1 Lelo, kuwala ndolendole kwa chiwalo cha wanhu wa Nguluwi mdite kota vyondivilajize vilundo vya wanhu walingumkunda Kilistu vya Galatiya. 2 Kuli chila zuwa lya mwaluko lya juma, chila yumwe wa hemwe yawiche chasi cha sendi kwa kiwhana na choyalingupata na sendi azo yaziwiche leka hondikuya haleche kuwa na kulavya ndolendole kwa lupichi. 3 Mhela hondikuya kwa hemwe, ndowalajiza wala wawele mowahagula hali hemwe leka wahiliche baluwa na ndolendole za hemwe Yelusalemu. 4 Wone yowa goya nani ndute, lelo, woluta hamwe na heni.

5 Nandiwika goya kukolela Makedoniya, ahyo ndokuya hala hondilawa ako. 6 Hanji ndochikala kwa hemwe kwa mhela umwenga, ama hanji ndochikala hamwe na hemwe kwa mhela weng'ha wa chipute leka mlutilile kunhanza kuli majendo ga heni koneche hondiluta. 7 Hambe ngane kukola kwa hemwe himahima na kulutilila na majendo. Ndangugana kikala kwa hemwe kwa mhela umwenga, wone Mkulu yang'undize.

8 Ila ndosigala hano kuli muji wa Efeso mbaka zuwa lya Pendekosti. 9 Hano lwizi lwa mwanzi kwa chiwalo cha mijito ja heni, hanga nawo walingitwanza na heni ndo wenji.

10 Hoyokuya Timoteyi kwa hemwe, mikangaze leka yekale kikala goya na kusangalala kwa vila heye kangukola mijito ja Mkulu kota heni. 11 Ahyo munhu yoneche yaleche kumbeza, ila mumtanze yalutilile na majendo ga heye kwa kikala goya, leka yahiluche kwa heni, kwa vila heni ndangumbeteza hamwe na wang'holozetu.

12 Kuwala mng'holozangu Apolo, nandimdedeza ng'hatu yoye kwa hemwe hamwe na wang'holozetu wanji, Ila haganile kuya kuli mhela awu, ila kokuya hala hoyowa yelejehe.

13 Mleche kuwasa, mwimilile kuli makundo ga hemwe, muwe mzidahe na muwele na mong'ho. 14 Chila chinhu mdite kwa igano.

15 Wang'holozangu, mwangumzela Stefanasi na ivyazi lyake, hewo ndo wanhu wa mwaluko kubochela makundo ga chilundo cha wanhu walingumkunda Kilistu hala Akaya, kahi nawelavya kuwa vitumagwa wa wanhu wa Nguluwi. Ndanguwadedeza hemwe wang'holozangu, 16 miwiche hali ulongozi wa wanhu kota awa na wanji walingukola mijito kwa kikangaza na kuwa vitumagwa hamwe na hewo.

17 Ndangusangalala ng'hatu kwa vila Stefanasi na Fotunato na Akaiko nawoya. Mwa haduhu hano, ila hewo nawali hano hamwe na heni honhu ha hemwe. 18 Nawaidita nhumbula ya heni na za hemwe zisangalale. Lelo yanguganigwa kuwakumbuchila wanhu kota awa.

19 Vilundo vyeng'ha vya wanhu walingumkunda Kilistu vya Asiya vyanguwalamsa, Akula na Pilisika hamwe na wanhu weng'ha wa Nguluwi wawele kuli ng'handa za hewo wanguwalamsa ng'hatu kwa chiwalo cha kilumba na Mkulu. 20 Wang'holozangu weng'ha wawele hano wanguwalamsa. Namwe milamse kwa kulajila igano lya Kilistu.

21 Heni Paoli, ndanguwalamsa kwa kwandika kwa moko gangu. 22 Yoneche halingumgana Mkulu yapanjilwe. Mkulu wa hetwe, uye!

23 Kunoga kwa Mkulu Yesu kuwe hamwe na hemwe. 24 Igano lya heni liwe kwa hemwe kuli kilumba hamwe na Kilistu Yesu.