1 Ndaze, siwele munhu yelejehe? Ndaze, siwele mtumigwa? Ndaze, simuwene Yesu Mkulu wa hetwe? Ndaze, hamuwele mijito ya heni kwa chiwalo cha Mkulu? 2 Hanga siwele mtumigwa kwa wanhu wanji, ila kwa hemwe nda mtumigwa. Hemwe mwa ulajilo wa utumigwa wa heni, kwa chiwalo cha kilumba kwa hemwe na Mkulu.

3 Ahi ndo vyondichilewela kwa wala walingunhagusa. 4 Ndaze, twahela hachi ya kulya na kunwa? 5 Ndaze, twahela hachi ya kumhola mdala Mkilistu kuli majendo ga hetwe, kota vila vyowalingudita watumigwa wanji, wang'holoze Mkulu na Kefa? 6 Ama heni na Banaba ndo twanguganigwa kukola mijito leka tupegwe vinhu vyotulinguganigwa kupegwa? 7 Ndaze, mwamizi wachi yalingulipa kwa chiwalo cha vinhu vya kitowela ngondo vyoyalinguvitumiya? Ndo mlimi wachi yohambe yalye mafuza ga kuli mgunda wa heye wa zabibu? Mdimi wachi yohambe yanwe itombo lya migongolo joyalingujidima?

8 Ndaze, ndangulonga mbuli azi kuli majesa ga wanhu hela? Ndaze, Malajizo ga Musa nago hagalingulonga hihyo? 9 Kwa vila nayandichigwa kuli Malajizo ga Musa, "Uleche kudinya mlomo wa isenga holipulula nyhule." Ndaze, Nguluwi vyoyalonjile ahi nayali na majesa na misenga? 10 Ndaze, Nguluwi halingulonga aga kwa chiwalo cha hetwe? Ndikomya, nagandichigwa kwa chiwalo cha hetwe, kwa vila yalingulima na yalingubeta weng'ha weli wana hachi ya kitumbila kupata honhu ha mbena. 11 Wone hetwe natunyala nyhadikwa ya muhe hali hemwe, ndaze, chowa chinhu chikulu wone tobeta vinhu kwa chiwalo cha kikala aku kulawa kwa hemwe? 12 Wone wanhu wanji wana hachi ya kupata ago kulawa kwa hemwe, ndaze, hetwe twahela hachi ayo kusinda hewo?

Ila hetwe hatutumiye hachi ayo, ila natwimilila chila chinhu leka tuleche kuilemeza Mbuli Inojile ya Kilistu. 13 Ndaze, hamvizelele kota walingukola mijito kuli ng'handa ya Nguluwi wangupata chilyo cha hewo kulawa kuli nganda ya Nguluwi na wala walingukola mijito ja kulavya nhambiko hali honhu ha kulavila nhambiko wangupegwa honhu ha nhambiko ayo? 14 Hihyo du, Mkulu nakalajiza kota wala walingudamla Mbuli Inojile wapegwe chilyo cha hewo kulawa kuli mijito ajo.

15 Ila, heni situmiye ne imwe ya hachi azo. Kahi hambe nyandiche leka mhate hachi azo, kwa heni fola kubagama kusinda kumdita yoneche yone kota ndangitogola hela. 16 Ila hondidamla Mbuli Inojile hambe nditogole kwa vila ajo ndo mijito jondipegwe. Lelo ndochona wone sidamla Mbuli Inojile! 17 Wone nanyagule kukola mijito aji kwa kugana nene, ndahaganile kupegwa chonolo, ila kwa vila ndangukola mijito aji kwa kuganigwa kukola, ahyo yangulajila kota ndo mijito jondilinguganigwa ndijikole. 18 Choni chondilinguganigwa kubochela? Chondilinguganigwa kubochela ndo kudamla Mbuli Inojile ne kupegwa chinhu ne kudayi hachi yondilinguganigwa kupegwa kwa kudamla Mbuli Inojile.

19 Heni nda munhu ndilejehe, siwele mpogozi wa munhu yoneche, ila nandidita kota mpogozi wa chila munhu, leka Kilistu yawe na wanhu wenji ng'hatu. 20 Kuli Wayahudi nandali kota Myahudi leka ndiwepate Wayahudi, kwa wala walingulongozwa na malajizo, nandidita kota yalingulongozwa na malajizo, leka ndiwepate hewo walingulongozwa na malajizo, hanga heni silingulongozwa na malajizo. 21 Kwa walihela malajizo, nandikala kota hewo, leka ndiwapate hewo. Hailingulajila kota ndakutali na malajizo ga Nguluwi, kwa vila ndangulongozwa na malajizo ga Kilistu. 22 Kwa wawele ng'hochele, nandali ng'hochele leka ndiwepate awo wawele ng'hochele. Nandita chila chinhu kwa weng'ha leka mhate kuwalohola wamwe wa hewo kuli chila nzila.

23 Ndangudita aga geng'ha kwa chiwalo cha Mbuli Inojile, leka mhate honhu ha utambichizo wake. 24 Ndaze, hamvizelele kota walingitwanza kubilima ndo wenji ila yumwe hela ndo yalingupegwa chonolo? Ahyo mbilime kuli kitwanza vila vyomlinguweza kupata chonolo. 25 Walingubilima wangiwikaga goya na kuhulichiza ng'hatu, wangudita ahyo leka wapate chipembelo chiwele changuwifigwa! Ila hetwe twangudita ahyo leka tupate chipembelo chilingikala mazuwa gose. 26 Ahyo ndangubilima kota munhu yalingugana kulongoza, ndangitowa kota yalingutowa chinhu, haiwele kota yalingutowa chakachaka. 27 Ndangulukangaza lukuli lwangu na kuludita luwe lwa kuhulichiza ng'hatu na kidita mpogozi, ndangudita ahyo leka ndeche kulemigwa hala hondisinda kuwadamlila wanhu wanji.