1 Wang'holozangu, wenji wa hemwe waleche kuwa walangusa. Kota vyomvizelele, hetwe walangusa, topegwa utaguso ukulu ng'hatu kusinda wanji. 2 Mina hetwe tweng'ha twanguwifya kuli mbuli nyinji. Munhu yohambe yekwang'wale kuli ulonzi, ayo ka munhu yatanganiche, koweza kuulongoza lukuli lwa heye. 3 Hetwe tweng'ha twanguwoha chipande chido cha chuma kwa ng'weso mmilomo ja falasi leka watuhulichize, kwa kukolela ayo, toweza kugalamla lukuli lwa hewo lweng'ha. 4 Kahi mlole mitumbwi mikulu, hanga ndo ng'hulu ng'hatu, jangukundujizwa na mbeho ng'hulu, ila jangulongozwa na itela idodo ng'hatu, kweng'ha koyogana kuluta mlongoza itumbwi. 5 Hiho du umyango ndo chitomo chidodo ng'hatu cha lukuli, ila wanguweza kidayila mbuli ng'hulu ng'hatu. Mlole chiluli chido choweza kusoma chisosolo chikulu. 6 Nawo umyango ufanda kota chiluli. Umyango umema wihe wa chila mbuli. Umyango ndo honhu hado ha lukuli lwa hetwe, ila naugalaga wihe kuli lukuli lweng'ha. Umyango usomaga ukomu wa hetwe kulawa kuvumbuka mbaka kubagama, kwa vila nawo wangusomigwa na chiluli cha Jehanamu.

7 Munhu kanguweza kujifuga migongolo na chila nhanzi ya migongolo na videje na vilingutambala na vinhu viwele mbahali, vyangudimigwa navyo mina navifujigwa na wanhu. 8 Ila kuduhu munhu yawezile kudima umyango. Umyango ndo chinhu chihile, umema dunga ilingukopola wanhu, 9 kwa umyango twanguta malumbo Mkulu na Mhaza wa hetwe na kwa umyango wuwo, twanguwapanjila wanhu, wanhu wawele walumbigwe kwa kiwhana na Nguluwi. 10 Mgati mwa mlomo umwe mwangulawa ulonzi wa kutogola na wa kupanjila. Wang'holozangu, mbuli azi hazilinguganigwa ziwe ahi. 11 Ndaze, nzasa imwe yoweza kulavya mazi ganojile na mazi gawele na mwino? 12 Wang'holozangu, ndaze, ikuyu lyoweza kulela mafuza ga masada? Ama igodi lya ing'ongo lyoweza kulela mafuza ga mtini? Hiho du, nzasa ilingulavya mazi gawele na mwino haiweza kulavya mazi ganojile.

13 Whaani, yawele na luhala na nyhala hali hemwe? Lelo, yalajile mbuli yila kwa madito ga heye ganojile kuli majendo ga heye ganojile na kwa madito ga heye ga uliholile galingukoleka kuli uliholile na luhala. 14 Ila wone nhumbula za hemwe zimema fihi na maya na kigana mwemwe baho, lelo, mleche kitogola na kulonga udesi hali kukomya. 15 Luhala kota alo halulingudulika kulawa kilanga, ila ndo lwa chiisi na lwa chiwunhu, kahi ndo lwa chimazoga. 16 Mina honhu hawele na fihi na kigana mwemwe baho, ndo hawele na nongwa na chila mbuli yihile. 17 Ila luhala lulingulawa kuchanya kilanga, inoga na kahi yangugana kikala goya na yangugana uliholile na kuwahulichiza wanhu wanji na imema isungu na madito ganojile, yangulela mafuza ga madito ganojile na yahela ubagulo na wala walingidaya wanoga aku wawele wahadi. 18 Wanhu walingugana kikala goya, wonyala nyhadikwa zinojile na wobeta mbena za kumnojeza Nguluwi.