1 Kuwa na makundo ndo kuwa na kukomya kwa mbuli zotulingitumbila, kutawiza ng'hatu mbuli zila zohatuziwene. 2 Mina wasekulu wa katali nawatogoligwa na Nguluwi kwa chiwalo cha makundo ga hewo.

3 Kwa makundo hetwe tuvizela kota isi yeng'ha nailumbigwa kwa ulonzi wa Nguluwi, vinhu vilingoneka kulawa kuli vinhu havilingoneka.

4 Kwa makundo Abeli nakamlavila Nguluwi nhambiko inojile ng'hatu kusinda ila ya Kaini. Kwa makundo ga heye nakatawizwa na Nguluwi yawe yodita galingumnojeza Nguluwi. Nguluwi yuye nakanojezwa na nhambiko za heye. Kwa makundo ga heye hanga nakabagama, yang'hali yotulonjela.

5 Kwa makundo Henoki nakaholigwa na Nguluwi, yaleche kubagama. Honeche kahi kwa vila Nguluwi nakamhola. Maandiko Matakatifu gangulonga loyali hanaholigwa, heye nakamnojeza Nguluwi. 6 Lelo, wone kwahela makundo yowa nongwa kwa munhu kumnojeza Nguluwi. Kwa vila chila munhu yalingumlutila Nguluwi imgana yakunde kota Nguluwi kabaho na kuwapa chonolo wala walingumpala.

7 Kwa makundo Nuhu nakakanyigwa na Nguluwi kwa mbuli za hamba zohambe zoneche. Nakamhulichiza Nguluwi, nakazenga ila safina moyaloholigwe heye hamwe na ivyazi lyake. Kulawila kwa ago, isi yeng'ha naitagusigwa kwa wihe, naye Nuhu nakatanganika kwa makundo.

8 Kwa makundo Abulahamu nakamhulichiza Nguluwi loyachemigwe yalute kuli isi iwele Nguluwi yalonjile kompa iwe ya heye. Abulahamu nakaluta, hanga nahavizelele koyali yoluta. 9 Kwa makundo nakekala kota mjenzi kuli isi yalagane na Nguluwi. Nakekala ako kuli ihema kota vyowekale Isaka na Yakubu. Nawo kahi nawelumba kuli kilagana kukula. 10 Mina Abulahamu nayali yobeteza muji uwele na msisi wimile nzinzili mazuwa gose, muji uwele Nguluwi yuye ndo muwanzi na ndo yuye nayauzenjile. 11 Kwa makundo naye Sala nayawele mhende nakakunda kota Nguluwi kana mong'ho wa kudita gala yalagane, ahyo, nakaweza na himila hanga nayali yalalile. 12 Ahyo, kulawila kuli munhu ayo yumwe, Abulahamu, yawele kota vila munhu yabagame, nawalawila wanhu wenji hawawazigwe kota vila nhondwe za kilanga na kota vila sangalaza za mwhani.

13 Wanhu weng'ha awa nawabagama wawele na makundo. Nawabagama wang'hali bochela mbuli ziwele Nguluwi zoyali yalagane nawo, ila kwa kutali nawagona, wasechelela, na kulonga hazelu kota hewo nawali wajenzi na nawali mmajendo kuli isi. 14 Wanhu walingulonga mbuli kota azo, wangulajila ng'hatu kota wanguipala isi ya hewo. 15 Wone nawawe woijesa isi yowalawile katali, hawaliweza kuhiluka ako konawakulechile. 16 Ila sambi wangugana isi inojile ng'hatu, ndo iwele isi ya kilanga. Ndo mina Nguluwi halingona soni howomchema heye Nguluwi wa hewo, kwa vila heye yuye mina kasinda kuwagongomanyila muji.

17 Kwa makundo Abulahamu nakamlavya nhambiko mwanage Isaka mhela Nguluwi hoyamjezile. Ayo Abulahamu yuye du, hanga nakabochela chila choyalagane na Nguluwi, ila nakakunda kumlavya mwanage wa udewele yawe nhambiko, 18 hanga Nguluwi nayali yamlonjele, "Lulelo lwako lolawila kwa Isaka." 19 Abulahamu nakakunda kuta Nguluwi koweza kuwazilipula wabagame na kwa nzila yinji, Abulahamu nakampata kahi Isaka kulawa kwa wabagame.

20 Kwa makundo Isaka nakawatambichiza Yakubu na Esau kuli ukomu wa hewo wa hamba.

21 Kwa makundo Yakubu loyali habehi kubagama, nakawatambichiza chila yumwe wa wana wa Yusufu, aku yomfugamila Nguluwi yawele yegamile yila ng'hweku ya heye.

22 Kwa makundo Yusufu loyali habehi kubagama, nakalonga mbuli ya kulawa kwa Waisilaeli kuli isi ya Misili, kahi nakawalechela ilajizo lya mbuli ya chowalinguganigwa kudita kwa chiwalo cha mizeje ja heye.

23 Kwa makundo wahaza wa Musa nawamvisa ayo mwana kwa miyezi jidatu loyapondigwe. Kwa vila nawamona kota ka mwana yanojile ng'hatu, ne hawadumbile mizilo ja mndewa.

24 Kwa makundo Musa loyawele munhu mkulu, nakalema kuchemigwa mwana wa mhinza wa Falao. 25 Nakona inoga kugazika hamwe na wanhu wa Nguluwi kusinda kusangalala kwa kudita gehile kwa mhela uchefu. 26 Nakavizela kota kugazika kwa mbuli ya Kilistu kunoga ng'hatu kusinda lufufu lweng'ha lwa isi ya Misili, mina nayali yololela chonolo cha hamba.

27 Kwa makundo Musa nakoka kulawa isi ya Misili ne kudumba ng'halazi ya Mndewa. Hahiluche kumbele, kota vila munhu yamuwene yula Nguluwi yohambe yoneche. 28 Kwa makundo nakaidita mvina ya Pasaka na kumizila ndanda mchanya mwa lwizi, leka yula mhilisi yalingukopola yaleche kuwakopola walelwa wa mwaluko wa Isilaeli.

29 Kwa makundo wanhu wa Isilaeli nawaloka bahali ya Shamu kwa vila nayali isi ng'havu, ila Wamisili lowajezile kudita ahyo nawabagama mmazi.

30 Kwa makundo kanzi za muji wa Yeliko nazigwa wanhu wa Isilaeli lowazungulute ng'hanzi azo kwa mazuwa saba. 31 Kwa makundo Lahabu yawele mng'hondwa habagame hamwe na wala wamlemile Nguluwi, kwa vila nakawabochela wala wapugajizi.

32 Lelo, ndonje choni ng'hatu? Mhela haulinguhega hebu kulonga mbuli ya Gidioni na Balaki na Samsoni na Yefuta na Daudi na Samweli na waloli wa Nguluwi. 33 Kwa makundo awa weng'ha nawetowa ngondo na wandewa, nawawasumya. Nawalongoza kwa nzila iwaditile wanhu wadite ganojile, nawabochela gala Nguluwi yalagane na hewo. Nawajidinya milomo ja misimba, 34 nawazimya chiluli ching'ang'ale, nawalohoka kubagama kwa ipanga, nawali ng'hochele ila nawapegwa mong'ho. Nahawawele wodumba kuli ngondo, nawawabilimisa wamizi wawele wajenzi. 35 Wadala nawahilulilwa wanhu wa hewo wabagame wawele wazilipuligwe. Ila wamwe wa hewo nawagazigwa, nawalema kuchumulilwa, leka wazilipuligwe nakwinjila kuli ukomu unojile ng'hatu. 36 Wanji nawabezigwa na kutowigwa ng'hobwa na wanji nawawohigwa minyololo na kutozigwa mchinweng'ho. 37 Nawatowigwa na maganga mbaka kubagama, nawatemigwa kwa msumeno vihandevihande, nawakopoligwa kwa ipanga. Nawazunguluta wawele wavalile igozi lya ming'holo na igozi lya mhene, nawali wanhu wazunwa, wagazigwe na kuditilwa mbuli zihile. 38 Isi nahaiganigwe iwe na wanhu awo. Nawali wojendajenda kugunuche na kuvidunda, wochikala kuli mipalika na mmikulubila.

39 Wanhu awa weng'ha nawatogoligwa na Nguluwi kwa chiwalo cha makundo ga hewo. Ila, hawabochele mbuli ziwele Nguluwi nakalagana na hewo. 40 Mina Nguluwi nayali yalongole kutuwichila goya vinhu vinojile ng'hatu kwa hetwe, leka hewo wafichile kuli kugongomanya hamwe na hetwe.