1 Ahyo tulole goya ng'hatu geng'ha tugahuliche, leka tuleche kwajilila. 2 Usenga ula wowapegwe wasekulu wa hetwe kukolela wahilisi wa kilanga na ulajilwa kota ukomya, leka munhu yoneche nayali hambe yauwinze na nakugalamka nakatagusigwa kota vyoiganigwe. 3 Lelo, hetwe tosulupuka ndaze wone tubeza ulohozi ukulu kota uno? Mwaluko Mkulu yuye nakaudamla ulohozi awu, wala wamhuliche nawatulonjela kota wangukomya. 4 Nguluwi kahi nakonjeza kulajila kukomya ako kwa kudita chila mbuli ya vinduzanduza na chinhu cha kububuwaza na kumha wanhu ukulu wa Muhe Yelile kota vyoyogana yuye.

5 Nguluwi hawawichile wahilisi wa kilanga wailongoze isi inyale ilinguya, ila isi yila tulingusima mbuli zake. 6 Kahi kuli Maandiko Matakatifu honhu hanji hangulonga,

"Munhu ndo choni, mbaka umjese ama

munhu ndo choni mbaka umlolele?

7 Nakumdita yawe mdodo kusinda wahilisi wa kilanga,

nakumvaliza itaji lya ukulu na kuhulichizwa,

8 Nakuwika chila chinhu hasi ha magulu ga heye."

Kwakuwika vinhu vyeng'ha hali ludali lwa heye, Nguluwi nahalechile chinhu choneche chileche kulongozwa na heye. Ila kwa sambi, hatulingona munhu yovilongoza vinhu vyeng'ha. 9 Ila twangumona Yesu, Nguluwi yamditile kwa mhela udo hela, yawe hasi kusinda wahilisi wa kilanga, leka kwa kunoga kwa Nguluwi koyatulajile hetwe, Yesu nakabagama kwa mbuli ya wanhu weng'ha. Kwa chiwalo cha magazo mbaka kubagama kwa heye, lelo twangumona kavichigwa chipembelo cha ukulu na kinamizilwa. 10 Yali inojile ng'hatu kwa Nguluwi, yalingulumba na kwimiza vinhu vyeng'ha, nakamdita Yesu yawe yogongomanya kukolela kugazigwa, leka yawegale wana wenji wehanze ukulu wa heye. Mina Yesu ndo yalinguwalohola wanhu. 11 Heye kanguweliza wanhu wihe wa hewo, hamwe na wala welizwe, weng'ha wanaye Mhaza yumwe. Ndo mina Yesu halingona soni kuwachema hewo, wang'holoze, 12 kota vyoyalingulonga,

"Gwa Nguluwi, ndowasimila wang'holozangu madito ga hegwe.

Ndokutogola kuli nhing'hano ya hewo ndokwimba lutogo lwa hegwe."

13 Kahi kangulonga,

"Ndomuwichila Nguluwi lyondilingitumbila."

Nakalutilila kulonga,

"Heni nda hano hamwe na wanhu yamhele Nguluwi wawe wanangu."

14 Lelo, kwa vila wana awo, ndo wanhu wawele na lukuli na danda, hiho du, kahi na heye Yesu nakoya yafandile kota hewo na kihanza hamwe. Nakadita ahyo leka kwa kubagama kwa heye, yalisumye Limazoga liwele na ludali lwa kubagama, 15 nakadita ago, leka yawachumulile wala wawele kwa chiwalo cha kudumba kubagama, wawa wapogozi kuli ukomu wa hewo weng'ha. 16 Mina ndo yanguzeleka kota heye hoyile kuwatanza wahilisi wa kilanga, ila nakoya kuwatanza lulelo lwa Abulahamu. 17 Ndo mina naimgana yawe kota wang'holoze heye kwa chila chinhu, leka yawe Mtambika Mkulu wa hewo yawele wa kitumbila na yawele na isungu kuli kumkolela mijito Nguluwi, leka gehile ga wanhu gosigwe. 18 Kwa vila Yesu nakemilila kugazigwa loyajezigwe, ahyo koweza kuwatanza kahi wala walingujezigwa.