1 Ilagano lya mwaluko nalyali na vihendo vyake vya kumkolela mijito Nguluwi, nahali na ihema lyelile lyakufugamila kuli isi. 2 Nahazenjigwa ihema hali chihengo cha mwaluko, nahachemigwa Honhu Helile. Amo namwali na honhu ha kuwichila chenje, chisaga na mibumunda jiwichigwe goya. 3 Kumbele kwa ipaziya lya keli, nahali na ihema nalichemigwa Honhu Helile ng'hatu. 4 Amo namwali na honhu ha kumfugamila Nguluwi ha zahabu kwa mbuli ya kufunyizila ubani na isanduku lya ilagano, lyali liwichigwe zahabu nzingo zeng'ha, mgati mwake mwali na chiya cha zahabu chiwele na chilyo chizeleche kota mana, ng'hweku ya Aluni iwele ibahule misolo na uluwa, navyo vibawo vili lya maganga vyandichigwe ilagano. 5 Mchanya mwa alyo isanduku nakwali na vilumbigwe vifandile kota wahilisi, vilingulajila kota hala honhu hana ukulu wa Nguluwi na mabawa gawo nagagonzoligwa kugubika chigubiko cha isanduku mchanya mwa honhu halingusigwa gehile. Ila sambi hatuweza kulonga kwa mgati ng'hatu kuli mbuli azo.

6 Vinhu avyo naviwichigwa goya na hamba iwa chihendo kwa watambika kwinjila chila zuwa kuli honhu ha mwaluko ha ihema lya kunze kudita mbuli za utambika. 7 Ila ndo mtambika mkulu yaliyeka ndo yalingwinjila kuli chila chihengo cha keli cha ihema, naye huditaga hiho mala imwe hela kwa mwaka, nakaganigwa kigala danda ya kumlavila Nguluwi kwa mbuli ya heye yuye na kwa mbuli ya gehile ga wanhu waditile ne kuvizela. 8 Kwa nzila ayi, Muhe Yelile kangulajila kota kwa vila lila ihema lya mwaluko nalyali ling'hali limile, nzila ya kwinjila Honhu Helile ng'hatu hainachumuligwa. 9 Nhelo ayi yangulajila mbuli vyoiwele mhela wa sambi, iwele ndolendole na nhambiko zangulavigwa kwa Nguluwi, ila haziweza kusa itunyo lya gehile kulawa kuli nhumbula za wanhu walingumfugamila Nguluwi. 10 Mbuli azi zeng'ha zangukoleka kwa chiwalo cha ndiya na vya kunwa na vihendo vinji vya mvina ya kihovuga. Mbuli azo zeng'ha haziwele za chimuhe, ludali lwake ludumaga mhela Nguluwi hoyodita goya vinhu vyeng'ha.

11 Ila Kilistu mina koya, yawele ndo mtambika mkulu wa mbuli zinojile, gawele gafichile sambi. Heye kenjila kuli ihema likulu ng'hatu liwele ligongomanyigwe ng'hatu, lyohaliditikwe na wanhu, nahaliwele honhu ha isi ino ilumbigwe. 12 Heye nakenjila Honhu Helile ng'hatu kamwe hela, haholile danda ya mhene na isenga ilogota, ila danda ya heye yuye, kukolela ayi, katugalila ugombozi wa mazuwa gose. 13 Wanhu nawawele wavu kuli mbuli za kumfugamila Nguluwi nawaweza kuhovujigwa na kwela mlukuli mwao howamizilwe danda ya mhene na ya ibuguma hamwe na mivu ja isenga ilogota. 14 Ila, kwa danda ya Kilistu, mbuli ng'hulu ng'hatu ziditagwa! Kwa ludali lwa Muhe wa Nguluwi wa mazuwa gose, Kilistu nakelavya yuye nhambiko igongomanyigwe ng'hatu kwa Nguluwi. Danda ya heye yotudita tuwe twelile kwa gala madito galingigala kubagama, leka tumkolele mijito Nguluwi yawele mkomu.

15 Ahyo heye ndo mhanyisi wa ilagano lya sambi wawele wala wachemigwe na Nguluwi woweza kutambichizwa mazuwa gose Nguluwi navyoyawalonjele. Kubagama kwa heye kwanguwagombola wanhu kulawila kwa ula wihe wowaditile mhela wa lila ilagano lya mwaluko.

16 Ulonzi wa ilagano lyangudita mijito hela wone kubagama kwa awo yaulonjile awo uhalizi woneka ndo kukomya. 17 Uhalizi hauweza kuditikwa mbaka kulawile kubagama, kwa vila uhalizi wahela ludali wone yandiche yang'hali mkomu. 18 Ndo mina nalila ilagano lya mwaluko halyaluche kukola mijito ne danda kuwabaho. 19 Chinhu cha mwaluko, Musa nakawadamlila wanhu weng'ha mizilo jeng'ha kota vyoiwele kuli malajizo, hamba nakahola danda ya isenga ilogota hamwe na mazi na kwa nhagala za isopolo na mhamba ndung'hu yochimizila chila chitabu cha malajizo na wanhu weng'ha. 20 Musa nakalonga, "Ayi ndo danda ilingutawiza ilagano lilajizwe na Nguluwi mlihulichize." 21 Vivyo du Musa nakalimizila danda lila ihema na vinhu vya mijito ja utambika kwa kumfugamila Nguluwi. 22 Ena, na kuli malajizo behi chila chinhu chohovugwa kwa kuboholigwa danda, ne kuwa hela danda, hogokusigwa gehile.

23 Vinhu vino viwele ndo kiwhana hela na mbuli za kukomya za kilanga, vyanguganigwa kuhovujigwa kwa danda. Ila vinhu vya kilanga yangugana nhambiko iwele inojile ng'hatu. 24 Mina Kilistu nahenjile Honhu Helile hazenjigwe na wanhu, chiwele ndo kiwhana hela na chila chinhu chiwele kilanga. Heye nakenjila kilanga kuko du koyawele sambi, kangwima kumwando kwa Nguluwi kwa mbuli ya hetwe. 25 Mtambika mkulu wa Wayahudi kenjilaga Honhu Helile ng'hatu chila mhela yawele na danda ya igongolo, ila Kilistu henjile amo leka yelavye yaliyeng'ha mala nyinji. 26 Mina naiwe ahyo, Kilistu nayahaganigwe kugazigwa mala nyinji kulawila kulumbigwa kwa isi. Ila sambi kalawila kamwe hela kuli kuduma kwa mhela kulavya wihe kwa kilavya heye yuye nhambiko. 27 Lelo, kota vila chila munhu kobagama mala imwe hela, hamba kokwima kumwando hali utaguso wa Nguluwi, 28 hihyo du Kilistu naye nakelavya nhambiko mala imwe hela kwa mbuli ya kusa gehile ga wenji. Hoyohiluka lwa keli, haiwele kwa chiwalo cha kusa gehile, ila ndo kwa chiwalo cha kuwalohola wala walingumbeteza.