1 Hana mbuli zitanganiche kuwala ung'hondwa hali hemwe uwele haunawahika kulawila ne kwa wanhu wohawamzelele Nguluwi. Nandonjelwa kota hana yumwe wa hemwe kanguwasa na mche wa mhaza wa heye! 2 Mwanguweza ndaze kidaya? Yahawele goya kwa hemwe kulombocheza, hamba munhu ayo yawinjigwe hali hemwe. 3 Hanga siwele hamwe na hemwe kuli lukuli ila nda hamwe na hemwe kuli muhe. Ahyo mana ndimtagusa munhu yawele nakadita mbuli ayo. 4 Mhela homting'hana kwa itagwa lya Mkulu Yesu, nani hondiwa hamwe na hemwe kuli muhe, lelo, kwa ludali lwa Mkulu wa hetwe Yesu, 5 mumuwiche munhu ayo mmoko mwa Limazoga, leka lukuli lwake luwifigwe na muhe wa heye uloholigwe kuli zuwa lya Mkulu.

6 Kidaya kwa hemwe hakunojile! Ndaze, hamvizelele kota usaso udo wanguditaga utimbo weng'ha usase? 7 Miyelize, mtaje kutali usaso wa katali leka muwe utimbo unyale wohauwichigwe usaso kota vyomuwele kuli mhela awu, kwa vila Kilistu, lyana ing'holo lya hetwe lya mnvina ya Pasaka nakalavigwa leka yawe nhambiko. 8 Lelo tuleche kuidita mnvina ayi kwa usaso wa katali, usaso wa kunuwila kwihile na wihe, ila kwa ibumunda lyohaliwichigwe usaso, ibumunda linojile na lya kukomya.

9 Nandiwandichila kuli baluwa ya heni kota mleche kihanza na wang'hondwa. 10 Haiwele kota mleche kihanza na wanhu weng'ha kuli isi wawele wang'hondwa na wawele na maya yihile na walinguvaba na walingufugamila jimalukolo. Kwa kudita ahyo mwahaganigwe muche kuli isi ayi. 11 Chonyandiche ndo chino, mleche kihanza na mng'holozo Mkilistu yawele ndo mng'hondwa ama yawele na maya yihile ama yalingufugamila jimalukolo ama yalinguwalonjeleza wanji kwa udesi ama yalingugala ama yalingubunza. Munhu kota ayo ne kulya mleche kulya na heye.

12 Ndaze, mbuli ya heni ndo kuwatagusa wanhu wawele hanze ha chilundo cha wanhu walingumkunda Kilistu? Awo Nguluwi kowatagusa. Ndaze, hemwe hamlinguganigwa kuwatagusa wala wawele hali hemwe? 13 Nguluwi kowatagusa awo wawele kunze ha chilundo cha wanhu walingumkunda Kilistu. Kota maandiko matakatifu vyogalingulonga, "Hemwe mumuwinje mwihe hali hemwe."