1 Mlutilile kigana chilukolo. 2 Mleche kusemwa kuwabochela wajenzi, mina kwa kudita ahyo wanhu wanji nawawabochela wahilisi wa kilanga ne kuvizela. 3 Muwakumbuche wala wawele mchinweng'ho ifande kota hemwe namwe mwamchinweng'ho hamwe na hewo. Kahi muwakumbuche wala walikugazigwa ifande kota vila hemwe ndo mwangugazigwa kota hewo.

4 Wanhu wone wehese wangulapigwa wanhu weng'ha wawatogole, mlume na mdala waleche kujenda na wanhu wanji. Nguluwi kowatagusa wang'hondwa.

5 Mleche kuwa wanhu walingugana sendi ng'hatu, mkunde na vila vinhu vyomlinavyo. Heye Nguluwi nakalonga, "Sikuleka ng'o, ne sikutaga." 6 Ndo mina twanguweza kulonga,

"Mkulu ndo yalingunhanza,

silingudumba chinhu.

Munhu kondita choni?"

7 Muwakumbuche vilongozi wa hemwe wawele nawadamla usenga wa Nguluwi. Mlole goya vila navyowekale mbaka kubagama. Muwinze makundo ga hewo. 8 Yesu Kilistu ndo yuyula wa mazuwa gose. 9 Mleche kuhadigwa na malanguso ganji ga chijenzi. Kunoga kwa Nguluwi ndo kulingwimiza nhumbula za hetwe ne haiwele mizilo kwa mbuli ya chilyo, mizilo ajo hajimtanzile ne munhu yoneche.

10 Hetwe tuna honhu ha kulavila nhambiko hawele wala wang'hali wodita mijito mgati mwa ihema lya Wayahudi wahela ludali lwa kulya vinhu vya heye. 11 Mtambika mkulu wa Chiyahudi kegalaga danda ya migongolo kuli Honhu Helile ng'hatu na kuilavya nhambiko kwa mbuli ya gehile, ila lukuli lwa ajo migongolo ulakazwa kunze kwa kambi. 12 Vivyo du, Yesu naye nakagazigwa mbaka nakabagama kunze kwa lwizi lwa muji leka yawelize wanhu kwa danda ya heye. 13 Lelo, tuleche kudumba, tulute ako kunze kwa kambi, tukalemigwe kota vyoyalemigwe heye. 14 Mina hano mu isi twahela muji wa kikala mazuwa gose, ila twanguulolela muji ula ulinguya. 15 Lelo, kwa kukolela Yesu, mazuwa gose tumlavile Nguluwi nhambiko ya kitogola, mina ayo nhambiko ndo ulonzi wa hetwe hotulonga kwa itagwa lya Yesu ndo Mkulu. 16 Mleche kusemwa kudita ganojile na kitanza, mina azi ndo nhambiko zilingumnojeza Nguluwi.

17 Minamize kwa vilongozi wa hemwe na kunyenyetela kwa hewo. Kwa vila hewo wanguzilolela nhumbula za hemwe nemisi na nechilo, na woganigwa kumlonjela Nguluwi mbuli ya mijito ya hewo jowaditile. Wone minamize kwa hewo wodita mijito ja hewo kwa kusechelela, waleche kona kota itunyo, wone wozidita kwa masinzo, mina ayo haiwatanza hemwe.

18 Mtulandile na hetwe. Tuvizela ng'hatu kota nhumbula za hetwe hazilingutulonjela kota twanawo wihe, kwa vila twangugana kuwa na madito ganojile kuli mbuli zeng'ha. 19 Ndanguwadedeza ng'hatu mndandile kwa Nguluwi leka yanyiluse kwa hemwe himahima vyoilinguganigwa.

20 Nguluwi nakamzilipula kuli kubagama Mkulu wa hetwe Yesu Kilistu kwa chiwalo cha danda ya heye, ilajile kukomya na kunojeza kwa ilagano lya mazuwa gose, yawele ndo mdimi mkulu wa ming'holo. 21 Ndangulanda heye yawegalile hemwe na chila madito ganojile leka mdite kota vyoyalingugana. Kahi kwa kukolela Yesu Kilistu, Kilistu yadite mgati mwa hemwe gala galingumnojeza heye. Ukulu uwe kwa heye, mazuwa gose! Ena.

22 Lelo wang'holozangu, ndanguwadedeza mbochele usenga awu wa kuwakangaza nhumbula. Ali ndo lyandiko lido hela liwele nandiwandichila. 23 Ndangugana kuwalonjelani kota mng'holozetu Timoteyi mina kachumulilwa mchinweng'ho. Wone yawahiche kufika hano, ndokuya naye hondikuya kwa hemwe.

24 Muwalamse vilongozi wa hemwe weng'ha welile hamwe na wanhu wa Nguluwi! Wang'holozetu wawele Italiya wanguwalamsani. 25 Twanguwalandilani mweng'ha isungu lya Nguluwi.