1 Heni Yakubu, chitumagwa wa Nguluwi na wa Mkulu Yesu Kilistu, ndanguwalamsani hemwe nhanzi kumi na mbili, zisambaluche kuli isi yeng'ha!

2 Wang'holozangu, msangalale mhela homfichigwa na nongwa zinji, 3 kwa vila mvizela kota kujezigwa kwa makundo ga hemwe kwangigala kwimilila. 4 Mlole kota kwimilila kwa hemwe kowafichiza mbaka kuduma, kowadita mkangale leka muwe mwenele kwa chila chinhu ne kwisilwa chinhu choneche. 5 Ila wone yumwe wa hemwe kahela luhala, lelo, kanguganigwa yamlande Nguluwi, yalinguwapa wanhu weng'ha kwa winji na kwa isungu, naye kopegwa. 6 Ila kanguganigwa kulanda kwa makundo ne kuwa na lunhwinhwi wa chinhu choneche. Munhu yawele na lunhwinhwi ndo kota nhigu ya bahali iwele kukundujizwa na kutagangwa na mbeho. 7 Munhu kota ayo yaleche kijesa kota kobochela chinhu choneche kulawa kwa Mkulu. 8 Munhu yawele na majesa, yawele na kunuwila kwili kuli gala geng'ha goyodita heye, yaleche kijesa kota kopegwa choneche kulawa kwa Mkulu.

9 Mng'holozo yawele mzunwa, kangulapigwa yasangalale mhela Nguluwi hoyomwinula, 10 naye yawele na lufufu kangulapigwa yasangalale mhela Nguluwi hoyomdulisa. Mina yawele na lufufu kokwaga kota uluwa wa kisolo. 11 Isanya lisomozaga na ivuche lyake ling'hang'hale na mizuchila jangukala, uluwa wangugwa hasi na kunoga kwesa kwangwiha. Vivyo du, yawele na lufufu kobagamizwa hoyowa mli mijito ja heye.

12 Kobweda munhu wakukundigwa kuli ngwimilila mhela wakujezigwa, kwa vila wone yemilile, kopegwa chonolo cha ukomu Nguluwi yalagane na hewo walingumgana. 13 Wone munhu yajezigwe yaleche kulonga, "Ndangujezigwa na Nguluwi." Mina Nguluwi halingujezigwa kwa wihe, naye halingumjeza munhu yoneche kwa wihe. 14 Chila munhu kangujezigwa kwa kuhadigwa na kugwila kuli maya ga heye gehile. 15 Maya gehile hogokangala, gangigala wihe, nawo wihe houkangala, hamba wangigala kubagama.

16 Wang'holozangu ndiwaganile, mleche kuhadigwa! 17 Chila ndolendole inojile na yenele na haipunguche yangudulika kulawa kilanga kwa Mhaza, yalumbile vimulimuli vyeng'ha viwele kuulanga hambe yagaluche na kahela ulajilo woneche wa kulajila kota kogaluka. 18 Kwa igano lyake yuye, nakatugalila ukomu unyale kukolela ulonzi wa heye wa kukomya, nakatudita tuwe honhu ha mwaluko hali vilumbigwe vya heye vyeng'ha.

19 Wang'holozangu ndiwaganile, mvizele mbuli ayi! Chila munhu yaleche kukawila kuhulika ila yakawile kulonga na kuzudila. 20 Kwa vila wanhu wawele nguzudila howoweza kudita ganojile gawele ga hachi hali Nguluwi. 21 Lelo mgaleche gehile na wihe womlinawo, mbochele kwa nhumbula iholile ula ulonzi unyaligwe mnhumbula za hemwe, ali lyoweza kuwalohola hemwe. 22 Mleche kihada mwemwe yeka kwa kuhulichiza ulonzi hela, ila mgaditile mijito. 23 Yoneche yalinguhulichiza ulonzi awo ila halingudita choyalingulonga, ayo ndo kewhana na munhu yalingilola kumeho hali chilolelo, 24 kochilola yuye, hamba kanguluta na baho kangisemwa vyoyali. 25 Ila munhu yalingulola goya malajizo ga kugongomanya, galinguwapa wanhu kilejeha, munhu yalingulutilila kudita ago na haiwele kuhulika hela, ila kangibatilila, munhu ayo kotambichizwa na Nguluwi kuli chila chinhu choyalingudita.

26 Wone munhu yochijesa mnhumbula kota kangumfugamila Nguluwi, ila kangulemwela kuulemeza umyango wa heye, kangihada yuye na kumfugamila kwa heye hakulingumtanza chinhu. 27 Kumfugamila Nguluwi Mhaza wa hetwe kunojile na kulihela nongwa hali heye ndo aku, kuwatanza wana walekwa na wadala wafililwe na walume wa hewo kuli magazo gawo na kilolela gwegwe baho uleche kujeligwa wavu na mbuli zihile za isi ayi.