1 Wang'holozangu, wone mwangumkunda Mkulu wa hetwe Yesu Kilistu, Mkulu wa ukulu, mleche kuwaganilila wanhu. 2 Wone munhu yumwe yawele na lufufu yavalile pete ya zahabu na nguwo zinojile kangwinjila hali nhing'hano ya hemwe na baho du nakenjila munhu yawele mzunwa yavalile nguwo zidejeche, 3 wone umbochele goya yula yavalile goya na kumlonjela, "Wikale hano honhu hawele hanojile," ila kwangumlonjela yula mzunwa, "Hegwe, wime hala," ama "Wikalise aha hasi" 4 hambi ako hakuwele kuwabagula wanji? Ndaze, namwe baho vyomlingutagusa hamlingulongozwa na majesa gehile?

5 Wang'holozangu mnyhulichize, Nguluwi kawahagula wanhu wazunwa walihela lufufu wa isi ayi leka wawe na makundo kwa winji na kubochela undewa yoyalagane nawo walingumgana. 6 Ila hemwe mwanguwabeza wanhu wazunwa. Ndaze, wawele na lufufu hawawele ndo wawo walinguwambuzani hemwe na kuwahilikani kuli utaguso? 7 Ndaze, hawawele ndo wawo walinguliliga itagwa lila linojile lya Kilistu muwele hemwe ndo wanhu wa heye?

8 Mowa mdita goya wone mlinguwinza lila ilajizo lya undewa wa Nguluwi lyandichigwe mli Maandiko Matakatifu, "Umgane myago yomlingikalasa habehi kota vyoulingigana gwegwe baho," mowa mdita mbuli zinojile. 9 Ila wone muwe mganilila wanhu, mwangudita gehile, nago malajizo ga Nguluwi, gangulajila kota wanhu awo wana nongwa. 10 Mina munhu yoneche wone yobeza ilajizo limwe hela kuli malajizo ga Nguluwi, kowa na nongwa ya kuleka kuwinza malajizo geng'ha. 11 Mina yuyula yalonjile "Uleche kudita ung'hondwa," Ndo yalonjile "Uleche kukopola." Ahyo, wone hegwe hulingudita ung'hondwa ila kwangukopola, hegwe hambe uwinze malajizo gose ga Nguluwi. 12 Lelo, mlonje na kudita kota wanhu wokuya kutagusigwa kwa malajizo galingigala kilejeha. 13 Mina, Nguluwi homonela isungu hoyomtagusa munhu yalingidaya yasowile isungu. Ila isungu lya Nguluwi lyangusumya utaguso.

14 Wang'holozangu, yotanza choni wone munhu yoneche yalonje kana makundo, ila halingulajila kwa madito? Ndaze, ago makundo goweza kumlohola? 15 Wone wang'holozo wawe hela mivalo ama vilyo, 16 yowatanza choni homuwalonjela, "Mlute goya, mkote chiluli na migute," Ne kumha vinhu vya lukuli vyowalingugana kuli ukomu wa hewo? 17 Hiho du, makundo galiyeng'ha ne madito gabagama.

18 Ila munhu yunji kolonga, "Hegwe kwanago makundo na heni ndanago madito." Undajile makundo ga hegwe ne madito heni ndokulajila makundo ga heni kwa madito. 19 Ndaze, hegwe kwangukunda kota kabaho Nguluwi yumwe hela? Goya! Ila jimazoga jangukunda ago, najo jangukakama kwa kudumba. 20 Kwa mpoka hegwe! Ndaze, ahyo kwangugana kulajilwa kota makundo ne madito gahela chinhu? 21 Ndaze, Abulahamu sekulu wa hetwe nakakundigwa kota kanginojeza hali meho ga Nguluwi? Ndo kwa madito ga heye, hala nayamlavile nhambiko mwanage Isaka kuli honhu ha kulavila nhambiko. 22 Lelo kwangona makundo ga heye nagaluta hamwe na madito gake na kahi makundo ga heye nagagongomanyizwa na chila choyaditile kwa madito ga heye. 23 Ahyo nagenela gala Maandiko Matakatifu galingulonga, "Abulahamu nakamkunda Nguluwi na kwa makundo ga heye nakamtawiza kota katanganika, ahyo Abulahamu nakachemigwa mganwa wa Nguluwi." 24 Lelo, mwangona kota munhu kanguwazigwa kota kangumnojeza Nguluwi kwa kukolela madito ne haiwele kwa makundo galiyeka.

25 Hiho du, kwa yula mng'hondwa Lahabu heye nayali yawazigwe kamnojeza Nguluwi, kwa gala goyaditile hala loyawabochele goya wala wapugajizi Waisilaeli na kuwatanza walawe kwa kukolela nzila yinji. 26 Mina kota vila lukuli luwele hela muhe, ubagama, Hiho du makundo kuli hela madito gabagama.