1 Lelo, mbuli itanganiche kuli aga tulingulonga ndo ali. Hetwe twanaye mtambika mkulu yawele yekalise ubanzi wa kudilo kuli chigoda cha Undewa cha Nguluwi wa kilanga. 2 Heye nakakola mijito ja mtambika mkulu honhu helile hawele hala mgati mwa lila ihema lya kukomya lizenjigwe na Mkulu, halizenjigwe na munhu.

3 Chila mtambika mkulu kahaguligwa kumlavila Nguluwi ndolendole na nhambiko. Vivyo du, mtambika mkulu wa hetwe kangulapigwa naye yawe na chinhu cha kulavya nhambiko. 4 Kota heye Kilistu na yawe wa hano muisi, hayali kuwa mtambika, kwa vila wabaho watambika wanji wangulavya nhambiko kota malajizo vyogalingugana. 5 Mijito ja hewo ja chiutambika ndo kiwhana hela na gala gawele kilanga. Mina Musa loyali behi kuligongomanya lila ihema, Nguluwi nakamlonjela, "Ugongomanye chila chinhu kwa kuwinza kula kiwhana ya lila ihema lyoulajilwe kula kuchidunda." 6 Ila sambi Yesu kabochela mijito ja utambika jiwele jinojile kusinda ja hewo, kota vila uhanyisi woyawichile hagati ha wanhu na Nguluwi ndo kanoga ng'hatu, kwa vila lina kunoga kwake kuli ilagano lya mbuli zitanganiche ng'hatu.

7 Mina kota lila ilagano lya sambi naliwehela nongwa, hanakwalikuwa na mbuli ya ilagano lya keli. 8 Ila Nguluwi nakona wanhu wa heye wana nongwa, naye nakalonga,

"Mazuwa ganguya,

aho hondidita ilagano linyale, na wanhu wa Isilaeli na wanhu wa Yuda.

9 Ilagano ali haliwa kota lila lyondiliditile na wasekulu wa hewo

mazuwa gondiwalongoze kulawa isi ya Misili.

Hawawele wakitumbila kwa ilagano lya heni,

Mkulu nakalonga, nani nandiwaleka.

10 Mkulu kangulonga, ali ndo ilagano lyondidita na wanhu wa Isilaeli,

hogakwete mazuwa ago.

Ndowika malajizo gangu mluhala lwao,

nakwandika mnhumbula za hewo.

Heni ndowa Nguluwi wa hewo,

nawo wowa wanhu wa heni.

11 Kuduhu munhu yalingumlangusa yalingikalasa habehi,

wala yalingumlangusa mng'holeze,

‘Umzele Mkulu.’

Mina weng'ha wadodo na wang'hangala wonzela heni.

12 Ndowalechela kwa gala waditile,

ne sikumbuchila kahi wihe wa hewo."

13 Kwa kulonga mbuli ya ilagano lya sambi, Nguluwi nakalidita lila lilongole lilale na cheng'ha chilingulala ng'hatu chahabehi kuka.