1 Lelo muhulichize, hemwe wanhu muwele na lufufu na mlingulongoza, mlile na kulombocheza kwa chiwalo cha nongwa zilinguwoyela hemwe. 2 Lufufu lwenu lola na nguwo za hemwe nazidakulwa na fukuzi 3 Zahabu na sendi za hemwe zigwa lungwi na lungwi lwake lowa ulolezi hali hemwe, nalo lodakula ng'huli za hemwe kota chiluli. Hemwe mikungajizila lufufu mli mazuwa aga ga kuduma. 4 Hamuwapele sendi wanhu walimile mli migunda ja hemwe, mhulichize iyowe lya hewo! Chililo cha wakolamijito walingubeta migunda ja hemwe, Mkulu wa wamizi yawele na ludali nakahulika kulila kwa hewo. 5 Mikala kuli isi kwa kisangalaza nhumbula. Mineneheza mwagoya zuwa lya kudumuligwa singo. 6 Muwatagusa kwa wihe na kuwakopola wanhu wawele hela nongwa, nawo hambe wetwanze na hemwe.

7 Lelo, wang'holozangu, mwimilile mbaka Mkulu hoyokuya. Mlole mlimi vyoyalingubeteza kwa wimililo mizuchila ja heye jilavye mbena inojile. Heye kangubeteza kwa kwimilila kulawila nhonya ya ng'humbusa walimi na luhela mbaka hala hoyobeta. 8 Hemwe namwe mkangaze nhumbula za hemwe na kwimilila nzinzili, mina zuwa lya kuya kwa heye Mkulu lyahabehi. 9 Wang'holozangu, mleche king'ung'utila chila yumwe, leka Nguluwi yaleche kuwatagusa. Milolele, mtagusa kahabehi, kema hali lwizi.

10 Wang'holozangu, muwakumbuche waloli wa Nguluwi, nawegale usenga woyalonjile kwa itagwa lya Mkulu, mlole navyowemilile magazo, namwe mfande kota hewo. 11 Twanguwachema wanhu awo wabweda kwa vila nawemilila. Namuhulika mbuli ya kwimilila kwa Ayubu na mvizela vila Mkulu navyoyamditile kuli kuduma. Kwa vila Mkulu ka liholile na kamema isungu. 12 Kwa konjezela wang'holozangu, lomuwele ngilaha, mleche kilaha kwa kilanga ama kuli isi ama kwa chinhu choneche. Mlonje, "Ena" wone mlingugana kulonga ena, namwe mlonje, "Hebu" wone mlingugana kulonga hebu, leka mleche kutaguswa na Nguluwi.

13 Ndaze, hali hemwe hana munhu yafichilwe na nongwa? Yalande kwa Nguluwi. Ndaze, hana munhu yawele yasangalale? Kanguganigwa kwimba nzimbo za kutogola. 14 Ndaze, kabaho mtamwa hali hemwe? Kanguganigwa kuwachema wasekulu wa chilundo cha wanhu walingumkunda Kilistu, nawo womlandila kwa itagwa lya Mkulu na kumbakaliza mafuta. 15 Ahyo, nawo howolanda kwa makundo, mtamwa kowa mkomu, naye Mkulu komwinula na gehile goyaditile gokusigwa. 16 Lelo, milonjele chila yumwe wihe wa hemwe na milandile leka musilwe matamwa. Kulanda kwa munhu yatanganiche kuna mong'ho wa kudita menji. 17 Eliya nayali munhu kota hetwe. Heye nakalanda kwa kukangaza ng'hatu nhonya ileche kutowa, nhonya nahaitowile hali isi kwa myaka jidatu na myezi sita. 18 Hamba nakalanda kahi, nako kilanga nakigala nhonya, na isi ilavya vilyo.

19 Wang'holozangu, wone munhu yumwe yahadigwe na yajilile kutali na kukomya, naye kahiluswa na munhu yunji, 20 mvizele kota, yula yomhilusa yawele na gehile kulawa kuli nzila ya heye ya kwajilila, koilohola nhumbula ayo kuli kubagama na gehile menji gokusigwa.