1 Wang'holozangu, siwezile kulonga na hemwe kota wanhu wawele na Muhe, ila nandonga na hemwe kota wanhu wa kuli isi, kota vyali kuli kumkunda Kilistu. 2 Nandiwapa itombo na haiwele kwa chilyo chigagadale kwa vila hamuwele goya kwa chilyo acho. Ena, mbaka mhela awu hamuwele goya. 3 Hemwe mng'hali mwa wanhu wa kuli isi ayi kwa vila hana fihi na kilewa hali hemwe. Mbuli azo zangulajila hazelu kota hemwe ndo wanhu wa kuli isi, mwangikala kwa kuiwinza isi. 4 Kwa vila yumwe wa hemwe hoyolonga, "Heni nda wa Paoli," na yunji, "Heni nda wa Apolo," Ndaze, hemwe hamuwele wanhu wa hihi hela?

5 Apolo ndo whaani? Na Paoli ndo whaani? Hetwe twa vitumagwa hela tuwele natuwegalila hemwe kikala goya. Chila yumwe wa hetwe kangukola mijito joyapegwe na Mkulu. 6 Heni nanyhala nyhadikwa, Apolo nakaboholela mazi ila yaiditile nyhadikwa izuche ndo Nguluwi. 7 Ahyo, yanyhalile na yaboholele mazi hawawele chinhu ila Nguluwi yali yeka yawele kanguiditaga ukule. 8 Yalingunyala nyhadikwa kana majesa galingiwhana na yalinguboholela mazi, hanga chila yumwe kobochela chonolo cha heye kwa kiwhana na mijito jake. 9 Kwa vila hetwe twa wakola mijito hamwe na Nguluwi, namwe ndo mgunda wa Nguluwi, hemwe mwa ng'handa ya Nguluwi.

10 Kwa kunoga koyamhele Nguluwi, nambika msisi kota yalinguzenga yazidahe ng'hatu na munhu yunji kanguzenga mchanya mwa msisi awo. Lelo, chila yumwe kanguganigwa yelolele vila vyoyalinguzenga mchanya mwa msisi awo. 11 Kwa vila haduhu munhu yoweza kuwika msisi wunji ila wula uwele nauwichigwa uwele ndo Yesu Kilistu. 12 Mchanya mwa msisi awo munhu kanguweza kuzenga kwa zahabu ama sendi ama kwa maganga ga sendi nyinji ama kwa migodi ama misolo ama midete. 13 Kunoga kwa mijito ya chila yumwe kokoneka mhela wa zuwa lila lya utaguso. Kwa vila zuwa alyo lyolawila na chiluli chiwele chopima na kulajila kunoga kwa mijito ja chila munhu. 14 Wone choyazenjile munhu mchanya mwa msisi chokwimilila, kobochela chonolo, 15 Ila wone choyazenjile cholakazwa, kowa yajilize choyaganigwe kubochela, ila heye yuye koloholigwa kota nakasulupuka kulawa kuli chiluli.

16 Ndaze, hamvizelele kota hemwe mwa ng'handa ya Nguluwi na Muhe wa Nguluwi kangikala mgati mwa hemwe? 17 Wone munhu yoneche koiwifya ng'handa ya Nguluwi, Nguluwi komdumya, kwa vila ng'handa ya Nguluwi ndo yelile, namwe ndo ayo ng'handa ya Nguluwi.

18 Mleche kihada! Munhu yoneche hali hemwe wone yejese kota kana luhala lwa kuli isi ayi, kanguganigwa yawe mpoka leka yawe na luhala lwa kukomya. 19 Kwa vila luhala lwa kuli isi ayi ndo upoka hali Nguluwi. Kota vyoyandichigwe kuli Maandiko Matakatifu, "Nguluwi kanguwagwilizaga wawele na luhala kuli usugu wa hewo." 20 Kahi, "Mkulu kanguvizela kota majesa ga wawele na luhala hambe gatanze chinhu." 21 Lelo, munhu yaleche kidaya kuwala wanhu, kwa vila chila chinhu ndo cha hemwe. 22 Wone ndo Paoli ama Apolo ama Kefa ama isi ama ukomu ama kubagama ama mhela wa sambi ama mhela wa ulinguya, vyeng'ha ndo vya hemwe. 23 Ila hemwe ndo wa Kilistu na Kilistu ndo wa Nguluwi.