1 Heni Paoli, ndilinguchemigwa mtumigwa wa Yesu Kilistu kwa igano lya Nguluwi, hamwe na mng'holozangu Sostenesi, 2 twanguwandichila hemwe chilundo cha wanhu walingumkunda Kilistu muwele kuli muji wa Kolinto, hemwe namditwa muwe welile kuli kilumba na Kilistu Yesu, namchemigwa muwe wanhu wa Nguluwi, hamwe na wanhu weng'ha honeche walingumlanda kwa itagwa lya Mkulu wa hetwe Yesu Kilistu yawele Mkulu wa hewo na wa hetwe kahi.

3 Ndagugana muwe na kunoga na kikala goya kulingulawa kwa Nguluwi Mhaza wa hetwe na kwa Mkulu Yesu Kilistu.

4 Ndangulonga malumbo kwa Nguluwi wa heni mazuwa gose, kwa chiwalo cha kunoga kwa heye koyawapele hemwe kwa kukolela Yesu Kilistu. 5 Kwa vila kwa kilumba na Kilistu nampegwa lufufu lwa chila chinhu, kuli kulonga kwa hemwe na kuli luhala lwa hemwe lweng'ha. 6 Kwa vila usenga ulingumuwala Kilistu nautawizwa mgati mwa hemwe, 7 mbaka hambe mpunguchilwe na mbuli yoneche ya Muhe Yelile homumbeteza Mkulu Yesu Kilistu yagubuligwe. 8 Heye kowadita muwe nzinzili mbaka kuduma leka mpate koneka ne nongwa kuli zuwa lila lya Mkulu wa hetwe Yesu Kilistu. 9 Nguluwi ndo wa kukundigwa, heye nakawachema hemwe leka muwe chinhu chimwe na Mwanage Yesu Kilistu Mkulu wa hetwe.

10 Wang'holozangu, ndanguwadedeza kwa itagwa lya Mkulu wa hetwe Yesu Kilistu, mihanyise kuli chila mbuli yomlingulonga, haleche kuwa na kilewa hali hemwe, muwe na majesa gamwe na kunuwila kumwe. 11 Wang'holozangu, mbuli zonyhuliche kulawa kwa wanhu wa lukolo lwa Kiloe zangulajila hazelu kota hana kilewa hali hemwe. 12 Ndangugana kulonga hino, chila yumwe wa hemwe kangulonga vilivinji, yumwe kangulonga "Heni nda wa Paoli." Yunji, "Heni nda wa Apolo." Yunji kahi, "Heni nda wa Kefa." Na yunji kahi, "Heni nda wa Kilistu." 13 Ndaze, Kilistu nakagawanuka? Ndaze, Paoli ndo nakawambigwa kwa chiwalo cha hemwe? Ndaze, nambatizigwa kwa itagwa lya Paoli?

14 Ndangulonga malumbo kwa Nguluwi kwa vila sinambatiza munhu hali hemwe ila Kilisipo na Gayo. 15 Ahyo, haduhu munhu yalinguweza kulonga kota nakabatizigwa kwa itagwa lya heni. 16 Ena, nandiwabatiza wanhu wa ng'handa ya Stefanasi, ila mzidi wa wano hambe ndikumbuchile kota nandimbatiza munhu yunji. 17 Kilistu handajize kuya kubatiza, ila kudamla mbuli inojile, ndamle ne kitumbila uwanzi wa wanhu leka mong'ho wa kubagama kwa Kilistu kuli msalaba utawizwe.

18 Kwa vila usenga ulinguwala kubagama kwa Kilistu kuli msalaba ndo mbuli ya upoka kwa wala walingwajilila, ila kwa hetwe tuwele kuli nzila ya kuloholigwa, usenga awo ndo mong'ho wa Nguluwi. 19 Kwa vila maandiko matakatifu gangulonga,

"Ndowifya nyhala za wanhu wawele na nyhala,

na luhala lwa wawanzi ndolutaga kutali."

20 Lelo, kakohi yawele na luhala? Kakohi mlangusa wa malajizo ga Musa? Na kakohi yazidahe kitwanza kuli mhela awu? Nguluwi nakadita luhala lwa isi ayi luwe upoka.

21 Kwa vila kwa luhala lwa Nguluwi, wanhu hawoweza kumzela Nguluwi kwa luhala lwa hewo wawo. Ila Nguluwi nakagana kuwalohola wala walingukunda kwa kukolela chila chiwele wawele na luhala wanguchona kota ndo upoka, mina ndo usenga wotulinguudamla. 22 Wayahudi wangugana ulajilo na Wagilichi wangupala luhala, 23 ila hetwe twangumdamla Kilistu yawele nakawambigwa. Kwa Wayahudi mbuli ayi yangoneka kota izudizo na kwa wanhu wa isi zinji ndo upoka. 24 Ila kwa wala wachemigwe na Nguluwi, Wayahudi na Wagilichi, Kilistu ndo mong'ho wa Nguluwi na luhala lwa Nguluwi. 25 Kwa vila chilingoneka kota ndo upoka wa Nguluwi china luhala ng'hatu kusinda luhala lwa munhu na chilingoneka kota ndo ung'hochele wa Nguluwi, china mong'ho kusinda mong'ho wa munhu.

26 Wang'holozangu, mkumbuchile mhela lomchemigwe na Nguluwi. Wenji wa hemwe nawali hela luhala kwa majesa ga wanhu, wenji nawali hela mong'ho ama wanhu walingulawa kuli ulongozi. 27 Ila Nguluwi nakavihagula vinhu vya upoka kuli isi leka yawabase soni wawele na luhala, Nguluwi nakavihagula vinhu viwele ng'hochele kuli isi leka yawabase soni wawele na mong'ho. 28 Nguluwi nakavihagula vinhu viwele navibezigwa kuli isi ayi, vinhu viwele vya haduhu leka yavibase soni vila viwele baho. 29 Lelo, haduhu munhu yalinguweza kidaya hali Nguluwi. 30 Nguluwi heye ndo yawaditile hemwe milumbe na Yesu Kilistu. Nguluwi nakamdita Kilistu yawe luhala lwa hetwe, kwa kukolela heye natuhanyiswa hamwe na Nguluwi, twanguwa wanhu wa Nguluwi na kugomboligwa. 31 Lelo, kota vyoyandichigwe kuli Maandiko Matakatifu,

"Yalingugana kidaya,

yetogole kwa chiwalo cha mijito ja Mkulu."