1 Kwa vila malajizo ndo isisila hela lya mbuli zinojile hozikuya na haiwele kota vyogalingoneka ikomya kwa zila mbuli zinji, nhambiko zizila za malajizo zilingulavigwa chila mwaka, hazihega ng'oo kuwadita wala walingumfugamila wawe wagongomanywe. 2 Kota awo wanhu walingumfugamila Nguluwi nawahovujigwe ng'hatu gehile ga hewo, nahawalingiwona kahi kota wana gehile na nhambiko azo zeng'ha zahadumile. 3 Ila nhambiko azo zangukoleka chila mwaka kuwakumbusa wanhu wavizele kota wana wihe. 4 Mina danda ya isenga ibuguma na mhene haiweza hebu kulavya gehile.

5 Ndo mina Kilistu loyoyile kuli isi, nakalonga,

"Huganile nhambiko ne nhambiko za kulakazwa,

ila nakumbichila goya lukuli. 6 Nhambiko za kulakazwa na nhambiko za kusa gehile hambe zikunojeze.

7 Aho nandonga,

‘Ulole nambuya, kudita goulingugana hegwe, gwa Nguluwi,

kota vyoyandichigwe kuli chitabu cha malajizo. Nagandichigwa kuwala heni.’ "

8 Mwaluko nakalonga, "Hambe ugane ne kunojezwa na nhambiko na ndolendole na nhambiko za kulakaza na nhambiko za kusa gehile." Nakalonga ahyo hanga nhambiko azi zeng'ha zilavyagwa kota vyogalingugana malajizo. 9 Hamba nakalonga, "Nda hano, Hegwe Nguluwi, nda goya kudita kota vyoulingugana." Ahyo Nguluwi nakosa nhambiko za katali na honhu hake nakawika nhambiko inji imwe. 10 Kwa vila Yesu Kilistu nakadita kota navyoyaganile Nguluwi, hetwe twanguhovujigwa tuwe welile kwa kulawa mli gehile ga hetwe, kwa yila nhambiko ya lukuli lwa heye loyalavile kamwe hela, itosa.

11 Chila mtambika Myahudi nakaditaga mijito ja kumfugamila Nguluwi na kulavya nhambiko zizila mala nyinji, nhambiko haziweza ng'oo kusa gehile. 12 Ila Kilistu nakalavya nhambiko imwe kwa mbuli ya gehile, nhambiko iwele na ludali mazuwa gose, hamba nakekala ubanzi wa kudilo wa Nguluwi, 13 kulawila mhela awo, kangubeteza wang'honyo wa heye wawichigwe hasi ha magulu gake. 14 Lelo, kwa nhambiko ya heye imwe, nakawadita wawe wagongomanywe mazuwa gose wala walingusigwa gehile ga hewo.

15 Naye Muhe Yelile kangutawiza ulolezi wa heye. Kangwaluka nakulonga,

16 Kangulonga Mkulu, "Ali ndo ilagano londidita na hewo,

mazuwa galinguya, kalonga Mkulu.

Ndowika malajizo ga heni mnhumbula mwao,

na kuzandika mluhala mwawo."

17 Hamba nakonjezela kalonga, "Sikumbuchila kahi gehile ga hewo, wala wihe wowalingudita."

18 Lelo, hogokusigwa gehile, hakuwa na chiwalo kahi cha kulavya nhambiko ya kusa gehile.

19 Lelo, mng'holozangu, kwa danda ya Yesu twangupegwa nhumbula yohambe idumbe ya kwinjila Honhu Helile. 20 Heye katuchumulila nzila inyale, nzila ilingutulongoza kuli ukomu, kukolela lila igubiko, luwele ndo lukuli lwake yuye. 21 Lelo twanaye mtambika mkulu yatanganiche yawele na ludali kwa mbuli ya ng'handa ya Nguluwi. 22 Ahyo tumhejelele Nguluwi kwa nhumbula zelile na makundo ga kukomya, kwa nhumbula zelile kulawa kuli majesa gehile, kwa ng'huli zihovujigwe kwa mazi ganojile. 23 Tibatilile ng'hatu ne kutigasika kitumbila kwa hetwe kotulonjile kwa mlomo, mina Nguluwi yaditile ilagano lya heye ndo wakitumbila. 24 Twitanze kiditila kwa mbuli ya kiyonjezela kikangaza kwa kigana kuli kudita ganojile. 25 Tuleche kuleka yila mbuli ya kiting'hana hamwe, kota vila wanhu wanji vyowawele ting'hana, kwa vila yanguganigwa titanze, mina zuwa lila lya Mkulu yahabehi.

26 Mina, lotulutilila kudita gehile kwa kugana twetwe, hala hotuvizelele kukomya, kuduhu nhambiko ilinguweza kulavigwa kahi kwa chiwalo cha kusa gehile. 27 Lilingupona ndo kubeteza hela kwa kukakama utaguso wa Nguluwi na chiluli ching'ang'ale lochiwabagamiza weng'ha walingumlema Nguluwi. 28 Munhu yoneche yohambe yahulichize malajizo ga Musa, kobagama ne kumonela isungu kuwele na ulolezi wa wanhu weli ama wadatu. 29 Ndaze, munhu yula yalingumbeza Mwana wa Nguluwi na kuibeza danda ya ilagano lya Nguluwi imditile yawe yahovujigwe, munhu yalingumliga Muhe wa Nguluwi, ganguganigwa yapegwe utaguso ukulu ulindaze? 30 Mina natumzela yula yalonjile, "Heni ndohilusa chibida, heni ndohilusa," Naye ndo nayalonjile kahi, "Mkulu kowatagusa wanhu wa heye." 31 Ndo mbuli ya kudumba ng'hatu wone Nguluwi yakuwiche mmoko na kutagusigwa.

32 Mkumbuchile logalawile mazuwa gala ga mwaluko lommwemweselwe lumuli lwa Nguluwi. Hanga zuwa zila namfichigwa na magazo menji, hemwe namwimilila. 33 Mhela unji namlijigwa na kubasigwa soni hazelu, kahi namwali hamwe na wala wagazigwe kota mwemwe. 34 Namilumba kuli kugazigwa kwa wawele mchinweng'ho na lombochigwe lufufu lwenu namwimilila kwa kusangalala, mina namvizela kota mwanawo lufufu lunojile ng'hatu na lwa kikala mazuwa gose. 35 Lelo, mleche kwajiliza kitumbila kwa hemwe, mina kokigalilani ndolendole ng'hulu. 36 Mwanguganigwa kuwa na wimililo leka mweneze ligano lya Nguluwi na kubochela chila choyalagane kudita. 37 Mina kota vyogalingulonga Maandiko Matakatifu,

"Ing'hali hado hela,

na yula yalinguya, kokuya,

ne hokawa hebu.

38 Ila munhu yalingudita ganojile kochikala kwa makundo,

ila loyohiluka kumbele,

heni sinojezwa naye."

39 Lelo, hetwe hatuwele hamwe na wala walinguhiluka kumbele na kwajilila, ila hetwe twahamwe na wala walingukunda na kuloholigwa.