1 Mbinze heni gondilingudita kota vyondilingumuwinza Kilistu.

2 Ndanguwatogola kwa vila mwangukumbuchila kuli chila mbuli na kwa kubatilila malanguso gondiwapele. 3 Ila ndangugana mvizele kota Kilistu ndo mutwi wa chila mlume na mlume ndo mutwi wa mche wake na Nguluwi ndo mutwi wa Kilistu. 4 Lelo chila mlume yalingulanda ama yalinguwikula usenga wa Nguluwi kuno yawele yagubiche mutwi wa heye, ayo kangumbeza Kilistu. 5 Ila mdala yalingulanda ama kuwikula usenga wa Nguluwi ne kugubika mutwi wa heye, kangumbeza mlume wa heye, kwa vila kangiwhana na mdala yawele nakabeya mnvili kumutwi kwa heye. 6 Mdala yohambe yagubiche mutwi wa heye fola yabeye mnvili za heye. Ila ndo soni kwa mdala kukang'hana ama kubeya mnvili za heye, lelo, fola yagubiche mutwi wa heye. 7 Hainojile kwa mlume kugubika mutwi wa heye kwa vila kangiwhana na Nguluwi na ukulu wa Nguluwi, ila mdala ndo ukulu kwa mlume wa heye. 8 Kwa vila mlume halawile kwa mdala, ila mdala nakalawa kwa mlume. 9 Mlume halumbigwe kwa chiwalo cha mdala, ila mdala nakalumbigwa kwa chiwalo cha mlume. 10 Ahyo kwa chiwalo cha wahilisi, mdala kanguganigwa yagubiche mutwi wa heye kota ulajilo ulingulajila ka hasi ha ludali lwa mlume wa heye. 11 Ila hali Mkulu, mdala hawele chinhu wone yawe hela mlume, naye mlume hawele chinhu wone yawehela mche. 12 Kota vila mdala vyoyalawile kwa mlume, hihyo du mlume nakapondigwa na mdala, chila chinhu changulawa kwa Nguluwi. 13 Mwamulile mwemwe, ndaze, yangumgana mdala kumlanda Nguluwi ne kugubika mutwi? 14 Kulawa katali lukuli lwangulajila kota kwa mlume kuwa na mnvili ng'huli ng'hatu ndo soni kwa heye yuye. 15 Ila kwa mdala kuwa na mnvili ng'hulu ng'hatu ndo ukulu kwa heye, nakapegwa mnvili ng'hulu ng'hatu leka zimgubiche. 16 Wone munhu kangugana kitwanza kwa mbuli ayi, lelo, yavizele kota hetwe twahela chihendo chinji, ne vilundo vya wanhu walingumkunda Kilistu na Nguluwi vyahela vihendo viyage.

17 Lelo kuli malajizo aga, siweza kuwatogola hemwe ne hado kuwala aga. Nhing'hano za hemwe mlingukunda zangigala kwajiliza vinhu kusinda vinhu vya mzidi. 18 Mwaluko wa geng'ha, ndanguhulika kota homting'hana kwangulawilaga kilewa hali hemwe. Nani ndangukunda, 19 kwa vila yanguganigwa hawe na kitwanza hali hemwe, leka wala walingukundigwa wazeleche. 20 Homting'hana mwangijesa kota mwangulya chilyo cha Mkulu, ila haiwele ahyo! 21 Kwa vila homulya chila munhu kangulya ne kumbeteza myage, mbaka yangulawila wamwe wa hemwe wanguwa na nzala na wanji wagalile! 22 Ndaze, hamuweza kulya na kunwa kuli ng'handa za hemwe! Ama mwanguchibeza chilundo cha wanhu walingumkunda Kilistu na Nguluwi na kuwabasa soni walihela chinhu? Ndiwalonjele choni? Ndaze, ndiwatogole kwa mbuli ayi? Hebu! Haiwele kwa mbuli ayi.

23 Kwa vila nambochela kwa Mkulu gala malajizo gondiwalechele, kota nechilo yila Mkulu Yesu loyalavigwe, nakahola ibumunda, 24 nakalonga malumbo kwa Nguluwi, nakalimogola, nakalonga, "Alu ndo lukuli lwangu luwele kwa chiwalo cha hemwe, mdite hino kwa kung'humbuchila." 25 Hihyo du loyasindile kulya, nakahola chizombe cha divai, nakalonga, "Achi ndo chizombe cha ilagano linyale lilingutawizwa kwa danda ya heni. Mdite hino, chila homunwa chizombe chino, kwa kung'humbuchila."

26 Kwa vila chila homulya ibumunda lino na kunwa chizombe chino, mwangudamla kubagama kwa Mkulu mbaka hoyokuya kahi. 27 Ahyo, chila munhu yawele kolya ibumunda alyo ama kunwa chizombe acho cha Mkulu vyohambe iganigwe, kowa na nongwa ya kudita gehile hali lukuli na danda ya Mkulu. 28 Lelo, chila munhu yelole goya tandi, hamba ndo yalye ibumunda alyo na kunwa chizombe acho, 29 kwa vila yalingulya na kunwa ne kijesa mana ya lukuli lwa Mkulu, kangulya na kunwa utaguso wa heye yuye. 30 Achi ndo chiwalo cha wenji hali hemwe wa ng'hochele na walingutamika na wanji nawabagama. 31 Wone natuwe tilolile goya hatwali taguswa ahyo. 32 Ila hotutagusigwa na Mkulu, twangulangusigwa kota tuwe na kuhulichiza, leka tuleche kutagusigwa hamwe na wanhu wa isi. 33 Ahyo, wang'holozangu, homting'hana kulya, chila munhu yambeteze myage. 34 Wone hana yoneche yawele na nzala, yalye hakaye hake, leka kiting'hana kwa hemwe kuleche kwambuza utaguso. Ila kuwala mbuli zinji, ndowalonjela hondikuya.