1 Wang'holozangu ndangugana mvizele kota wasekulu wa hetwe weng'ha nawali hali wamizi wa ng'hungugu na weng'ha nawaloka hagati ha bahali. 2 Weng'ha nawabatizwa kuli yila ng'hungugu na kuli yila bahali leka welumbe na Musa. 3 Weng'ha nawalya chilyo chichila cha chimuhe. 4 Nawanwa kahi chakunwa chichila cha chimuhe. Kwa vila nawanwa kulawa kuli lila italawe lya chimuhe liwele nawelongoza nalyo, italawe alyo nalyali Kilistu. 5 Ila Nguluwi nahanojezwe na wenji wa hewo, ahyo mitufi jawo najenela kugunuche.

6 Lelo mbuli azi nazilawila leka kutulangusa hetwe, zangutukanya hetwe tuleche kuwika nhumbula za hetwe kuli mbuli zihile kota hewo vyowaditile. 7 Mleche kufugamila jimalukolo kota wamwe wa hewo vyowawele, kota Maandiko Matakatifu vyogalingulonga, "Wanhu nawekalisa hasi kulya na kunwa, hamba nawema na kudita mnvina za wohambe wamdumbe Nguluwi." 8 Tuleche kudita ung'hondwa kota wamwe wa hewo vyowaditile, nawabagama kuli zuwa limwe wanhu elufu makumi meli na zidatu (23,000). 9 Tuleche kumjeza Kilistu kota wamwe wa hewo vyowaditile, nawabagama kwa kulumigwa na mizoka. 10 Tuleche kung'ung'uta kota wamwe wa hewo vyowaditile, nawakopoligwa na mhilisi wa kubagama yawele nakalajizwa na Nguluwi.

11 Lelo, mbuli azo zeng'ha ziwele naziwafika hewo nazali ulajilo kwa wanji na nazandichigwa leka zitukanye hetwe tuwele ngikala kuli mhela wa kuduma.

12 Ahyo, yalingijesa kota nakema goya yelolele yaleche kugwa. 13 Kujezigwa kuwele nakuwafika hemwe hakuwele kujenzi kwa wanhu. Nguluwi ndo wa kitumbila, naye howaleka mjezigwe kusinda vyomlinguweza kwimilila, ila homjezigwa, heye kowapa mong'ho wa kwimilila na nzila ya kulawa goya kuli kujezigwa ako.

14 Ahyo, waganwa wa heni, miwiche kutali na kufugamila jimalukolo. 15 Ndangulonga na hemwe wanhu muwele na luhala, mwamule mwemwe kuwala aga gondilingulonga. 16 Hotulonga malumbo kwa Nguluwi kwa chizombe cha utambichizo, ndaze, hambe tihanze na danda ya Kilistu? Kahi hotumogola ibumunda, ndaze, hambe tihanze na lukuli lwa Kilistu? 17 Kwa vila ibumunda alyo ndo limwe, natwe, tuwele wenji twa lukuli lumwe, kwa vila weng'ha twangimogolela ibumunda lilyo. 18 Muwalole wanhu wa Isilaeli, wala walingulya nhambiko hali honhu ha kulavila nhambiko wangilumba na nhambiko azo hali honhu ha kulavila nhambiko. 19 Ndangugana kulonga choni? Lelo, chilyo chilavigwe nhambiko kwa jimalukolo ndo chinhu kusinda chilyo? Ndaze, ajo jimalukolo ndo chinhu ng'hatu kusinda jimalukolo? 20 Ne hado! Chondilingulonga ndo kota nhambiko walingulavya wanhu wohambe wamzele Nguluwi wangulavya kwa milungu, haiwele kwa Nguluwi. Hambe ngane hemwe milumbe na milungu. 21 Hambe muweze kunwa chizombe cha Mkulu na chizombe cha milungu, hambe muweze kulya hali chisaga cha Mkulu na hali chisaga cha milungu. 22 Ndaze, twangugana kumdita Mkulu yawe na fihi? Ndaze, twangijesa kota tuna mong'ho kusinda heye?

23 Vinhu vyeng'ha navikundigwa kuli malajizo, Ila haviwele vyeng'ha vinojile. Vinhu vyeng'ha navikundigwa kuli malajizo, Ila haviwele vyeng'ha vilingukangaza. 24 Munhu yaleche kupala mzidi wa heye yuye, ila chila yumwe yapale kwa chiwalo cha wanji.

25 Mulye choneche chilinguguzigwa kuli honhu ha kugula na kuguzila vinhu ne kuuzauza, kwa chiwalo cha majesa gawele kuli nhumbula za hemwe, 26 kwa vila Maandiko Matakatifu gangulonga, "Isi na vyeng'ha viwele mgati mwake ndo vya heye Mkulu Nguluwi."

27 Wone mochemigwa kulya na munhu yohambe yakunde namwe wone mkunde kuluta, lelo, mulye vyeng'ha viwele kowawichila hali hemwe ne kuuzauza kwa chiwalo cha majesa gawele kuli nhumbula za hemwe. 28 Wone munhu kowalonjela, "Chilyo achi nachilavigwa nhambiko kwa jimalukolo." Mleche kulya kwa chiwalo cha yawalonjele na kwa chiwalo cha majesa gawele kuli nhumbula za hemwe. 29 Ndangulonga, "Kwa chiwalo cha majesa ga nhumbula." Haiwele nhumbula ya hemwe, ila kwa chiwalo cha nhumbula ya yawele nakawalonjela.

Mombuza, "Lekachoni kilejeha kwa heni kitumbile nhumbula ya munhu yunji? 30 Wone ndangulonga malumbo kwa Nguluwi kwa chilyo chondilingulya, lekachoni ndeuzwe kwa chilyo chiwele kwa chiwalo cha heye nandilonga malumbo kwa Nguluwi?"

31 Lelo, choneche chomlingudita chiwe kulya ama kunwa, mdite vyeng'ha kwa welile wa Nguluwi. 32 Mleche kuwa ngwamo kwa Wayahudi ama kwa Wagilichi ama kwa chilundo cha wanhu walingumkunda Kilistu na Nguluwi. 33 Mihwane kota heni, ndangujeza kuwanojeza wanhu weng'ha kwa chila nzila, ne kupala mzidi wa nene ila kwa mzidi wa weng'ha, leka waloholigwe.