1 Lelo, wang'holozangu, ndangugana kuwadita mkumbuchile kuwala Mbuli Inojile iwele nandiidamla kwa hemwe, namwe namuibochela na kwima nzinzili mgati mwake. 2 Kwa kumuwinza heye mwanguloholigwa, wone mwanguuwinza ulonzi uwele nandiwadamlila, wone makundo ga hemwe hagawele ga hihi hela!

3 Nandiwapa hemwe mbuli zitanganiche ng'hatu ziwele heni nambochela, kota Kilistu nakabagama kwa gehile ga hetwe, kota Maandiko Matakatifu vyogalingulonga, 4 kota nakatiligwa, nakazilipuka zuwa lya kadatu kota vyogalingulonga Maandiko Matakatifu, 5 kota nakamlawila Kefa, hamba nakawalawila wala kumi na weli. 6 Hamba nakawalawila baho du wala walingukunda wawele mzidi ya miya zihano (500), wawele wenji wa hewo wang'hali wakomu ila wamwe nawabagama. 7 Hamba nakamlawila Yakubu kahi nakawalawila watumigwa weng'ha. 8 Kuduma nakandawila nani, heni ndiwele kota namhondigwa kung'hali mhela wa kupondigwa. 9 Kwa vila heni ndo mdodo kusinda watumigwa weng'ha, siwele nguganigwa kuchemigwa mtumigwa, kwa vila nandichigaza chilundo cha wanhu walingumkunda Kilistu. 10 Ila, kwa igano lya Nguluwi, nandiwa kota vyondili, na igano lya heye kwa heni haliwele lya hihi hela. Nang'hola mijito kusinda watumigwa weng'ha, ila haiwele heni ila ndo lila igano lya Nguluwi liwele nalyali hamwe na heni. 11 Ahyo wone nandali heni ama hewo, aga ndo tulingugadamla na aga ndo gawele namgakunda.

12 Lelo, wone natudamla kota Kilistu nakazilipuka kulawa kwa wabagame, lekachoni wamwe wa hemwe wangulonga kota kwa haduhu kuzilipuligwa kwa wabagame? 13 Wone kwa haduhu kuzilipuligwa kwa wabagame, lelo Kilistu naye hazilipuche. 14 Wone Kilistu hazilipuche kulawa kwa wabagame, kudamla kwa hetwe ndo kwa hihi hela na makundo ga hetwe gahela ga hihi hela. 15 Mzidi wa ago twangoneka twa walolezi wa udesi kuwala Nguluwi kwa vila natulavya ulolezi kuwala Nguluwi kota nakamzilipula Kilistu kulawa kwa wabagame, chinhu chiwele ndo udesi wone wabagame hambe wazilipuche. 16 Wone wabagame hambe wazilipuligwe, lelo, naye Kilistu hazilipuche. 17 Kahi, wone Kilistu hazilipuligwe makundo ga hetwe ndo ga hihi hela, namwe mwa kuli gehile ga hemwe. 18 Lelo, weng'ha wawele nawabagama kuno wawele nawelumba na Kilistu nawajilila. 19 Wone kitumbila kwa hetwe mgati mwa Kilistu ndo kwa chiwalo cha kikala aku hela, twanguganigwa konelwa isungu kusinda wanhu weng'ha kuli isi.

20 Ila ndo kukomya kota Kilistu nakazilipuligwa kulawa kwa wabagame, wa mwaluko hali wala wawele nawawasa kuli wabagame. 21 Kota vila kubagama vyokugaligwe na munhu yumwe, hihyo du kuzilipuka kulawa kwa wabagame nakwambuzwa na munhu yumwe. 22 Kota vila wanhu weng'ha vyowalingubagama na kilumba na Adamu, hihyo du weng'ha wozilipuligwa na kilumba na Kilistu. 23 Ila chila yumwe kozilipuligwa kwa kiwhana na kiwika goya heye yuye. Kilistu nayali wa mwaluko kuzilipuligwa, hamba hoyohiluka, wala wawele wa heye wozilipuligwa. 24 Hogokoleka ago, kuduma kwa isi kofika mhela uwele Kilistu hoyomhilusila Nguluwi Mhaza undewa, hala hoyosinda kuudumya chila ulongozi na ludali na mong'ho. 25 Kwa vila Kilistu kanguganigwa yalongoze mbaka hoyowasumya wang'honyo wa heye weng'ha na kuwawika hali magulu ga heye. 26 Mng'honyo yawele kowa wa kuduma kudumigwa ndo kubagama. 27 Kwa vila maandiko matakatifu gangulonga, "Nguluwi nakaviwika vinhu vyeng'ha hali magulu ga heye." Ila maandiko hogolonga, "Vinhu vyeng'ha naviwichigwa hali magulu gake leka yavilongoze." Mbuli ayi hailingumuwala Nguluwi kota ka yumwe hali vinhu avyo kwa vila heye Nguluwi ndo yaviwichile vinhu avyo hali Kilistu. 28 Hoyosinda kuviwika vinhu vyeng'ha hali ulongozi wa Kilistu, aho naye Mwana yawele ndo Kilistu hoyochiwika hali Nguluwi, yawele nakaviwika vinhu vyeng'ha hali ulongozi wa heye, leka Nguluwi yalongoze vyeng'ha.

29 Lelo, wone haduhu kuzilipuka, ndaze kuwala wanhu walingubatizwa kwa chiwalo cha wabagame? Wone wabagame hambe wazilipuligwe, lekachoni wanhu wangubatizigwa kwa chiwalo cha hewo? 30 Natwe, lekachoni twanguuwika ukomu wa hetwe kwa wang'honyo chila mhela? 31 Wang'holozangu, ndangitwanza na kubagama chila zuwa! Lutogo londilinalo kwa hemwe kuli kilumba na Kilistu Yesu Mkulu wa hetwe lwangundita ndiwikule mbuli ayi. 32 Wone kunuwila kwa heni kwahawele kwa chiwunhu hela, kitowa kwa heni na migongolo jing'ang'ale hano Efeso kwahangalile chinhu chachi? Wone wanhu hambe wazilipuligwe, lelo "Tulye na kunwa, kwa vila mitondo twangubagama."

33 Waleche kuwahada! "Goloko wehile wanguwifyaga madito ganojile." 34 Mhiluchile kijesa goya na mleche kudita gehile. Wamwe wa hemwe hamumzelele Nguluwi. Ndanguwalonjela kota soni ng'hatu kwa hemwe!

35 Ila munhu koweza kuuza, "Ndaze wabagame wozilipuligwa? Wowa na lukuli luli ndaze?" 36 Kuuza ako ndo upoka! Hounyala nyhadikwa, wone haibagama, haikota. 37 Hambe mnyale lukuli luwele lolawila hamba ila chomlingunyala ndo nyhadikwa hela, yoweza kuwa ya ngano ama ya chinhu chiyage. 38 Nguluwi kanguyipaga ayo nyhadikwa lukuli luwele kangulugana yuye, chila nyhadikwa kanguyipaga lukuli lwa chiuyeng'ha.

39 Ng'huli za vilumbigwe vyeng'ha hambe ziwhane. Ng'huli za wanhu za vinji na ng'huli za migongolo za vinji na ng'huli za videje za vinji na ng'huli za somba za vinji. 40 Zabaho ng'huli za kilanga na ng'huli za kuli isi, kunoga kwa ng'huli za kilanga kwa vinji, na kunoga kwa ng'huli za muisi kwa vinji. 41 Kwabaho kunoga kwa isanya na kunoga kwa nyelezi na kunoga kwa nhondwe, nhondwe nazo haziwhanile kwa kunoga.

42 Ahyo ndo vyoiwa kuli kuzilipuka kwa wabagame, kota vila nyhadikwa, lukuli lwangutilagwa kuli misanga, lwangola, ila lwozilipuligwa lukuli luwele goya. 43 Hutilagwa kuli soni, lwanguzilipuligwa kuli ukulu, hutilagwa uwele ng'hochele, lwanguzilipuligwa luwele na mong'ho. 44 Houtiligwa lukuli lwa chiwunhu, lwanguzilipuligwa lukuli lwa chimuhe. Wone hana lukuli lwa chiwunhu, hana lukuli lwa chimuhe. 45 Kwa vila maandiko matakatifu gangulonga, "Munhu wa mwaluko Adamu, nakalumbigwa na Nguluwi leka yawe na ukomu," Ila Adamu wa kuduma ndo Muhe yalinguwapa wanhu ukomu. 46 Ila lulingulongola kwa hegwe haluwaga lukuli lwa chimuhe, ila lula lukuli lwa chiwunhu, hamba lula lukuli lwa chimuhe. 47 Munhu wa mwaluko Adamu, nakalumbigwa kwa misanga, nakalawa mmisanga, Adamu wa keli nakalawa kilanga. 48 Weng'ha wawele muisi nawewhana kota heye yalumbigwe kwa misanga, wala wawele wa kilanga nawewhana kota yula yalawile kilanga. 49 Kota vila vyotiwhanile na yula yalumbigwe kwa misanga, hiho du tochiwhana na yula yalawile kilanga. 50 Lelo wang'holozangu, ndangulonga hino, chila chiwele nachiditigwa kwa lukuli na danda hachiweza kuhalila Undewa wa Nguluwi na chilinguweza kuwifigwa hachiweza kuhalila honhu ha chinhu chohambe chiwifigwe.

51 Mhulichize, ndanguwalonjela mbuli ivisigwe, hetwe hatubagama tweng'ha, ila tweng'ha togalamligwa. 52 Yowa sekunde imwe hela, togalamligwa baho du. Ali lyolawila hala mhalamhanda ya kuduma hoipembigwa. Holihulikwa lizi lya mhalamanda wala wawele nawabagama wozilipuligwa leka wekale mazuwa gose, aho ndo togalamulwa weng'ha. 53 Kwa vila Nguluwi kozigalamla ng'huli za hetwe leka zileche kuwifigwa mazuwa gose. Lukuli alu lulingubagama lwogalamlwa na kuwa lukuli lohambe lubagame 54 Lelo lukuli alu lulinguwifigwa lovala lukuli lohambe luwifigwe, aho ndo wokwenela wula ulonzi uwele nawandichigwa, "Kubagama nakudumigwa, kusumya nakwenela!"

55 "Gwa kubagama, kusumya kwa hegwe kwa kohi?

Kwa kohi kuwifya kwa hegwe?"

56 Kubagama kwanguwaga na mong'ho wa kulumiza kwa chiwalo cha gehile na ludali lwa gehile lwangulawa kuli malajizo ga Musa. 57 Ila tumtogole Nguluwi yalingutupa kusumya kwa kukolela Mkulu wa hetwe Yesu Kilistu.

58 Lelo wang'holozangu wondiwaganile, mwime nzinzili na mikangaze. Mazuwa gose mlutilile kukola mijito ja Mkulu kuno mvizele kota mijito jomlingujikola kuli utumagwa wa Mkulu hajikwaga hihi hela.