1 Lelo kuwala mbuli zila zomwandiche. Ena, ndo inoga kwa munhu wone hambe yahese, 2 ila kwa chiwalo cha ung'hondwa, lelo, chila mlume yawe na mche wake na chila mdala yawe na mlume wake. 3 Mlume kanguganigwa yadite galinguganigwa kwa mche wake, naye mche yadite galinguganigwa kwa mlume wake. 4 Mche kahela ludali kuli lukuli lwake, ila mlume wake, hihyo du mlume kahela ludali kuli lukuli lwake, ila mche wake. 5 Chila yumwe wa hemwe yaleche kulemeza lukuli lwa heye kwa miyage, ila hala homikundiza kudita ahyo kwa mhela udo leka muwe na mhela wa kulanda. Hamba mihiluchile kahi leka Limazoga lileche kuwajeza kwa chiwalo cha maya ga hemwe.

6 Gondilinguwalonjela sambi ndo majesa gangu hela, haliwele ilajizo. 7 Ndahaganile wanhu weng'ha wawe kota heni vyondili, ila chila yumwe kana mijito joyapegwe na Nguluwi, yumwe kana mijito aji na yunji kana mijito jila.

8 Lelo, kwa wala wawele wang'hali kuhesa na wala wawele nawafililwa na walume wa hewo ndanguwalonjela kota ya goya kulutilila kikala ne kuhesa ama kuhesigwa. 9 Ila wone hambe waweze kilemeza, wahese na kuhesigwa kwa vila fola kuhesa ama kuhesigwa kusinda kuwa na maya.

10 Kwa wala wawele na wache ama walume ndanguwapa mzilo awu, hauwele wa heni ila wa Mkulu. Mche yaleche kileka na mlume wa heye, 11 ila wone yowa ahyo kanguganigwa yekale ne kuhesigwa ama yahanyiswegwe na mlume wa heye. Mlume naye yaleche kumwandichila kalatasi ya luleko mche wa heye.

12 Kwa wala wanji ndangulonga, heni, haiwele Mkulu, ndangulonga hino, wone mlume Mkilistu kana mche yohambe yakunde, mche ayo wone kokunda kulutilila kikala na mlume ayo, yaleche kumwandichila kalatasi ya luleko. 13 Naye mdala Mkilistu wone kana mlume yohambe yakunde na ayo mlume kangukunda kulutilila kikala na naye, mdala ayo yaleche kumwandichila kalatasi ya luleko. 14 Kwa vila ayo mlume yohambe yakunde, kangubocheligwa kwa Nguluwi kwa kilumba na mche wake na mche yohambe yakunde kangubocheligwa kwa Nguluwi kwa kilumba na mlume wa heye. Wone haiwele ahyo wana wa hewo wahawele hawali wa Nguluwi, ila sambi ndo wana wa Nguluwi. 15 Ahyo, wone yohambe yakunde kangugana kumleka myage yawele Mkilistu, yamleche. Aho ayo Mkilistu yawele mlume ama mche kowa yelejehe. Kwa vila Nguluwi nakawachema hemwe leka mikale kwa kikala goya. 16 Hegwe mche kwanguvizela ndaze kota komlohola mlume wa hegwe? Ama hegwe mlume kwanguvizela ndaze kota komlohola mche wa hegwe?

17 Chila yumwe yekale kota vyoyaganigwe kikala na Mkulu, vila Nguluwi vyoyamcheme. Awu ndo mzilo wondiuwichile kuli vilundo vyeng'ha vya wanhu walingumkunda Kilistu. 18 Wone munhu nakachemigwa yawele yenjile ikumbi, lelo yaleche kidita kota henjile ikumbi na wone loyachemigwe nayali henjile ikumbi, lelo yaleche kwinjila ikumbi. 19 Kwa vila kwinjila ikumbi ama kuleka kwinjila ikumbi haiwele chinhu, ila chitanganiche ng'hatu ndo kibatilila mizilo ja Nguluwi.

20 Lelo, chila yumwe wa hemwe yawe kota vyoyawele kuli mhela woyachemigwe. 21 Ndaze, hegwe nawali mpogozi wa ngondo mhela wouchemigwe? Goya, uleche kijesa, ila wone uwe na mhela wa kilejeha, wilejehe. 22 Kwa vila yawele nakachemigwa na Mkulu wone nayali mpogozi wa ngondo, ayo kanguwaga munhu yelejehe kwa Mkulu. Hihyo du yawele nakachemigwa kwa Mkulu wone nayali munhu yelejehe, kanguwaga chitumagwa wa Kilistu. 23 Weng'ha namguligwa kwa sendi nynji, ahyo mleche kahi kuwa wapogozi wa wanhu. 24 Wang'holozangu, chila yumwe wa hemwe yekale kwa kilumba na Nguluwi kota vyoyawele kuli mhela woyachemigwe.

25 Kuwala yohanating'hana na mlume, heni ndahela mzilo kulawa kwa Mkulu, ila ndangulavya majesa ga heni kota munhu yawele wa kukundigwa kwa isungu lya Mkulu. 26 Lelo, kwa kiwhana na magazo gawele sambi ndangijesa kota yagoya yekale kota vyoyawele. 27 Ndaze, mana kuhesa? Lelo, uleche kumleka mchewako. Ndaze, hunahesa? Lelo uleche kuhesa. 28 Ila wone kohesa kowa huditile gehile naye mhinza wone kohesigwa kowa haditile gehile. Ila wala walinguhesa wangufichigwa na magazo menji kuli isi ayi, ila heni ndahaganile ago galeche kuwafika hemwe.

29 Wang'holozangu, ndangugana kulonga hino, mhela uponile ndo udo. Kulawa sambi wala wawele nawahesa wekale kota hawanahesa, 30 walingulila wawe kota hawalingulila na walingusangalala wawe kota hawalingusangalala na walingugula wawe kota hawalingugula, 31 Nawo walingukola mijito kwa chiwalo vinhu vya isi ayi wawe kota wahela chakukola. Kwa vila isi ayi kota vyotulinguvizela, yangukola hela.

32 Ndangugana hemwe mleche kuwa na lunhwinhwi. Munhu yawele hanahesa kangukolaga mijito ja Mkulu, leka yamnojeze Mkulu. 33 Mlume yahesile kangukolaga mijito ja isi leka yamnojeze mche wake 34 na majesa ga heye nagagawanuka. Mdala yawele hanaholeka ama hanating'hana na mlume kangukolaga mijito kwa chiwalo cha Mkulu leka yawe yelile kuli lukuli na Muhe. Ila yawele nakahesigwa, kangukolaga mijito ja isi leka yamnojeze mlume wa heye.

35 Ndanguwalonjelani aga kwa chiwalo cha mzidi wa hemwe na haiwele kwa chiwalo cha kuwalemeza. Ndangugana muwe na kiwika goya kunojile leka muweze kumkolela mijito Mkulu kwa nhumbula na kunuwila kumwe. 36 Wone munhu kangona kota halingumditila goya mhinza yawele nakambanichila hala holeka kumhesa na miyaka jake jangupuluta na kangugana kuhesa, yadite kota vyoyalingugana, yahese, kowa haditile gehile. 37 Ila mlume yawele nakamula kulawa mnhumbula ya heye kota hambe yahese na wone kanguweza kulongoza maya ga heye na kwamula ndaze vyoyodita, lelo kangudita goya ng'hatu wone koleka kumhesa ayo mhinza. 38 Ahyo, mlume yalinguhesa kangudita goya ila yalingwamula kuleka kuhesa kangudita goya ng'hatu.

39 Mdala yahesigwe kanguwaga yawichigwe mchinweng'ho na mlume wa heye kwa mhela weng'ha wa kikala kwa mlume wa heye. Ila mlume ayo wone yabagame, mdala ayo kowa yelejehe na wone yagane koweza kuhesigwa na mlume yoneche yalingumgana, ila kanguganigwa yawe Mkilistu. 40 Ila, vyondilingona kota fola yasigale ne mlume. Ago ndo Majesa gangu, ndangijesa kota ndina Muhe wa Nguluwi.