kilanga wenji kwa maelufu menji wasangalale. 23 Mfika kuli nhing'hano ng'hulu ya walelwa wa mwaluko wa Nguluwi, wawele matagwa gawo gandichigwa kilanga. Mwangwima kumwando kwa Nguluwi yawele mtagusa wa weng'ha na hawele na muhe wa wanhu walingudita ganojile. 24 Mfika kwa Yesu yawele mhanyisi kuli ilagano lya sambi na danda ya heye ibohoche yangulonga mbuli zinojile kusinda yila ya Abeli.

25 Lelo, milolele mleche kulema kumuhulichiza ayo yalingulonga na hemwe. Kota wala walemile kumhulichiza yula yawakanyile hano mu isi hawowa wakomu, hetwe tohega ndaze kuwa wakomu wone tulingulema kumhulichiza yula yalingutukanya kulawila kilanga? 26 Mhela wula lizi lyake nalitigasa isi, ila sambi nakalagana kahi, "Ndotigasa isi kahi, ila haiwele isi hela, ila na ulanga." 27 Ulonzi awu, "Kahi" wangutulajila kota vinhu vyeng'ha vya katali vilumbigwe vyotigaswa na vyokusigwa ila vila vinhu vinyale vyopona hovitigaswa hebu.

28 Hetwe lelo, tulonje malumbo, kwa vila twangubochela undewa wohautigasika. Tumtogole na kumfugamila Nguluwi kuli kumnojeza na kumhulichiza ng'hatu, 29 mina Nguluwi wa hetwe ndo chiluli chilingwaka ng'hatu na chilingulakaza.