1 Chila mtambika mkulu kanguhaguligwa na kuwichigwa na Nguluwi kulawa hali wanhu, heye kangukola mijito ja Nguluwi kwa chiwalo cha wanhu, kulavya ndolendole na nhambiko kwa chiwalo cha gehile. 2 Hanga heye yuye ndo kang'hochele, koweza kuwaditila kwa isungu wala wanhu wajilile na walingudita nongwa, kwa vila hawavizelele. 3 Kwa mbuli ayo kanguganigwa kulavila nhambiko haiwele kwa mbuli ya wanhu hela, ila kahi kwa chiwalo cha gehile ga heye yuye. 4 Kuduhu munhu yoweza kiyinula yawe mtambika mkulu. Chila mtambika mkulu kahagulagwa na Nguluwi kota vyoiwele kwa Aluni.

5 Hihyo du naye Kilistu, heye hehagule yuye yawe mtambika mkulu, ila nakahaguligwa na Nguluwi na kumlonjela,

"Hegwe ndo Mwanangu,

heni lehano ndiwa mhaza wa hegwe."

6 Nakamlonjela heye kahi honhu hanji, kuli Maandiko Matakatifu,

"Hegwe ndo mtambika mazuwa gose,

kwa kuwinza utambika wa Melikisedeki."

7 Yesu loyali yochikala hano muisi, nakamlanda Nguluwi kwa chililo na kulavya mahozi, yawele na ludali lwa kumlohola kuli kubagama, naye nakahulichizwa kwa vila nakamnojeza Nguluwi. 8 Hanga nayali Mwana wa Nguluwi, nakelangusa kumhulichiza Nguluwi kukolela kugazigwa. 9 Naloyasindile kukola mijito yoyapegwe na Nguluwi, ahyo ndo vyoyawalongoze wanhu weng'ha wamhulichize kuli ulohozi wa mazuwa gose, 10 naye Nguluwi nakalonga, weng'ha wavizele kota, heye ndo mtambika mkulu, kwa kuwinza utambika wa Melikisedeki.

11 Twanago menji ga kulonga kwa chiwalo cha mbuli ino, ila haiwele mbuli ya ubewe kuwalonjela, kwa vila hemwe hamlinguvizela himahima. 12 Kwa mhela awu hemwe mwahaganigwe kuwa walangusa, ila mng'hali mwangugana munhu wa kuwalangusani ulanguso wa mwaluko kuli mbuli ya usenga wa Nguluwi. Mhiluka kuli kong'ha itombo honhu ha kulya chilyo chigagadale. 13 Chila munhu yoganigwa kong'ha itombo yang'hali mwana, havizelele kudita gala malanguso ga mbuli za kutanganika. 14 Ila chilyo chigagadale ndo kwa chiwalo cha wanhu wakangale, wala wavizelele kubagula ganojile na gehile, kwa chiwalo cha kugazela malanguso na madito ga kumnojeza Nguluwi.