1 Lelo, kwa vila ing'hali baho yila mbuli ya kulagana yoyalonjile Nguluwi ya kwinjila hali honhu ha kwesela ha heye, tilolele leka yumwe hali hetwe yaleche kulemwela kwinjila mli lubehelo alo. 2 Mina Mbuli Inojile idamligwa kwa hetwe kota vila vyoidamligwe kwa hewo wanhu wa katali. Ila usenga awo hauwatanzile ne chinhu choneche, mina nawauhulika ila hawaubochele kwa makundo. 3 Lelo hetwe tulingukunda twangupegwa kwesela ako koyatulonjele Nguluwi. Kota vyoyalonjile,

"Nanzudila nandilaha,

‘Hawokwinjila hali honhu hangu ha kwesela!’ "

Nguluwi nakalonga ago hanga mijito ja heye najali jimalile kulawila loyalumbile isi. 4 Mina Maandiko gangulonga honhu hanji, mbuli za zuwa lya saba, "Nguluwi nakesela zuwa lya saba, nakaleka mijito ja heye jeng'ha." 5 Kahi Maandiko gangulonga, "Hawokwinjila hali honhu hangu ha kwesela." 6 Lelo, ipona kwa wanhu wanji kwinjila honhu ha kwesela, ila wala wa mwaluko kuhulika Mbuli Inojile hawenjile kwa vila nawalema kuhulichiza. 7 Nguluwi nakawika zuwa linji ilinguchemigwa "Lehano," nakalonga hamba kwa nzila ya Daudi ulonzi woumalile kulonjigwa,

"Wone muhuliche lizi lya Nguluwi lehano,

mleche kuzidita nhumbula za hemwe ziwe zigagadale."

8 Wone Yoshuwa nayawe yawafichize wanhu awo honhu hala ha kwesela, Nguluwi hayalilonga hamba mbuli ya zuwa iyage. 9 Ahyo, lelo, kung'hali baho Zuwa ya Kwesela kwa wanhu wa Nguluwi, kota vila Nguluwi vyoyeselile kuli zuwa lya saba. 10 Mina, chila yokwinjila honhu ha kwesela ha Nguluwi, kokwesela kuli mijito ja heye kota vila Nguluwi vyoyalechile mijito ja heye na kwesela. 11 Lelo, twikangaze kwinjila kuli honhu aho ha kwesela, leka kuwe kuduhu ne yumwe hali hetwe yolema kuhulichiza kota hewo vyowaditile.

12 Usenga wa Nguluwi ukomu na una ludali, ndo unoleka kusinda ipanga liwele na kunoleche kwili. Lyangwinjila kota ipanga mbaka mgati hawele nhumbula na muhe vyangiting'hana, mbaka mgati mwa vitomo vya lukuli na mafuta gawele mgati mwa izeje. Ulonzi awo wangupembula kugana majesa ga nhumbula za wanhu. 13 Kuduhu chilumbigwe choneche chivisigwe hali Nguluwi, chila chinhu chigubuligwa hali meho gake heye hanga kwa heye toganigwa kulonga gala geng'ha gotuditile.

14 Kwa vila twanaye Mtambika Mkulu kusinda weng'ha yenjile mbaka kilanga, Yesu, Mwana wa Nguluwi, lelo tibatilile ng'hatu kukunda kotudamle kwa milomo ja hetwe. 15 Ayu Mtambika Mkulu wa hetwe yoweza kutonela isungu kwa ung'hochele wa hetwe, heye yuye nakajezigwa kwa chila mbuli kota hetwe ila haditile gehile. 16 Lelo, tuchihejelele ne kudumba chigoda cha undewa cha Nguluwi yawele yanojile, tubochele isungu lya heye na kunoga kwa Nguluwi, leka vitutanze kuli mhela hotugana.